'Do not move an ancient boundary stone set up by your ancestors.''( Proverbs 22:28 )
Daw-VIII.Pandung Shadaw Du Hkra Gasat Sa Wa Ai La Dat.
Wunpawng Mungdan awm dawm shanglawt na matu, shadip jahpang lu ai Gumrawng Gumtsa Mungdan gaw sharawtda na ngu ai Pandung Shadaw du hkra Wunpawng Mungdan Shanglawt Hpung gaw Lawu de madun da ai ladat ni hteRawt malan gasat sa wa na.
*1.Mungmasa Majan Hte Sinat Laknak Hpe Kapyawn N’na Gasat Sa Wa Na.
Wupawng Mungdan awmdawm shanglawt na lam hte shadip jahpang lu ai Wunpawng Gum-rawng Gumtsa Mungdangaw sharawt na ngu ai pandung shadaw gaw mungmasa pandung shadaw re.
Dai majaw, dai pandung shadaw de du lu namatu Mungmasa Majan aja awa gasat ra ai. Wunpawng Mungdan sha ni hte Wunpawng Amyu sha ni yawng kahkyin gumdin nna maigan mung maden hpyen ni hpe lam magup jut magup hku nna shingle gasat ra ai.
Mungshawa yawng Mung masalam hpe atsawm chye na nna mungdan shanglawt na matu hkum ding dek lit la gunhpai ra ai. Dai zawn mungmasa lamhkrangna rawt malan gasat shinla ai sha n-ga, sinat laknak hte mung shawa shingle gasat na.
Maigan mung maden hpyenwa mahtang sinat laknak rip nga ai re majaw, Wunpawng Mungdan masha ni mung sinat laknak shapraw kau ra ai. Ngangkang ninggun rawng ai Hpyen Dap hpaw nna mungshawa yawng, sinat laknak lang nna rawt malan gasat ra ai.
Dai majaw lam mi hku tsun jang, Wunpawng Mungdan Shanglawt Hpung gaw Wunpawng Mungdan kata de tawt lai shang kabye roi ripdip kamyet sha rawng nga ai maigan mung maden hpyen ni hpe Mungmasa Majan hte sinat laknak majan kapyawn nna rawt malan gasat shingle gawt shapraw kau na rai.
*2. Padang Majan Ladat Lang Na.
Wunpawng Mungdan Shanglawt Hpung gaw, mung maden hpyen ni hpe gasat shingle gawt shapraw ai majan htaPadang Majan Ladat lang na.
(1) Laknak galoi n-jahkrat na.
Sinat laknak galoi n-jahkrat na.
Hkum hkrang laknak galoi n jahkrat na.
Myit masin laknak galoi n jahkrat na.
Hpang jahtum awng padang lu la ai shani du hkra gasat na.
(2) Tinang a lagaw hta tinang tsap na.
Maigan de na sa garum na chyu sha ala nga ai masa hpe ning hkap na.
Wunpawng mungdan masha ni a ninggun atsawm hte shakut shaja ai lam hta madung da hparan nna she Maigan hpyen hpeshingle gawt shapraw na, Wunpawng Mungdan masha ni tinang a lagaw hte tinang tsap lu hkra woi awn shakut shajana.
(3) Padang majan ladat hte gasat na.
Tin lu ai daram, lawan lu ai daram padang ninglaw lawan lu hkra gasat na. Raiti mung,mungdan shanglawt sha n-lu dingsa n shayawm ai ninggun hte dingyang matut manoi gasat saw a lu hkra zai byeng ya shapraw a tsam dat nna dakring dalang rawt malan gasat nga na.
Awng padang lu, Mungdan shanglawt lu ai shani she majan hpe sha ngut na.
*3. Mungshawa A Rawt Malan Masa Hte Rawt Malan Gasat Sa Wa Na.
Wunpawng Mungdan Shanglawt Hpung gaw rawt malan ai hpung re. Rawt malan ai lam hta ninggun ja htum rai nga ai myit hprang myit raw tai kahkyin gumdin ai mungshawa a ninggun hpe kam sham ai hpung re. Hpung a PandungShadaw nan mung Wunpawng Mungdan Mungshawa a akyu ara a matu re.
Dai re majaw, Wunpawng MungdanShanglawt Hpung gaw dam lada ai Wunpawng Amyu masha hte Wunpawng Mungdan masha shawa daw tsa hpe myit jasu sharawt kahkyin gumdin shabawn la n htawm, dai myit su myi rawt kahkyin gumdin shabawn shangang tawn ai mungsha wa a ninggun hte nan anhte a Pandung Shadaw du lu hkra rawt malan gasat sawa na.Myit su/rawt nga ai mungshawa a myit hkrum mang rum kahkyin gumdin shabawn sha-ngang tawn ai mungsha wa a rawt malan ai ninggun hpe kaning re ai mung maden maigan hpyen ninggun e mung gasat manga dang kau lu ai n-rai.
Wunpawng mungshawa gaw Wunpawng Mungdan Lamu ga kaw nna ru jung dahpran ngang ai ninggun re.Tawt lai shang kabye ai maigan mung maden hpyen gaw, maigan sumtsan mung ga kaw nna du sa ai hpyen,mungsha wa a akyu ara hpe jahten sharun ai hpyen re ai majaw, dahpran n-ngang ai ninggun re.
Mung shawa hta n-htum n-wai ai ninggun nga ai. Shanghte myit hkawn ai bungli hpe awng dang jahtum du hkra galaw gunhpai lu ai atsam rawng ai. Padang majan gasat lu ai ni rai ma ai. Shanhte a akyu ara a matu dakring dalang atsam shapraw shakut shaja lu ai ni re. Dai majaw, Wunpawng Mungshawa a rawt malan ai ninggun hta tawt lai shang kabye ai mai gan mung maden hpyen hpe Wunpawng Mungdan lamu ga jarit kata kaw nna atsai awai gawt manga shapraw kau na matu hte Wunpawng Gumrawng Gumtsa Mungdan gaw Sharawt sa wa ai lam hta dingbai dingna tai nga ai ju shingna ni hpe atsai awai seng yeng kau na matu Wunpawng Mungdan Shanglawt Hpung gaw, mung shawa a rawt malan Masa lamhpe tup hkrak htep lahti hkan sa na.
Daw (9) de bai matut na
