Rohingya ni gaw KIO ginra kaw hpyendap wa jung na matu Col. James Lum Dau hte jahkrup ma ai lam ndai laman Youtube kaw pru wa ai hpe jawm mu wa saga ai. Dai lam a mabyin masa gaw lawu kaw sanglang tawn ai hte maren re.
Laning mi daram na mat wa sai lani mi na nhtoi hta shiga dap langai kaw na salang wa gaw shi a nta kaw buga de na Hpung Sara langai du nga ai majaw shana shat ma mi rau sha na matu ngai hpe saw shaga dat ai. Shi a nta kaw du ai shaloi manam marai 7-8 daram hpe mu nngai. Yawng gaw Arakan de na Rohingya ni rai nna, nkau gaw Malaysia kaw nga nna nkau gaw Thai kaw nga ai ni rai ma ai lam shachyen ya ai. Dai Rohingya ni gaw shanhte amyu ni hpe Myen asuya kade zingri sat nat ai lam galu galang tsun dan wa ma ai. Dai zawn re ai a ntsa kaw ngai gaw gara hku hkam la ai lam san wa ma ai.
MAHTAI:- Gen. Ne Win tsun ai hku rai yang, masha myu n bung, htunghking n bung ai Myenmung masha yawng hpe shabyawng kau lu ai hpang yawng gaw myusha langai maga de gale mat na re. Dai shani kaw nna shada ginhka dang rang hkat na lam n nga na sai. Dai shaloi Myenmung gaw ngwi pyaw simsa ai mungdan byin tai wa na re. Dai masing awngdang wa lu na matu hpyen asuya gaw ladat myuhkum sumhpa lang ra na re nga ai. Shing rai hpyen asuya gaw shi yaw shada tawn ai pandung de du wa lu na matu nanhte tsun sanglang dan ai hte maren, ladat myuhkum sumhpa lang wa sai. Lachyum gaw shing re ai yaw shada lam awngdang wa lu na matu nanhte tsun ai hte maren mungmasha ni hpe zingri, sat nat, yi sun hkauna ni zing la ai lam amyu myu galaw nga ma ai.
Maga mi de bai yu ga. Anhte rawtmalan hpung ni hte mungmasha ni hta mung lu ging ai ahkaw ahkang lu wa na matu htap htuk ai masing lang nna ahkyak jawm la na matu anhte yawng a lit re. Rai yang anhte galaw ra ai lit hpe jawm galaw saga ta? Rai n-galaw ga ai. Dai majaw Myen asuya hpe mara shagun nga na malai, tinang a mara hpe hkam la nhtawm gram sharai la na atsam nga ga yang gaw rawt jat wa na ga ai majaw tinang hta lit nga ai hte maren shadik shatup sa wa ra ga ai, ngu tsun nngai.
Dai Rohingya ni gaw KIO ginra kaw shanhte a hpyen hpung tawn na matu ahkaw ahkang n hpyi ma ai. La ma hpyi shawn wa timung, tinang hku nna dai zawn re ai lam jahkrup na matu lit n nga ai. Ndai lam hte seng nna sung sung myit yu ai hpu nau kadai raitimung, lawu na lam ni hpe asan sha mu lu na re. Rohingya ni gaw shanhte hte ningmu n bung ai, makam masham lam n bung ai ni kaw shanhte a hpyendap tawn na matu shara hpyi na n re. Dai majaw Muslim ni tawn da ai policy hpe ninghkap kau nna KIO hpe garum hpyi na lam n nga ai.
Raitim Myen asuya a matu gaw, policy hku n byin mai timung, ta tut hta byin mai hkra galaw la ai masing ni law law nga wa sai hpe jawm mu wa saga ai. Masha nkau a matu gaw policy hpe ahkyak n tawn ai sha, masha langai ngai, shing n rai, media kaw pru wa ai shiga hpe mahtang teng ai, n teng ai hpe n myit yu ai sha kam kau chye ma ai. Shing re ai mabyin masa a majaw Myen asuya gaw sumprat hpe laknak kaba shatai nhtawm mungmasha ni hte rawtmalan hpung shagu ngu na daram hpe dumbru dumbra galaw kau lu nga ma ai.
Grup yin a mabyin masa hpe maram yu yang, rawtmalan hpung ni hte mungmasha ni gaw asuya a ntsa mara amyu myu shagun nga ma ai. Dai zawn re ai ten hta asuya gaw ahkaw ahkang la nna rawtmalan hpung ni hte mung masha ni a ningmu hpe maga ga de shayawng dat lu na matu htaphtuk ai mahkrun tam ra manu ai. Shing rai shaning hku dingsa mat sai nam-up hpe aran shapraw la nhtawm aten dep asung jashawn ma ai hpe jawm mu la saga ai rai.
JJ Lum Dau
BY JPKS
