Mali yang kaw na M ni lu lai lung wa magang sai nga ma ai

Myitrum manang ni ,mani na matut Hkristmas Ga shagawp bai shagun dat ai yaw.Hkristmas poi ten e anhte KK lawm ya ai hte dingbai dingna n nga angwi apyaw kabu Gara awng dang ai hte shangai wa ai Madu Yesu hpe aten jaw hkalum la lu  saga ai.
Raitim, Hkangkai bum de na myawk kaba gaw shani tup Laja yang de gap bun ,Myawk nsen shangoi taw ma ai.Manmaw lam Dawhpum makau Tingjang kahtawng hkaunapa kaw marai 48 shang ai Helicoper kaba wa hkring nna hpyenla wa sa da ma ai lam shiga mung na lu ga ai .
MKA lam wanjak nga ai ;Mali yang kaw na M ni lu lai lung wa magang sai  nga ma ai.LZ e nni nkri kyu hpyi nga ai aten  re .Tsaw ra myitrum ai manag ni ,shawng lam de kyu grai hpyi garum ga yaw .Daihpawt mung  jau jau myawk  ngoi bu nga ai.
JIC++++
Kabu Gara Hkristmas Poi (matut )

Oh-aw!

Anhte Wunpawng sha ni wa,
Hkye hkrang la hkrum ai maka;
Amerikan Sasana,
Hkye Madu a’Mukasa;

Mungga hkap la kam sham jaw,
Hkye hkrang la hkrum sai lu yaw;
Daini Kabu Gara ai,
Hkristmas Poi shabyin sai.
Hkristmas Poi she shabyin tim,
Dinghku majan hkat n zim;
Buga Hkristmas Poi galaw,
Myit gaw hkren nga ai n pyaw;

Yi-i!

Mungshawa myit yawng hte wa,
Majanpa hkrai majen sa;
Iya Share Ninghkring ni ,
Kaningrai she gasat kri;

Tsadan hpe gasat shamyit ,
Atsam loi pa n shagrit ;
Nshung sama gaw n mawng,
Wanhkut bat chyu hkrup nga dawng!

Goi sha –e-e!

Daini Mungkan ting kabu,
Hkye la lam hpe shingran lu;
Shada tsawra myit madun,
Mara dingsa n dinglun;

Matsing da ai raw hkraw kau,
Raitim Tai wa hte n hkau ;
Kaningdi tsaw ra lu na?
Hkye la Madu sharin ya;
“Na hpyen wa hpe tsaw ra u,
Tsawra myit hpe madun su”

Oh!Oh! Sorry law!

Ihpe mara raw ya rit,
Awng Padang she jaw yaw nit,
Shanhte tsadan ni nan rai,
Mara raw ya na n tai;

Majan ndai K’rai majan,
Hpan Karai wa hte tsadan;
Hkye la Madu she du sai,
Tai masing kawn shalawt ai;
Wunpawngsha ni Hale –lu-ya!
Karai Chyeju shakawn na.

Oh!

Tsaw ra Chyurum sha ni yawng,
Kam sham myit she jawm mahkawng;
Hkye hkrang la hkrum ai Ninghtoi,
Kabu Gara Hkristmas Poi;

Katsi numri saiwan rau,
Merry Hkristmas!ngu jahtau;
M’nisum myiman yawng shakram,
Share ni hpe mung salam.

Oh! ya daini,

Hkristmas Mungga jawm magra,
N ngwi n pyaw yawng sim sa;
Tinang myit salum kata,
Ma Yesu hpe sh’ra jaw ya ;

Htani htana hkye la hkrum,
Madat mara amyit rum;
Numhtet ga mahkret dat ai,
Wunpawng Shayi ajet rai…..

*Ndai Hkristmas shakram ga na la ai ni yawng ,Yehowa a awng
sharawng ai ni tai nna,Ngwi Pyaw Simsa ai gaw tut nawng
anga nga malit ga law.Amen.
Shanglawt Tsing
(26.12.2012,5:00AM)