Shut taw nga ai shinggyim uhpung uhpawng langai hpe jasu dat ai bungli rai nga ai.
Shinggyim uhpung uhpawng langai a shut taw ai hpe shajaw na bungli gaw loi ai lam n rai nga ai.
Madu Yesu prat hta Yuda htung lailen ni gaw n dum shami Karai Kasang sharawng awng ai hte nhtan shai wa nga ai. Raitim, dai ten na Yuda uhpung uhpawng ting gaw jaw (htuk dum, manu dum taw) ai hku sha shadu nna, hkan galaw nga ai rai nga ai. Dai ten na Yuda uhpung uhpawng hpe woi awn nga ai Tara Jawng Sara kaba ni hpe yu maya masha langai mi ninghkap na ngu ai gaw Si Ari hkrum na re hpe chye da chyalu rai nga ai. Raitim, n tsun n ngut, n galaw n byin ai re majaw, Madu Yesu gaw si hkam nna galaw lai wa sai. Dai majaw mung dai ni anhte ni Madu a si hkam nna jaw da ai Chyeju tara ngu ai asi hpe di sha lu sai n rai ni?
Rawt Malan galaw ai masha shagu gaw machyi hkrum ra nga ai. Tengman ai Rawt Malan Ningbaw ningla ni hta galoi mung asi ngam da ai hpe mu lu nga ai. Inglik hpe rawt malan lai wa ai Mungdan grai law ai raitim Gandhi wa gaw shanhte a Mungdan hpe shanglawt jaw da lu ai hta n-ga, Mungkan shawa hpe mungga law law jaw da lu nga ai.
Dai hte maren American shanchyang ni hpe rawt malan woi ai Martin Luther King mung sat hkrum sai raitim, dai ni Obama zawn re ai shanchyang langai American Gumsan tai wa sai hta n-ga shi a "I have a dream" ngu ai Mungga gaw Mungkan shawa yawng hpe n-gun jaw nga ding yang rai nga ai.
Dai ni anhte amyu ni rawt malan ai mung, Myen Mung, Mungchying shawa yawng hpe Mung Masa law law sharin ya nga ai hpe mu lu nga ai. Federal ngu ai mung Myen mung e n na ga, n sharin ga ai grai na sai raitim, dai ni Myen Amyusha ni law law mu yu, hti yu masai. Human Rights ngu ai mung anhte machyi hkam nna law law tsun kajai wa ai majaw, Myen amyusha ni hti wa masai. Ethnic Rights ngu ai ni mung Myen Mung shawa nkau na ga, hti ga masai.
Ya ten anhte machyi hkam ai aten raitim, lani mi anhte gaw yawng a ninghtoi tai wa na kam nngai.... shakut nga ga law...
Hti shawa yawng hpe Karai Kasang shaman ya u ga....
Rev. Hkalen Tu Hkawng
