Ya ten Srm. Bawk Ja gaw America e manu mana shagrau sha-a hkrum nga ai lam hpe, Jinghpaw Mungdaw wungyichuke Lajawn Ngan Seng gaw wa she makrim hkra manawn taw nga ai lam shiga na chye lu ai, Dai sha n-ga, Srm. Bawk Ja du wa jang, hkap rim na masing mung hkyen da nga ai lam chye lu ai. Buga de na myitsu langai tsun wa ai hta, Lai sai KSPP register n lu mat ai mung, Lajawn Ngan Seng hte Hkyet Hting Nan a majaw re lam asan sha mu lu ai hku re. Dai ten hta KIA Dapba (2) B.C Du Kaba Nwanghkang Awng Seng La gaw, Hugawng Danai ginra na KSPP kasa hku ra lata poi shang na hkyen ai re. Lajawn Ngan Seng mung Hugawng Danai ginra na hkanghkyi hku shingjawng na hkyen sai re. Du Kaba Awng Seng La hpe gara hku mung dang na masa n nga ai hpe chye jang, KSPP hpe register n hkrat hkra dingbai dingna jaw kau sai re.
Srm Bawk Ja mung, du na ra lata poi hta Hpakant hku shang shingjawng yang dang na sha re. Dang nna Wungyi byin wa jang, Lajawn Ngan Seng a matu hkrit hpa ju shingna tai wa sana re. Dai majaw, hka nam de na sagu kasha hpe, hka hku de na chyahkyawn gaw, hka hkanu ya ai ngu hka jun ai maumwi zawn tai wa sai re. Srm. Bawk Ja hpe rim na mara gaw, mungmasa mara hpa n nga ai. Moi Srm. Bawk Ja mungmasa garai n galaw ai ten hta, Hugawng Nambyu e tsi seng langai hpaw lai wa sai. Mare kaba hte tsan ai maw ginra re majaw, machyi masha ni hpe tsi mung htu ya sai lam chye lu ai. Masha langai mi gaw, Srm. Bawk Ja tsi htu dat ai hpang, nhtoi tsawmra na ai shaloi, kaga lam lama ma a majaw, si mat sai. Dai hpe Srm. Bawk Ja tsi htu sat ai, ngu ai hku mara rim na hkyen da ai lam chye lu ai. Ndai gaw mala la hpyang ai jasat nan re. Lajawn Ngan Seng hte ni kahtep ai Jinghpaw salang ni law law wa, dai zawn maw mawn nga ai lam hpe dawm kau na matu ram ram hpaji jaw shadum ai shiga mung na lu ai. Dai hku galaw dat yang, Srm. Bawk Ja gaw hpa n byin nna, Lajawn wa mahtang mying hten kaya hkrum na re, ngu nna shadum dingyang gaw rai nga ai lam chye lu ai. Ganawng hkrum ai wa gaw n kadang ai sha, ganawng ai wa mahtang kadang na ra ai, ngu sadi jaw nga ai shiga mung na lu ai. Hpa mi rai tim, Srm. Bawk Ja hku nna mung, ju shingna hpe tau nau mu mada let tsun shaga htai hparan na ladat tam shajin da lu yang kaja na hpe sawn mu ya ai, nga nna Jinghpaw Kasa de tsun shana lai wa ai.
By : jinghpaw kasa
