Daw – X Mungshawa kahkyin Gumdin Lam. ( Ning Gawn Mung Masa )

''Do not move an ancient boundary stone set up by your ancestors.''( Proverbs 22:28 ) 

 1. Hpung hte Mungshawa a Lit:-

Wunpawng Mungdan Shanglawt Hpung gaw, Wunpawng Mungshawa a gawng malai tai ai hpung re. Wunpawng Mungshawa a akyu ara hpe shawng de saw a nna Wunpawng Mungdan shanglawt hkra, Wunpawng Mungshawa hpe woi awn, sa wa ai rawt malan ai hpung re. 

Dai majaw, Wunpawng Mungdan Shanglawt Hpung gaw, mungshawa hpe lam woi ningshawng tai nna mungshawa a akyu ara a matu, mungshawa kaw na pru ai ninggun hte mungdan shanglawt hkra da kring da lang rawt malan gasat sa wa na.

Hpung a Lit gaw;-

(1) Mungshawa hpe myit hkrum kahkyin gumdin na.

(2) Mungshawa hpe mungmasa machye machyang bang ya na.
(3)Myit jasu sharawt nna Mungshawa a shanglawt lam hte Mungdan shanglawt lam hta aja awa woi awn nga na.   Nga lu/sha lam hta yu hpa jang ma dang sharawt yaw a na lam ni re.

Mungshawa ni mung Hpung a masat da ai lam yan ni hpe hkan hta hkan sa nna hpung a lam woi awn ai n-pu e kahkyin gumdin ninggun kring da lang rawt malan gasat saw a ra ai. Wunpawng Mungshawa hkum gu hkra hte Wunpawng Mungdan shanglawt hkra galaw na matu tinang a lit re ai lam hpe chye na ai hte tinang nan lagaw lata du shakut gunhpai ra ai. Madu myit rawng ai kaw kaga kadai shangun sun nra ai sha, galaw ra nga ai bungli hpe, tinang myit hte galaw chye nga ra ai. Tinang nan hta jum galaw dat yang she, bungli dai gaw ngut wan a re ngu ai hpe dum chye ra ai.
Bai nna Mungdan shanglawt lam hpe makawp maga na lit mung, mungshawa hta nga ai. Shinggan de na shang ai Hpyen ni hte kata kaw up rawng nga ai Hpyen ni yawng hte gaw, Wunpawng Mungdan Shanglawt Magam Bungli hpe lam amyu my hku nna je hpre jahten sharun dingyang rai nga ai majaw, Wunpawng Mungshawa hkum dindek hta Mungdan shanglawt magam hpe makawp maga ai sin langa bungli hpe tut gunhpai na lit nga ai. Shinggan hpen, kata hpyen ni a jahten sharun bungli n awng dang lu hkra tut e maja nga ra ai. Mungdan shanglawt lam yan hpe jahten sharun wa ai bungli hpe mu mada nna majoi yu shalai kau nmai sai. Wunpawng Mungdan shalawt hkra galaw saw a ra ai bungli nga minga gaw, Wunpawng Mungshawa yawng a lit nan re ai.

2. Kahkyin Gumdin ai laisat laisa ;-

Wunpawng Mungdan Shanglawt Hpyen la ni, Wunpawng Mungdan Shanglawt Asuya magam gun masha ni hte hpung shang masha hkum gu hkra gaw Wunpawng Mungdan Shanglawt MATU hpung kahkyin gumdin masha (Organizer) ni hkrai re. 
Asuya magam gun masha, Hpyen magam gun masha hte hpung shang masha yawmg, Wunpawng Mungshawa hpe mungmasa hpaji jaw let, tatut bungli woi awn nna myit ginrawn kahkyin gumdin ra ai.

(1) Wunpawng Mungshawa a machye machyang madang hpe sha rawt ya ra ai. Hpa majaw nga yang “Shanglawt Majan”
gasat ra ai lam, Shanglawt Majan hpe kadai gasat ra ai lam, kaning di gasat ra ai lam, Shanglawt Masa lam yan gaw hpabaw re ai lam ni hpe azin ayang hkaw tsun htai hparan dan ai lam hta myit ga lu kalang si mani ga hte tsun dan hparan dan ra ai. Kalang mi lahkawng lang tsun dan nna nchye na ai rai yang, law law lang lang bai kahtap tsun dan htai hparan dan ra ai. Tatut bungli woi galaw let, lachyum dan leng hkra htai hparan dan ra ai. Rawt Malan lam hta tatut bungli n gunhpai yu ai wa gaw, Rawt Malan masa hpe n chye na hkraw ai re majaw, galaw let sharin la sa wa ra ai.

2. (2)  Wunpawng Mungdan Shanglawt Hpung a madung tara kanu ni hpe mung shawa yawng chyena hkra hparan dan ra ai. 
   Hpung madung tara kanu ni hpe tatut hkan sa woi galaw wa let lachyum shaleng dan sa wa ra ai.
   Wunpawng Amyu hte Wunpawng Mungdan Masha ni a ginru ginsa labau hpe gawn yu nna mung, Wunpawng Mungdan a shaingra maka hte sut gan a majaw, mungdan langai mi hku nna grin nga ma ai lam hpe maram yu nna mung, Wunpawng Mungdan Amyu ni hte Wunpawng Mungdan Masha ni gaw, Mungdan Amyu langai mi rai nga ai lam dan leng nga ai hpe chye na hkra hparan dan ra ai.
   
   Wunpawng Mungdan a labau hte Mungkan mungdan ni a labau hpe sawn ningdaw yu dat yang mung, Wunpawng Mungdan gaw, shanglawt ai Mungdan byin ra ai lam hparan dan ra ai Maigan Mungdan Amyu law law Mungkan ntsa e nga ai hte maren, Wunpawng Mungdan Amyu mung Mungkan ntsa e n-dut ndang shanglawt ai hte ngang grin nga ra ai lam ni hparan dan ra ai.
   Magam bungli galaw sa wa ai shaloi, Mungshawa kata e Tara rap ra ai lam, a hkaw ahkang hpring tsup ai lam, Mungshawa shadip jahpang nga ai lam ni hpe shadan shaleng dan ra ai. 
   Wunpawng Mungdan Shanglawt Hpung gaw, Wunpawng Mungshawa a akyu ara hpe teng sha gunhpai nga ai hpung re ai lam, tatut bungli hpe shadan shaleng dan ra ai.
   
   
3. (3)  Mungshawa a nga mu/mai lam hpe aja awa sharawt ya ra ai. 
   Mungshawa a akyu ara hpe n yu ya ai rai yang, n-gup aga hte sha hkaw tsun ai lam gaw hpa lachyum pru ai n-rai. Tatut nan mungshawa a nga mu/mai lam hpe galaw gunhpai sharawt sa wa ya ai rai yang, Wunpawng Mungdan Shanglawt Hpung gaw Wunpawng Mungshawa a akyu ara hpe tam ai lam rai nga ai lam dan leng nga ai re majaw, Wunpawng Mungshawa mung Hpung a magam bungli hta myit lawm wa na re. Shakut shaja shang lawm wa na re.
   
   
4. (4)  Hpung a magam bungli woi awn galaw sa wa ai lam magup hta hpawm lit la sa wa ai masa hpe lang sa wa ra ai. Marai langai lahkawng chyu sha chye ai hku woi jum hpajang paran sha ai lam n re ai sha yawng jawm lit la gunhpai nna yawng jawm akyu hkam sha ai masa shapraw ra ai. Mungshawa daw tsa lam yan ladat hpe lang ra ai.
   
   
5. (5)  Shada sharin hkat ai masa hpe lang ra ai. 
   N-chye ai wa gaw chye ai wa a ga hpe madat la hkan sa shatup ra ai. Shut shai ai wa gaw tsun shadum shading sharai ai wa a ga hpe hkap la ra ai. Myit hkrum kahkyin gumdin lam hpe madung tawn nna shada shading sharai shadum jahprang sharawt hkat sa wa ra ai. Wunpawng Mungdan Shanglawt Hpung a kahkyin gumdin bungli awng dang lu na matu Mungshawa yawng hpe gumhpawn ai hku kahkyin gumdin woi awn sa wa ai sha
   

n-ga, myit su salang hpung, ram hpung, num hpung re ai ni hpe langai hte langai a chye na myit hpaw myit ra sharawng ai lam galaw lu ai atsam marai hta hkan nna laklai ai Ginra hta laklai ai ladat hte woi kahkyin gumdin ra ai. 
Daw ( 11 ) de naw matut na +++++