Ten shagu myit n-shazim ai sha gasu nga ga, maja nga ga
Ndai aten na Myen hpyen dap a shamu shamawt nga ai masa ni hpe yu jang grai wa masa nhtuk ai kum la ni nga nga ai. Dai kum la ni gaw hpyen majan hpe mi na hta grau nna kalang bai n-gun shadat wa na masa zawn byin taw nga ai. Dai majaw anhte mung kan shara shagu chyam bra nga ai Wunpawng sha ni mung ndai masa hpe mu mada nga chyalu rai na hpe kam ai. Hpyen majan byin shagu gaw anhte maga de grau nna shim lum ai lam hpe tau nau hkyen lajang tawn ra ai lam rai nga ai. Dai shim lum ai lam ngu ai hta hpyen majan a majaw ndang chye tsun tawn ai mayak mang hkang ni hkrum katut wa na lam hpe tsun mayu ai lam rai nga ai.
Hpyen gasu yang sha anhte mung gasu ai hku nre sha, aten shagu gasu nga na grai ahkyak ai ngu nna mu mada nga ga ai. Myit gasu ai lam hta myit mang ra ai lam ni gaw, hpyen majan byin yang tinang hkum tinang lu lit la ai daw hpa rai ta?
Mai gan mung kaw nga tim tinang a sai daw sai chyen ni a matu hpa baw myit na, tsinyam hkrum nga ai ni a shawng lam hte ma kaji ni a matu hpaji lam hpe anhte mung dan shinggan nga ai ni hpa baw galaw ya mai na, Hpaji jaw ai lam mung myu sha magam re, tinang dang di dang dep ai ram hte ja gum hpraw garum ai lam mung myu sha magam re, n-gun jaw ga tsun ai mung myu sha magam re, anhte a mung dan hte anhte myu sha ni hpe makawp maga ya nga ai shawng lam majan hta nga nga ai share shagan ni a matu akyu hpyi ya ai lam mung myu sha magam re.
Anhte myu ni shada da mung masa lam hta mahkrun lam amyu myu hku nna mai madi shadaw hkat nga ai. Shada pawn ba hkat na lit mung yawng hta nga nga ga ai. Dai majaw tinang dang di a atsam hta hkan nna myu sha a lit hpe jawm gun ga.
Awng dang lam a matu yawng hta lit nga ai
Kachin Politics Watch and Research Network
