Majan shiga ni

MARE SHALANG NI HPE MYEN HPYEN NI RIM LA

March (16) bat Manga
Wunpawng Mungdan Shanglawt Asuya KIA Dap Ba (2) npu Dung (5) ginra, Nawng Gam mare na Mare Salang rai nga ai (ေနာင္းဂမ္ေက်းရြာ ဥကၠဌ) Slg. Mali Tang, Slg. Nshu La Hpri, Slg. Labya Tu ni hpe myen hpyen asuya Dap hka-la-ya (121) Dap Up ဒု-ဗိုလ္မွဴးႀကီး ခင္ေမာင္ေအး kaw nna, March (5) ya shani mara kata rim woi mat wa nna, adup zingri nhtawm, Man Maw de woi mat wa ai lam shiga na chye lu ai.

Dap Dung (5) ginra ေရႊျငိမ္းခ်မ္းေက်းရြာ hpe mung myen tai hpyen ni hku nna, Wunpawng Mungdan Shanglawt Asuya Masat (5) Dap Dung hpe garum jaw ai ngu nna, Mare hpe jahten sharun, shabra kau na ladat tam, maw mawn nga ai lam mung na chye lu ai.
------------------------

GANG DAU YANG KAW GAP

2012 ning March (16) ya shani hkying (9:20)am aten kawn hkying (9:45)am aten laman, Hk.M.Y Masat (389,390), Hk.L.Y Masat (260) Dap na n-gun (200) daram, Gang Dau Yang Gaw Sharawt Rung, maga kaw du nga ai rai nna, KIA Masat (255) Dap Nawng Dap Dung na hpyen hpung ni hte gasat poi byin ai lam chye lu ai. Gasat poi byin ai shara hta lahkawng maga de na si, hkala hkrum ai lam atsawm n chye lu ai.

Ya ten, KIA Masat (5) Dap Ba ginra, Gang Dau Yang maga, myen hpyen n-gun (500) daram du nga ai rai nhtawm, hpyen n-gun htu kahtap nga dingyang re lam hpe mung chye lu ai. By: Kachinnet

----------------------------
Pang Hkawn Yang Lawu Kaw Shani Shagu Gasat Poi Byin.
2012 ning March (16) ya shani hkying (9:00)am aten kawn hkying (9:30)am aten laman, KIA Masat (2) Dap Ba ginra, Pang Hkawn Yang lawu kaw du nga ai, Myen Hpyen Dap, Hk.L.Y Masat (121,141,274) na pawng hpawm hpyen hpung ni hte KIA Masat (5) Dap Dung na hpyen hpung ni gasat poi byin ai lam chye lu ai.

Ndai ginra hta gasat poi shani shagu matut manoi byin nga ai rai nna, gasat poi byin ai shara hta lahkawng maga de na si, hkala hkrum ai lam atsawm n chye lu ai.
------------------By: Kachinnet

MYEN HPYEN DU GAYA PAWT PAWT NA SINAT GAP

March (16) bat Kru,
Jinghpaw Mung, Sinbo myen hpyen dap hka-la-ya (141) Dap Up Lt.Col Soe Thu Ya gaw Wunpawng Mungdan Shanglawt Asuya Masat (2) Dap Ba n pu Dap Dung (5) Ginra Pang Hkawn Yang hpe wa htim gasat ai hta shi a hpyen hpung ni si/hkala ai law ai hte Dung (5) Pang Hkawn Yang hpe n lu zing madu ai majaw ma-pa-hka kaw nna a hkyak la na matu shi a dap Sinbo de n htang wa kau shangun ai hpe myit n gut gaya hkrum ai majaw March 13/14/15 (3) na tup shi a dap kata na n'ta (3) hpe sinat kaji kaba hte gap nna jahten kau ai lam na chye lu ai.
Dai mabyin hpe KIA ni sa gap ai re ngu shi a n'tsa de tang madun nga ai lam mung chye lu ai. KIA kaw na gaw htim gasat majan tsep kawp n galaw ai hte tinang Dap Ginra hpe makawp maga ai hkap hkam majan sha galaw nga ai lam mung chye lu ga ai.
By: JPKS