Saturday, December 15, 2012

Shang Lawm Rit

  Myitrum manang ni, “Shang Lawm Rit” ngu ai Ga shagawp re yaw. Yahte tup Manmaw lam , Hangkai M post kaw na, Lajayang de myawk gap bun shatsang bu nga ma ai ngu yang, mani gaw jahpawt jau jau gasat poi byin sai. Lajayang M Hpungkyi jawng kaw M ni she dabak ai da. Dai kaw M ni marai 40-50 si rum ai lam na lu ai.Lajayang de M ni grai naw kanaw lung wa nga ma ai da.Mani tup mana tup myawk kaba gap bun tik tik nsim nsa yuptung yuphka gap bun ma ai. Anhte a Share Ninghkring 3 mung mani na nhtoi hta, Share Shagan tai mat wa masai lam na lu ai. Tai ni Lajayang , Lungrawk post de du mayu nna shakut ai re lam chye lu ai. Mani sa ai nbungli 3 kaw na langai mi hpe lu gap jahkrat kau ya ai majaw , Nepyidaw na grai pawt let,6 bai sa mu ngu bai matsun ai lam mung chye la kau ya ga ai da. Daihpawt 4am hta mung myawk kaba naw gap bun ma ai. Anhte marai mi pyi n ngam hkra nsim nsa akyu hpyi ga lu oi.
JIC
Shang Lawm Rit

I hteng myi di shim,
Shawng lam majing grim;
Laknak ni n gu,
Malai mi n lu.
Kahtet majan kaba,
Ruyak shoihpa wa!
Dagam dala zawn,
Si hkrung si htan gyawm.
Mayam n kam tai,
BGF n la mai;
Yawng jawm gasat nga,
Shinggyim hkaw hkang ra.
Shawng lam sa ni sa,
Hpang lam nga ni nga.
Majan hkap ni hkap,
Hpang e tsap ni tsap.
Kyu hpyi ai ni hpyi,
Lusha galaw ni kri;
Hpa- awn Ningbaw ni,
Malap mali n di.
Hpyen yen ni hpe bau,
Garum ningtum jau.
Ma hte sak kaba,
Chyingli bau maka.
Jawng lung ama ni,
Simsa laika hti;
Lakawn lanawn,
Zepzi woi awn.
Nde she kyin tim,
Kau mi atsin zim;
Hpa pyi n kam di,
Kyu pyi n kam hpyi.
Nawku jawng n sa,
Lagawn gawn ai wa;
Labau jaw ai lit,
Nang mung n mai yit.
I ya gam maka,
Yawng jawm shang lawm ra;
Myit hkrum myit ra na,
Karai sharawng nga.
Nawku jawng hpring hpring ,
Karai ra masing;
Shang lawm ga i ya,
Hpyen-yen ai masha….

Shanglawt Tsing
(15.12.2012, 12:10AM)