WUNPAWNG Myu sha ni hpe Singapore Mungdan A Su Ya(gov) Kaw nna *KACHIN* ngu ai Amyu Mying hte tara shang PR Jaw ya sai
Labau Sak Se Kadun!
By PaHtau Nsen
JaChyum Ga
Esaia 55:9,Eshta 4:14
Ngai gaw (Du Zahkung Hkawng Je) hte jan Batsam Hawng Nyoi yan a kasha ma kaw wa re. Karai Kasang a chye ju san san hte tsi sarama bungli hte myen mung kaw manga ning magam gun ngut ai hpang Singapore de1999 hta du sa ai.
Ngai Singapore du ai shaloi ICA form hta amyu mying kachin ngu ai lata na n nga ai. Dai majaw dai ten na Singapore du wunpawng myu sha ni yawng gaw n kam tim a myu hpe' Burma' or' Myanmar' ngu ai hpe lata bang wa sai.
Karai KaSang a chye ju jaw e2005 shaning htum maga de ngai Singapore PR hpe shawk na daw dan let ICA de form sa shawn ai.
PR application form ka ai Shaloi a myu hta 'Myanmar'ngu n kam ka ai majaw officer hpe san yu yang, n mai ai myen mung masha ni a Matu gaw 'shani 'Myanmar' Karen sha mai lata la ai nga sanglang ai..
Myit hta hpa ka tim n ra na re ngu zawn nawn ai majaw ''Kachin'' gasi loi bung ai'Karen''hpe Lata bang dat sai..
6february 2006 shani IC card sa htuk na, card hpe yu dat yang a myu ""Karen ,, nga hti lu ai. A Myu-''KACHIN'' ngu mai galai na matu mai tang shawn na kun ngu Officer hpe san yang, n mai ai sha nga ai.
Dai majaw dai shani PR card lu tim myit hta ai n nga dum let, Karai Kasang Hpe ga san san kau sai. PR card hpe shagu myit hta ai n nga dum let Karai Kasang kaw "KACHIN" ngu ai a myu hpe n dai Singapore ICA hta tara shang byin wa na matu lam madun rit ngu n na a kyu grai hpyi ai.
Ngai sha n rai dai ten na Singapore de wunpawng sha ni yawng a kyu hpyi ga langai rai na re ngu kam ai.
May2006 hta ICA rung de bai sa n na, IC card kaw a myu"Myanmar" ngu mai galai na i ngu officer hpe san yang n mai ai bai nga ai. Raitim ngai na matu a hkyak ai majaw, gara hku galaw yang mai na ngu bai san yang, card htuk ai shara na officer kaba hte hkrum shangun ai.
Officer kaba hte mung n mai byin ai majaw kaga officer kaba ni hte hkrum na matu lajang ya ai. officer ni hte hkrum shaga ai shaloi 'Karai Kasang ,lam madun let Karai Kasang shingkang dan dawng na matu a kyu grai hpyi sai.
Hpang jahtum htum hta'Birth and Death Department'na kaba htum wa hte hkrum lu ai. "Hpa rai na galai mayu ai i?" nga shi san yang, myen mung hta n ta masha ni na passports shawk ai shaloi rung hta n yak na matu, ngai myen n rai tim shawa lang ai a myu Myanmar hpe hpe bai galai ya rit ngu a hkang hpyi ai.
Nang hta myen n re ai nga hpa sakse nga ai i?"
Nga majaw ngai na dai daw lekmat (Jinghpaw hte English) hpe madun ai." Laika shawn da u"nga ai majaw"Myanmar"galai ya na matu laika ka nga yang, Nang na Matu a myu"KACHIN" nga yang grau htuk na n re i?" nga shi san wa ai.
Ngai mung "KACHIN " nga ai gaw jaw dik htum rai tim Singapore ICA kaw code n nga ai majaw Myanmar hpe sha lata la ra na sai ngu htan dat ai. Ngai laika ka ngut daram rai wa yang, shi gawk kaw na pru wa let, ya nang a myu?
"KACHIN" nga ai hpe mai lata sai. Ya sha ngai code lajang bang dat ya ai."nga tsun ai shaloi ngai na myit hta Karai Kasang gaw hpyi yang jaw ai Karai, ngu ai hpe Chye ju grai shakawn kau sai.
Manu jahpu hpa shajan n hpyi ai sha lawan dik ai hku garum ya ai dai Officer kaba hpe mung Chye ju dum ga tsun let laika shawn da kau sai.
N dai mabyin kaw na ngai hkam la lu ai gaw mung dan langai hta teng man ai hku woi awn ai ni gaw grai ahkyak ai, mungdan masha ni mung madu na mung hpe a rawng la let jut shagu kaw na mungdan galu kaba lam hta (dai Officer kaba zawn) shakut shaja yang, Singapore zawn mungkan hta shim lam lu ai, awng dang ai mungdan ni law law nga wa na hpe kam ai.
Karai Kasang a chye ju san san a jaw e PR card ningnan hta a myu "KaCHIN"👈 nga ai hte1August 2006 hta Singapore du wun pawng sha langai hku shawng ningnan tara shang byin na matu hkam la lu sai.
Myen a su ya hpyi yang, lu na n lu na n chye ai. Wunpawng hku hpyi yang mung mai byin na gaw gadai n mai tsun lu ai. Raitim, a sak hkrung ai dai Karai Kasang hpe Singapore du wunpawng sha ni myit hta hkam sha let hpyi ai shaloi ,
Karai Kasang a ten u ai shaloi Hpa n rai ai ngai hpe shi jai lang let shateng ya ai lam mau hpa hkam la lu ai lam hpe Singapore du wunpawng myu sha ni a Jinghpaw wunpawng Hka lup hpung (Singapore)20 ning hpring chye ju shakawn poi masat Magazine hta kabu gara let sakse hkam dat n ngai law.
Zahkung Je Naw
( Wai Maw )
