Myen gaw mazut gum shem ai ladat hte nmai jang “Sau” zawn gayun bang nna je hpre diprip, up hkang sha lu na lam tam ding yang re yaw. Nkam yang gaw she la yu mu.
Ndai tsa ban 21 hta gaw, “technology” Jak hpun tang hpaji loi tsaw mat wa sai aten ladaw langai rai nga mali ai. “Technology” hpun tang hpaji tsaw wa ai hte maren shinggyim masha ni a myit sawn shachyaw la ai lam mung pri manen ai hku nna, si mani ai lai jasat hku nna sawn shapraw wa chye nga ma ai. Ndai zawn sawn hpan ladat ni madang tsaw wa ai hte maren pri manen ai hku, hpaji machye machyang lam hta nau wa nhkan shachyut lu ai ni a matu hkrit tsang hpa lam ni byin pru wa nga ai. Ndai zawn hkrit tsang ra nga ai mung kan a pinra hta na mabyin nit sun naw law law nga ai, rai tim ya gaw Myen ni a pri manen ai nsam hte sat lawat hpe anhte myu ni dum nga ga ngu ga saw let loi mi sha pyi lu shadum dat ngu nna yaw shada let Myen jai lang nga ai “Sau” hte seng ai hpe gadun sha mi tang madun dat mayu ai law.
Ya Myen ni lang ai “Sau” gaw gahtet ai kaw mung mai lang, hkru wa ai baw hpan amyu myu kaw mung mai lang re baw sau rai nga malu ai, dai gaw hpa ta? Maw lanyet rai nga mali ai law. Sau gaw hka tsim nmai tsim ai, hka kaw bang dat yang ntsa de waw wa ai baw re, ya myen ni lang nga ai “Sau” gaw hka tsim mung mai tsim ai baw rai nga mali ai.
Dai “Sau” hpe gara kaw lang nga ma ta? NGOs bungli lamang ni, Hpung lam hte seng ai ladat, hpyen masa, mung masa hte seng ai ladat, myu sha ni hpe garan ginghka ai ladat hte bawngring masing amyu myu hkan lang nga ma ai. Ndai lawu na shadum ga hpe tsun jang, ndai laika ka ai wa hpe pawt ai masha law law nga na re ngu kam ai, shadum mayu ai lam gaw NGOs galaw nga ai ni hpe madung shadum mayu ai re, anhte myu ni myit dum ra ai lam hta NGOs galaw ai lam gaw kaja ai lam langai re, NGOs galaw nna myu sha ni a hpaji lam, su hprang lam law law hpe shabyin lu ai re, rai tim nchye galaw yang gaw myu sha lawt lam a matu ahtu hkra wa shangun mai ai lam mung byin wa chye ai ngu tim nshut nga ai. rai nga ai.
Shadum mayu ai lam hta madung hku na Myen jai lang nga ai “Sau” hte anhte Wunpawng sha ni galaw nga ai NGOs bungli hte seng ai hpe sha ading tawk gadun dawk tsun mayu ai lam rai nga ai, tinang a sak hkrung lam hte nga ngwi nga pyaw lam hpe gadai mung tam ai hkrai rai ga ai, rai tim tinang myu sha hpe hpaga zawn shatai kau hkrup ai lam ni hpe n-galaw hkrup na matu shadum mayu ai lam rai nga ai, ndai hku shadum ai majaw laika ka ai wa shut ai lam nga jang ading tawk shadum la marit.
Ndai lam hte seng nna sha matut tsun na n-ngai, lahta na NGOs hte seng ai lam hpe ngai langai a ningmu hpe sha ka shabra dat ai masa nrai nga ai, anhte Jinghpaw mung masa yu maram hte sawk sagawn mahkri shawn hpung hku nna, lai wa sai shaning 2 ning ram tup hkrum jahta San Htai galaw ai masha law law kaw nna ningmu ni gahkyin ai lam ni, lu la ai mabyin masa ni hpe gadun sha mi shalai dat ai lam rai nga ai.
Laika ka ai wa gaw, lai ka ka sara mung nrai, laika hpe aten galu la nna ka ai masa mung nrai, re majaw nshaw nshun nga na re, rai tim hpaji machye machyang nga ai ni gaw sawn ding lik yu nna, ndai laika a lachyum hpe hkawn hkrang na re ngu kam n-ngai. Ndai laika hpe hti yu ai ni a myit hta loi mi nhkra nhkra gaw nga na sai. Rai tim du na aten hta grau nna bai jahpring shatsup ai hku ka lu na matu bai shakut na ga ai.
Tang madun ndau shabra ai
Lashi Yawna
Kachin Politics Watch and Research Network
