RAWT JAT AI NPAWT NHPANG

Myenmung shanglawt lu ai shani kaw nna U Nu gaw hkringmang daju byin wa sai. Kade nna ai laman, Wunpawng Myusha ni rawt jat wa ai gaw makam masham lam hta npawt nhpang rai nga ai hpe mu chye ya ai majaw ladat amyu myu lang nna Christian makam masham lam hpe jahten sharun wa sai. Lani mi na nhtoi hta U Ne Win gaw shi a hpang hkan masha ni hpe hpa majaw KIO rawt malan hpung gaw aten kadun laman kaba rawt jat lawan loi ai kun! nga nna san wu ai. Mahtai:- Shanhte amyu hta kahkyin gumdin lam ngangkang ai majaw re nga ai. Dai kahkyin gumdin lam a npawt nhpang gaw gara kaw rai kun, nga nna matut san wu ai. Mahtai:- Christian makam masham lam hta re, nga ai. Dai shaloi Ne Win gaw pawt ai nsen hte, “Dai makam masham lam hpe n-gun jaw dat mu” nga ai.

Dai hpang kade nna ai laman Myitkyina kaw makam masham lam hta dumbru dumbra byin hpang wa sai. Matut manoi bai na lu ai shiga gaw, Hkalup hpung ni hpe n-gun jaw yang aloi sha hkap hkalum la ya ma ai. Raitim Catholic ni hpe n-gun jaw yang n hkap la hkraw ma ai lam shiga pru wa sai. Dai hpang kahtawng shagu hkan church myu langai kaw na myu 2-3 jat bra wa nna dinghku langai kaw na kanu kawa kashu kasha ni gaw nbung ai nawku jawng de kaga ga sa nna dinghku masha ni gaw makam masham lam hta ayai aya byin wa ai hta n-ga, nye a Karai Kasang gaw na a Karai Kasang hta grau kaja ai, nga nna dang rang hkat wa masai. Ndai zawn rai hten run wa ai gaw satan wa a majaw re lam tsun dan yang kadai mung n kam ya ma ai. Shada layung madi nna dang rang hkat ai hpe sha mu wa saga ai.

Ngai gaw htinggaw 14 shanu nga ai Kutkai ginwang, Nawng Heng kahtawng kaw shangai wa ai re. Kahtawng ting nat jaw jau ai ni hkrai rai ga ai. Nta shagu kaw nat myu langai kaw nna myu 4-5 jaw jau ga ai ratim htinggaw langai hte langai kaw jaw jau ai nat amyu n bung ma ai. Kahtawng kaji langai kaw dai daram amyu law ai nat ni hpe jaw jau ma timung, nye a nat gaw na a nat hta grau kaja ai nga nna dang rang hkat ai galoi mung n na yu ai. Shing rai dai nat jaw kahtawng masha ni gaw kahkyin gumdin lam hta ngangkang ai ni rai wa masai. Raitimung dai kahtawng masha ni a prat hta rawt jat ai lam n lu yu ma ai rai nna satan wa gaw shanhte hpe sa jahten sharun ai lam galoi mung n galaw ma ai.

Yehowa Karai Kasang gaw anhte Wunpawng Myusha ni hpe Christian Sasana jahtuk ya ai marang e, hpaji hkaja la lu nhtawm sari sadang mi arawng rai mungkan kaw chyam bra wa lu saga ai. Shing rai satan gaw Wunpawng Myusha ni hpe jahten sharun kau lu na matu mungdan kata kaw mung, maigan hkan e mung ladat myu hkum sumhpa lang nna makam masham lam hta jahten sharun wa sai.

Mabyin masa a shingdu lam hpe hkaja yu ai shaloi satan gaw hpung masha shada shatan hkat na matu mahkrun jahtuk ya ai. Dai hpang ga li ga law byin shangun sai. Makam masham hpung shagu hta Ginjaw lu ai ni hkrai re. Manghkang lama ma byin wa shagu shut dum ai wa gaw seng ang ai shi a Ginjaw de kalang ta tang madun dat sai. Ginjaw kaw na dang rang hkat ai lahkawng maga na masha ni hpe atsawm jep sagawn nna pri nem ai ladat hte hparan ya na malai, maga mi de shanang nna dawdan ya ai marang e, manghkang grau kaba wa sai. Hpang jahtum dai uhpung hta mungdan kata kaw mung, maigan de du nga ai ni hta mung myusha lam yan a kahkyin gumdin lam hta mung hten run wa magang sai.

Raitimung uhpung nkau a uphkang ai policy gaw shara mi kaw manghkang byin nna tang madun ai lam nga wa jang, maga mi de na sumtang hpe kam nna daw dan ya ai ladat n lang ai sha, committee hpaw nna lahkawng maga a mabyin masa hpe atsawm jep sagawn yu nhtawm lapran kaw ading sha tsap let daw dan ya chye ma ai. Shing rai lahkawng maga a manghkang hpe aten dep shading sharai ya lu ma ai rai nna satan a masing gaw Madu Yesu a hpang kaw hkan gunglau ai satan zawn, sum ai mahtai hte hpungdim dat kau ra manu ai.
Uphkang chye ai hpaji ninghkring ni gaw makam masham lam hta sha n rai, mungmasa, hpyen masa, sut masa zawn re ai shada dun hkat nga ai uhpung ni yawng hta asung chye jashawn ma ai rai nna myusha lam yan hta rawt jat maden zinghka wa na lam ningmaw kaba de woi awn sa wa chye ma ai. Shanhte gaw kaning re ai bungli galaw hpang na raitimung Christian makam masham lam hta npawt nhpang tawn nhtawm, Philosophy of Christianity hpaji mung azin ayang hkaja tawn ai ni rai ma ai majaw satan wa sa gunglau na hpe mung tau nna malawm magawm myit tawn chye ma ai. Shing rai shanhte gaw shara hte masa hta hkan nna tengman tara ai lam, kaja ai lam hte htaphtuk ai lam ni hpe jahtuk lang chye ma ai. Hpa majaw nga yang, shara nkau kaw tinang a matu tara sai, kaja sai ngu yang, kaga masha ni a matu n kaja, n tara nga ai. Raitim htaphtuk ai lam gaw kade wa mi n tara, n kaja timung, lahkawng maga a matu htaphtuk nga sai majaw hkap la mai nga ai.

Satan wa matut galaw sa wa nga ai masing ni hpe maram yu yang Buddhist hte nat jaw jau ai ni hta lai nna kaga makam masham hpung ni hpe ndum shami shabyawng kau lu na matu shakut nga ai. Ndai masing gaw matse ai ladat hte shadik shatup yu yang awngdang ai mahtai n lu wa ai U Nu a masing malai, sasana hkringmang dap kaw nna si mani ai zai ladat hte kaja na zawn re ai tara lang let n dum shami gunglau la lu na matu rai nga ai. Pri-nem ai hte awngdang lam lu wa na matu KBC npu na hpung shang shada ninghkap hkat shangun ai marang e, satan a yaw shada tawn ai lam gaw adaw achyen awngdang wa magang sai.
Hkungga kamhpa ai nu wa hpu nau ni jawm myit dum nga chyalu rai sai. Satan gaw anhte a kahkyin gumdin lam hpe jahten sharun nga ai majaw shi hpe pawt singdawng mara shagun na kun? Grau pawt magang myit masin hte baw nu hpe grau hkanu wa shangun magang re ai majaw asum maga de shanang wa nna anhte a myusha lam yan hta grau sum machyi wa na sha re. Satan gaw anhte hpe jahten sharun na matu lit nga ai hte maren shadik shatup nga sai. Anhte a lit gaw satan hpe pawt nga na malai, Yehowa shaman ya ai mungdan hpe anhte nan uphkang lu hkra shakut sa wa na matu re. Ndai zawn re ai masing hta makam masham lam a npawt nhpang rai nga ai ginjaw de na uphkang lit hkam ni hte shawng lam de du hkawm nga ai mungchying sha ni a lapran kaw chye na myit tau ya hkat ai lam nga na matu na chying ahkyak ai. Maga de na ni myit tau ya chye timung, kaga maga de ning ra nga ai rai yang, satan a gunglau ai shangwang kaw na lawt lu na matu yak nga chye ai.

Bum lang hkaraw pa layang mare kaba hkan e shanu nga ai nu wa hpu nau ji nban hkum shagu gaw myusha lam yan hta shang lawm apnawng nga ai ni hkrai rai nga sai. Dai n-gun ni gaw dumbru dumbra n byin mat u ga, kahkyin gumdin ai Yehowa a hpyen luksuk tai nhtawm lahkrip ra ra lahkam sa wa ai kaw lawm shajang nga na masai ngu kam dat ai law.

JJ Lum Dau

By: JPKS