By
Palawng Naw Tawng
Kachin ngu a amying shingteng lu wa ai, mungkan hta dan dawng wa ai lam gaw majan a majaw re ngu yang n hkap la lu ai masha n nga na re. Makam masham asak, amyu a asak, labau asak ni hpe majan hkat let asak matut ai ni re. Majan a majaw Kachin ngu ai amying shungteng lu wa ai. Majan a majaw Kachin ngu ai hpe mungkan e chye wa ai. Mungkan de dang dawng wa ai. Bai Kachin ngu ai gaw Hkalup makam ngu ai hta ru jung kaba wa ai lam hpe mung n mai malap nga ai. Dai majaw majan galoi mung gasat nga ra ai hte Karai a Munggga hta npawt da ai Hkalup makam hta e hkridun ngang ra ai amyu anhte rai nga ga ai.
1. Kachin a ying lu wa ai lam: Daihpa du ni hte Pisa du a majan.
Aten gaw 1935 ning July shata daram hta Hugawng ga na DAI HPA Du ni gaw India ASSAM mung daw de rap sa nna Jinghpaw Pisa du ni hpe htim gasat ma ai. Masha ni sat, mare kahtawng ni nat kau da ya ma ai da. Ndai lam hpe India mung hpe up ai Englik ni gaw grai mara kaba la ai hte majan wan n kaba wa u ga nga Myen INDIA hkawhkam hte jahkrup nna daw dan hparan na natu INWA e nga ai Englik rung de Aming jahkrat dat ma ai. Dai re ai majaw ndai majan lawan zin na matu INWA e nga ai Englik hpyen du wa Col. Henry Burney hte rau shi a manang wa American Hkalup Sasana sara Eugenio Kincaid gaw 1937 ning January 27 ya shani hta lung wa ma ai.
Sara Kincaid gaw ndai hkrun lam a majaw Manmaw, Sinbo, Magaung ga de du lu nna Gahkyeng ga nga ai Jinghpaw Wunpawng amyu sha ni hte shawng hkrum ai sumtsan Sasana sara tai wa sai. Ndai sara kaba shamying dat ai amying shing teng Gahkyeng nga ai kaw nna Kacheens, dai kaw nna Kachin mying wa ai lam rai nga ai. Dai re ai majaw Jinghpaw Wunpawng amyu shada gasat hkat ai Hugong Assam majan kaw na Karai Kasang gaw mai kaja ai bungli pru hkra galaw dat nu ai. (Sara Zinghang Tu Nan, 100 Ning Jaw Masat Labau Maumwi, 1977, Laika man 14)
2. Kachin ngu ai mying gaw Karai Kasang a mungga a majaw grin wa sai lam.
Ndai majan a majaw Kachin ngu amying shingteng lu wa ai hte Hkalup makam mung anhte amyu ni hta ru jung wa na npawt tai wa sai. Hkalup Sasana Jinghpaw Wunpawng buga hta ru jung wa ai hte Kachin ngu a amying shingteng gaw gin wa ai amying tai wa ai. Yawng jawm hti na Chyum Laika gale na matu Kachin Language nga wa ai hte Chyum Laika Kachin Bible nga wa sai (Sara Kaba Ola Hanson galaw ya ai Dictionary hpe Jinghpaw Dictionary ngu n shamying ai, Kachin Dictionary ngu tsun ai; Chyum Laika hpe Jinghpaw Bible ngu n tsun ai, Kachin Bible she nga ai.) Dai majaw Kachin ngu ai mying gaw Karai Kasang a mungga a majaw lu ai ngu yang mung n shut nga ai.
3. Kachin ngu ai amying shingteng mungkan hta dan hkung wa ai lam:
No 2 mung majan aten lagaw dap hte gasat ai hta mungkan e kaja htum ngu nna shakawn hkrum ai Ingalik ni gaw, 1941 ning hta hpet-sit Japan dap ni hte hkrum ai shaloi sum mat nna shata mali manga laman Myen mung hpe tat kau da nhtawm hprawng mat ra ma ai. Dai majaw mungkan e myi tu myi hkyeng hte yu mau nga ai Japan Nipon dap kaba ni hpe Jinghpaw mung kata de du shang wa ai shaloi, shanhte a majan hta share shagan gumrawng ai kawng hpe Jinghpaw Wunpawng Northern Kachin Levies, Kachin Rangers dap ni nhtang gasat nna kawng daw kau ya ai gaw kaning n chye di mat ai. Jinghpaw Wunpawn Ranger dap ni a dam hpe n hkam lu nna htingnut hprawng mat wa ai Japan hpyen dap ni gaw Kachin ngu ai hpe kade daram hkrit a ni? nga yang Myen ga hku chyahkrau hpe (Hkachin) nga ai nsen hpe na yang pyi hkrit ai kaw du mat ma ai da.
1946 Jan (14-16) hta Inglik hkawhkam malai Sir Doman Smith gaw Myitkyina kaw galaw ai Japan Majan Dang Padang Manu hta sa lawm sai. Ndai majan hta Kachin ngu ai mungkan hta dang hkung ai lam hpe Sara kaba Sword tsun ai gaw, “Kachin Jinghpaw masha ni, dai ni nanhte gaw mungkan hta shagrau hkam manit dai law. Kachin ngu ai hpe anhte America mung kaw masum ning hta kalang mi pyi n na lu ga ai. Rai timung dai ni gaw dai hku n rai Kachin, Kachin nga ai n sen gaw Radio kaw nna minit (minute) masum hta kalang na lu manit dai law, nga nna tsun shakawn lai wa sai (Jinghpaw Prat Shilaika., February 1960).
Ndai zawn Kachin amying hpe mungkan hta dan dawng wa hkra majam hkat ai hta ningtawn ai hte Hpatsit Japan hpyen gumshem hpe mungkan majan hta shawng nnan Padan woi dip ai, Kachin Land kaw na hpyen man woi gayin, htingnut mat hkra woi awn gasat ai Duwa Zanghta Sin woi awn let Putau ga na hpunau Rawang ni shang lawm ai Northern Kachin Levies the Kachin Rangers ni hpe mung n mai malap nga ai.
Dai na laja lana bai byin ai amyu shamyit majan hta Kachin ngu ai gaw America kaw sha nrai mungkan mungdan shagu, shiga dap shagu n lawm n mai, n chye n mai tai wa sai. Kachin issue (mabyin) n lawm yang journal n lu dut ai aten dai ni re.
Ga Hpundim
Dai re majaw majaw Kachin ngu ai gaw hpyen majan a majaw lu wa ai amying re; Kachin ngu ai gaw Hkalup makam a majaw ngang grin wa ai amying re. Hkalup Makam, Majan Nhpan hte Kachin ngu ai gaw garan gin hka da n mai nga ai law.
Tang Madun ai Palawng Naw Tawng
Madi Shadaw laika;
1. Duwa Nanzing La ga kale nna, Duwa Zang Hta Sin ka ai, Dimokrasi Nhtang Hku.
2. Gauri Panlawng Editor, Jinghpaw Prat Shilaika., February 1960.
3. Sara Zinghang Tu Nan, 100 Ning Jaw Masat Labau Maumwi, 1977.
4. Tegenfeldt, Herman G. A Century of Growth: The Kachin Baptist Church of Burma, Pasadena, William Carey Library, 1974.
5. James S Fletcher, Secret War in Burma, 1997.
6. Roberts,William. Pioneering Among the Kachin. Boston: American Baptist Foreign Mission Society, 1911.
7. Sword, Gustaf A. Light in the Jungle: Life Story of Dr. Ola Hanson of Burma. Chicago, Illinois: Baptist Conference Press, 1954.
8. https://www.cia.gov/…/…/kent-csi/vol45no5/html/v45i5a07p.htm
