Ya yang na masa hpe yu yang Myen asuya gaw simsa lam mung bawng ban let KIO/KIA hpe mung n-gun kya mat hkra gasat kau rai bungli lahkawng kalang lata ngut na matu htinggrum masing hte galaw nga ai re hpe mu mada lu ai.
Dai majaw Myen asuya dap ni gaw Simsa lam bawng ban hpawng ngut shagu majan bai gasat dat rai nga ai re, kalang mi ga baw langai langai shatut nna KIA upkang ginra ni hpe yat yat zing madu la nga ai gaw KIO/KIA a matu hkrit tsang hpa byin taw nga sai.
KIA hpyendap a matu dahpran shara nnga wa ai gaw KIO/KIA Wuhpung ting a matu tsang hpa rai nga sai, Rawt malan ngu ai gaw dahpran shara lamu ga mung grai ahkyak nga ai, masha ni mungdan hkan makoi magap rai nga hkawm nna Rawt Malan bungli galaw ai gaw Awng Dang na matu grai yak ai hpe mungkan rawt malan labau ni hta sakse mu mada lu nga ai.
Dai majaw KIO/KIA hku nna masan nsa hkraw nga ai Myen hte mung masa bawng ban ai lam hpe jahkring mi naw gan jahkring nna, ningbaw ningla ni yawng hpyen majan a matu loi mi bai aten jaw ra sai, anhte KIA hpyendap n-gun ja nna ngang kang ai dahpran shara nga yang she Mung masa ga shaga ai hta Ja Ja ngu shaga mai na re. Hpyendap n-gun nnga, ngang kang ai dahpran shara nnga rai yang gaw hpyen wa hte ga shaga yang shayawm nna shaga ra wa na re, jahtum gaw hpyen wa jaw ai lamu ga hte dum nta hkan rawng nna mung masa shaga ra ai madang de mung du wa chye nga ai.
Tinang hpyendap hte tinang sari mi arawng, shingkang shingwang hte ngang ngang kang kang tsap nga yang she hpyen wa hte ga shaga yang n-gun rawng nna ja ja ngu shaga mai nga ai. Ya Yang anhte amyu sha ni gaw Mung masa lam mung grai wa awng dan ai ngu rai nmai tsun shi nga ai, ndai zwn re masa hta hpyen masa hku nna hkrat sum, n-gun kya wa yang matut nna hpyen wa hte mung masha ku ntsa ga shaga ai hta n-gun nrawng masan nsa wa chye nga ai.
Dai majaw hpyen masa hte mung masa lahkawng hpe kalang lata rau awng dang ai hku sa wa yang she kade nna yang anhte ra ai Pandung de du wa na re, Myen gaw hpyen majan hpe mung masa laknak kaba langai hku jai lang nga ai hpe mu mada lu nga ai.
Dai majaw KIO/KIA mung hpyen masa hpe mung masa laknak hku jai lang ra nga ai, hpyen majan sum yang yawng sum sai, mung masa mung sum sai, hpa majaw nga yang anhte hte bawng ban nga ai hpyen wa gaw hpyen Asuya naw rai nga ai majaw re. Kaga mung masha asuya rai yang rawt malan hpung ni hpyen majan hpe dai ram nlang ra ai.
Dai majaw KIO/KIA hte Wunpawng myu sha ni yawng gaw n-gun kahkyin gumdin nna loi mi naw machyi hkam kau ra sai, Majan kaba masing hpe lawan jahkrat nna gasat ra nga sai ngu mu mada lu ai, anhte Wunpawng myu sha ni machyi hkrum ai gaw Myen mung ting lawt lu na lam a matu re, Karai Kasang ra ai magam nan rai nga ai.
By Myutsawkasa blog
