Social Democracy gaw Democracy Socialism (Soviet style) n re. Raitim, Capitalism hte Socialism hpe pawng gumhpawn da ai mung masa pinra rai nga ai.
Democratic Capitalism gaw Arang Madu (capitalist) ni hpe tsepkawp ahkaw ahkang hpaw let, wanglu wanglang kadai mung kadai tinang lu galaw ai daram ja gumhpraw tam mahkawng la lu na ahkaw ahkang hpaw ya ai Mung Masa rai nga ai.
Social Democracy hpe kadun hku tsun ga nga yang, "lu ai ni kaw na law law la nna, n lu ai ni hte garan jaw na," ngu ai lachyum re. Asuya gaw shang gumhpraw law law lu ai ni kaw na tax grai law hkra hta la nna, n lu ai ni hpe mung ngasat ngasa madang nau n shai hkra jaw sha ai rai nga ai. Dai hpe welfare state mung nga ma ai. Uropa mungdan ni kaw jailang ai ladat rai nga ai.
Myen Mung kaw jailang mat wa ai "Myanma way Socialism" hkrat sum mat ai gaw Capitalism (Arang Madu) ni hpe tsep kawp ninghkap ai majaw, ja gumhpraw chye tam ai sutdu ni yawng hpe jahprawng kau nna, Mungdan ting matsan mat ai majaw rai nga ai. Nambat 2 Mungdan Majan gaw Capitalism a majaw byin ai majan re majaw, majan ngut ai hpang majan a tsin yam hkrum hkra lai mat wa ai mungdan ni gaw Capitalism hpe grai nan hkrit mat ai majaw socialism ngu ai ideology hpe hkap la wa ai ten rai nga ai.
Raitim, Uropa Mungdan ni gaw dai capitalism hpe n ninghkap ai sha, Socialism hpe mung hkap la nhtawm lahkawng yen hpe kaja ai hku jailang mat wa ai shaloi, awngdang ai Mungdan ni tai wa masai.
Amerika Mungdan gaw Mungkan majan kaw mi lawm wa tim, shi mungdan kata de Pearl Sanghpaw daru (Pearl harbor) hta lai nna, majan a tsin yam dai ram n hkra lawm ai. Dai majaw, Capitalism gaw Amerika a n-gun tai wa sai. American Dream ngu ai gaw, tinang shakut ai hte maren, tinang akyu hkam sha na, tinang gam maka tinang gawgap lu na ahkaw ahkang hpe tsun ai rai nga ai. Dai majaw, nang n galaw yang, majoi joi n lu wa ai.
Uropa Mungdan (welfare state) ni hkan gaw, nang bungli n galaw tim, nang hpe asuya hku nna, nga shara jaw na, lusha jaw sha na rai nga ai. Amerika kaw gaw nang n galaw yang lam makau de du mat chyalu rai nga ai. Lusha chyawm gaw lu sha na ndai, raitim rawng na dum nta du hkra gaw n lu jaw nhten.
Raitim, Uropa kaw gaw, nang grai wa lusu hkra galaw la na n loi nga ai. Asuya ni ahkun (tax) grai law ai. Nang lu la na arang kaji kajaw sha ngam na. Amerika kaw gaw, nang galaw lu ai daram, nang kaw arang ngam mai ai.
Dai gaw, Social welfare state ni hte capitalism ni a shai ai lam rai nga ai.
Social Democracy (Europe) hte Democratic Capitalism (USA) shai ai lam....
