Jinghpaw Wunpawng Amyusha Shanglawt Majan

BY: FB KACHIN GROUPS
Jinghpaw WP Mungdan kata e Majan kaba byin nga ai shata(18) na sai .. loi loi hte zim na zawn re shingran kumla ni mung nmu ai sha n-ga majan wan grau grung kaba wa na zawn nga shiga sama ni sha manam mawng nga sai.

Majan ndai a majaw Mungdan kata/shinggan e nga ai Jinghpaw WP amyu sha ni a myit hta .. aru ..e.. gara hku gaw rai na kun lu? Nga nna tsang ai ni nga ai zawn, anhte a majan gaw tara ai majan re majaw Karai Kasang mung lawm, ningbaw ningla ni a woi awn ai lam mung hkrak rai nga sai majaw majan ndai dang nan dang na re .. nga nna kam hpa ai ni mung nga na re… dai hta grau nna nkau gaw “anhte a mungdan hpe gap di la ra ai” nga shinggan kaw nna ta lahpum malu marawn n-gun jaw nga ai ni mung nga na re.

Gara hku mi n-gun jaw jaw ..n-gun jaw ai lam gaw amyu hte mungdan hpe tsaw ra ai lam ni rai nga ai, raiyang tinang amyu sha ni a lawt lu lam hpe kasat da-hpran nga ai amyu sha ni rai nga ga ai hte maren anhte yawng a n-gun jaw shang lawm ai ma-hkra tang du, n-gun grau kaba na matu anhte gyin shalat gaw sharawt nhtawm lahkrip ra ra amyu sha bungli hpe jawm galaw sa wa yang anhte a shatawng shada tawn ai pandung de lawan dik ai aten hta du lu na gaw ga lahtum nshut rai nga ai. Shada nhkrum nra, tarawng tara nlang, masat masa pi nnga hkat ai amyu ni rai ga yang chyawm gaw amyu sha lawt na matu grau shaja, shakut ra na ga ai.

Amyu sha magam bungli ngu ai gaw kaba la nga ai, ap nawng ra ai lam law law hte mayak manghkang law law hpe laidi wa ra nga ai, grin nga sai mungdan kaba ni a shingdu ahtik labau yawng mung ap nawng shakut shaja ai labau hkrai rai nga ai.
Daini na majan gaw moi na KIA/KIO majan hte ram ram shai mat sai, mung masa/ hpyen masa mahkrum madup ni kaw na sharin la wa ai hte maren ya da-hpran nga ai majan ndai hpe “ Jinghpaw Wunpawng Amyu sha majan “ hku nna hkam la tsun shaga ai shara law law rai mat sai. Ndai amyu sha majan gaw anhte hkan tam nna byin wa ai nrai .. simsa lam hpe ra marit ai anhte amyu sha ni a ginra de tawt lai shang kabe sat nat zingri htim shang bang wa ai jasam mung maden hpyen ni a jaw e jahtum chyalai kaga lata na nnga mat ai jahtum e byin wa sai majan re hpe shawng nnan asan sha chye na hkam la ra na ga ai.

Tinang a mungdan e sim sim sa sa nga pra mayu nna gasat ai majan ni mung grai law wa saka ai(dai labau ni hpe laksan ka na nngai). KIA gaw 1961ning kaw nna shanglawt majan hpe woi kasat wa ai hta tinang a tat sum kau ai mungdan hpe bai gasat di la na ngu ai mung masa bandung hte maren gasat mat wa ai raitim hpang daw de mung masa mahkrum madup hte mungkan mungsang mung masa ni hte shingdaw nhtawm jet ai munghpawm hta tinang a gam maka hpe tinang nan hpareng lu ai ahkaw ahkang hpe kaga myen mung ethnic groups ni hte rau Federal mungdan gaw de sa wa na ngu ai mung masa bandung hte lahkam woi sa ai re, raitim mung ginjang amyu myu a jaw e 1985-92 lapran na shanglawt majan ladaw hta awngdang ging ai daram nlu awngdang ai hpe mu chye lu na ga ai.. 1994 ning mung masa simsa lam de du na matu gap hkat ai shawng jahkring na ngu ai masing hte maren gap hkat shazim sen htu nhtawm mung masa bawngban lam ni hpe galaw wa sai .. 1994 – 2008 laman Myen asuya kaw na mung masa bawngban na matu anhte hpe masat ahkyak la galaw ya ai lam nnga, masu magaw sadi run ai sha n-ga 2009 ning hta BGF hpe hkap la na matu Myen Hpyen ni kaw na shadut jahkat shagyeng wa masai .. anhte kaw na mungdan dinghku majan de bai nkam gayin shang wa ai majaw Asuya kaw na jahte tam wa ai lam yawng hpe maram masam let maja hpang wa nga yang Ta-ping Hka Wanjak hte la-kap nhtawm anhte a shawnglam post hpe htim gasat hpang wa masai. Anhte a ningbaw ni gaw myit galu kaba hte simsa ai hku hparan la na matu Northern commander wa hpe astsawm sha tsun jahkrup sai, raitim myen hpyen ni jahkrup ai hpe ahkyak nla majan hpe matut gasat ai majaw tinang KIO/KIA ningbaw ningla ni kaw na mungdan ting na hpyendap hpe Myen tai hpyen ni a majan hpe ninghkap gasat na matu tara shang ndau matsun nhtawm ndai majan hpe ninghkap gasat wa saka ai gaw ya daini shata 18 pi lau jan wa nga sai. Ndai ninghkap majan hpe n kasat shi ai ten kaw na Jinghpaw WP ginra Sinpraw, Sinna, Dingdung hte Dingda yawng na Jinghpaw Wunpawng mung salang ni, hpung salang ni, jawngma ningbaw ni .. hpaji ninghkring ni yawng a ningmu la zuphpawng woi galaw ngut ai hpang dawdan dat ai re majaw .. June 9, 2011 ning kaw na ninggam mi bai hpang wa ai ninghkap majan ndai a laklai ai lam gaw Jinghpaw WP ni a labau hta galoi mung nnga wa yu ai kahkyim gumdin lam hte mung shawa kaw na madi shadaw ai hte kasat hpang wa sai re majaw amyu sha majan hkrang de gale mat wa sai hku re .. dai hta sha n-ga masha n-gun, laknak n-gun shingjawng nmai ai anhte matu hpan Karai a shaman chyeju hpe myitdum hputdi ai hku nna ndai Ninghkap Padang Majan a gabaw hpe mung “ANHTE A AWNG PADANG YEHO WA KARAI KASANG” ngu ai hpe Ningbaw Kaba Lanyaw Zawng Hra kaw na shingteng masat jaw dat sai rai nga ai majaw anhte yawng mu chye nga sai hte maren Yehowa anhte amyu sha ni hte majan pa hta rau rai nga sai gaw shara magup na mau na zawn nga sakse ni hta la-kap nhtawm na chye lu saka ai.

Anhte a Awng Padang Majan hta nang ngai gara hku shang lawm mai na?
1. Kyu hpyi garum ai hte shang lawm na.
2. Tinang lu ai Ja gumhpraw hte shang lawm na.
3. Tinang lu ai aten hte ap nawng na.
4. Tinang lu ai machye machyang hte shanglawm na.
5. Tinang mai byin ai atsam marai hte shang lawm na.
6. Tinang du nga ai shara hta Myu tsaw masa gat hkai shajang na.

Shingrai amyu sha a tsaw htum ai magam bungli hpe galaw sa wa ai shaloi mayak manghkang ni gaw lai nli hkrum wa na re. Tinang hkum nan ga san ni mung law law pru wa na re, ga shadawn:
- KIO/KIA salang langai ngai kaw na matut mahkai tsun shana la taw gaw ..
- Ngai sha tsun ai gaw kadai ahkyak mi nla nhten kun? ngu ai zawn re ga san ni byin pru wa chye ai, kaga ga san ni mung law law pru wa mai nga ai.

Majan wan ndai gaw Tai hpyen wa e nat jahkru dat sai re majaw kade na wa na ngu ai mung asuya a lit she rai sai, majan ndai hpe padang dip mangan shingla kau na gaw anhte a lit rai sai. Mung masa maren mara ahkaw ahkang hte Panglung ga sadi ni hpe asuya kaw na hkrang shapraw masing jahkrat galaw sa wa ai lam nnga, nmu mada ai sha Jinghpaw Wungpawng Amyu sha ni hku nna asuya hpe kalang kam shut kau sai majaw loi loi hte dawdan kam na nrai na ga ai. Majan kaba gasat nga sai majaw mungkan kaw na mediator/peace group langai ngai nlawm ai sha lachyum pru ai bawngban zuphpawng byin wa na ngu ai hpe anhte nkam saka ai. Majan a majaw mung shawa jamjau ai lam teng ai, raitim majan nbyin ai ten hta anhte amyu sha ni a matsan chyaren re lai wa yu sai hpe mung dum ga ai. ndai kalang na mung masa ginjang ndai hta anhte a Bandung rai nga ai Mung masa maren mara ahkaw ahkang nlu dingsa hpang de htingnut ai lam n-galaw na sai ngu kam nngai.

Dai majaw anhte mungdan kata shinggan nga ai amyu sha ni hku nna kadai hpu-awn wa a ga, nsen nna tim du ai shara hta amyu sha ni a Bandung a matu maibyin ai made ap nawng let shakut shaja sa wa ga, jahtum hku nna hpaji jaw dat mayu ai gaw Myen tai hpyen ni a sat nat zingri ai majaw masin pawt nna dawdan tsun ndau ai lam nbyin hkra sadi ra nag a ai, lahta e ngai tsun sanglang wa sai hte maren Federal mungdan masa lam de sa wa ai ten hta “Gap di la na…garan pru na” ngu ai ga manawng ni gaw myit hta rawng tim shawa de ndau ai hku rai yang grai awng dang na lam hpe nlu maram nngai.. Jinghpaw WP 100 hta 99.99 gaw tinang mungdan tinang lu mayu ai ni hkrai re, kam shut na lam nnga ai... Myen Asuya ni nan mung jinghpaw ndai ni gaw separatist ni re ngu propaganda galaw nga ai shaning pi ram ram na nga sai re, dai majaw Myen mung kata na masha wan 40 daram Jinghpaw WP ni a struggle hpe atsawm nchye na ma ai, madi shadaw ai lam mung ningra ai.. Myen asuya nan anhte a n-gup kaw na dai zawn nga law law pru magang kabu magang she rai na hpe asan sha sawn sumru dum let amyu sha magam lit hpe lahkrip ra ra hte lahkam sa wa yang Yehowa jaw ai Awng Padang hpe ninglaw lu na ga ai ngu ngai hkam la ai lam ni hpe n-gun jaw shatsam ga saw dat nngai rai.

Yu Maya Hpyen Magamgun Dingsa
December 19, 2012