Mungka shara shagu kaw du nga ai Wunpawng Myu Sha ni hpang de shana dat mayu ga ai.

Hkungga ai, 2014 ning, June shata 9 ya shani gaw, Wunpawng Buga de majan nnan kalang bai je bang wa ai 3 ning ladu hkrum nhtoi rai nga ai. Ya aten hta anhte a buga kaw hpyen yen tsinyam marai 100,000 jan yubak jamjau hkrum let, nga nga ma ai. Buga mare ninghtawn law law, shim lam n nga ai sha, shani shana hkrit gari nga ma ai. Mara masha law law roi rip zingri hkrum nga dingyang rai nga ai. Share shagan law law, hkala nba hkrum nna, shanhte a hkum hkrang daw chyen hpe myu hte mungdan a matu ap nawng da nna, ya aten hte kan bau bungli, tsi mawan lam ni hta ra kadawn ai lam law law nga nga ai. Share shagan law law asak ap nawng lai wa sai. Matut nna, share shagan law law tinang asak hpe ap nawng da nna buga hpe makawp maga na ma ai. Kanu kawa law law, kashu kasha ni hpe ap nawng kau sai. Kashu kasha law law, kanu kawa ni hpe ap nawng kau ra sai. Kanau law law, kahpu kana ni hpe ap nawng sai. Kahpu kana law law, kanau ni hpe bai n lu hkrum mat sai. Jawngma law law, simsa ai hte hpaji sharin la lu na ahkaw ahkang sum mat sai. Ma kaji law law, ngwi paw simsa ai hte kaba wa lu na ahkaw ahkang sum mat sai rai nga ai. Matut nna, alawan sha simsa wa na lam nau n mu shiga ai. Ngai na ningmu san san hpe tsun ga nga yang, maga myi de, simsa lam bawngban nga ma ai tim, tatut hta simsa lam lu na mahkrun n mu tam nngai. Dai majaw, 3 lang ngu na, majan ladu hkrum ten lamang hta, Wunpawng Buga Majan lam hpe mungkan ting chye lu hkra, Mung kaba, mare kaba de nga nga ai Wunpawng Myu sha yawng, jawm ladat shaw nna, nsen langai sha hte galaw lu na matu, chyeju hte hpaji jaw, hpaji la, ningmu garan, nna woi galaw la marit, ngu nna, yawng hpe saw shaga dat mayu nngai. Yangon Mare Kaba kaw nga ai Wunpawng Myu Sha, Ningbaw Ningla, Ramma, Kaji Kaba yawng hpe gaw, Ndai laban hpang Kru ya shani, 3rd May hta Kachin Women Peace Network Rung, 15/A, Thayet Taw stree, (near Gwa Zay), Off Baho Road, Sanchaung township hta, shana de 5:00 PM hta zupawng hpawng ga, ngu, saw shaga dat mayu nngai. Chyeju hte ahkrum ara du sa ya marit. Khon Ja Coordinator Kachin Peace Network