Myen asuya hte mung masa bawngban na matu du sa wa ai KIO dat kasa ni hpe KBC hku nna htunghking magun lit hte hkungga jaw hkalum la ai lamang hpe May 29 ya shana 7:00 pm ten hta Myitkyina mare Shatapru lawk (1), KIO Kyithkai Rung kaw galaw lai wa sai lam chye lu ai.
Dai lamang hta KBC Ginjaw hte Ginwang (15), Myitkyina, Htingnai, Waimaw Ginwang ni de na Buga Hpung ni, Norway, Singapore, Japan, Thai, Australia, Malaysia Mungdan ni de du nga ai Wunpawng sha ni hku nna gun jaw ai magun lit yawng (74) du ai lam chye lu ai.
Lamang hta KBC Ginjaw magam gun ni, Gunwang Amu madu ni, Buga Hpung de na Hpung woi Sara/num ni, Hpung ningbaw ningla ni yawng marai (300) jan du lawm nna KIO ningbaw ningla ni hte hku hku hkau hkau hkrum shaga kanawn mazum lu ai lam, Akyu hpyi ya ai lam, Rev. Gunhtang La Myen hku nna Karai mungga hte n-gun jaw, Rev. Sinwa Naw kyu hpyi ya ai hte KIO dat kasa ni mung grai n-gun lu myit pyaw kabu ma ai lam chye lu ai.
Ndai zawn galaw ai lam a yaw shada ai lam gaw Wunpawng myu sha ni yawng hte KIO gaw langai sha re lam hte KIO gaw Wunpawng sha ni a gawng malai re lam hpe Asuya hte maigan ni yawng chye lu na matu yaw shada ai lam lamang hpe woi awn ai KBC Amu madu Rev. Dr. Hkalam Samson kaw nna chye lu ai. KBC MNK
