Sunday, May 27, 2012

MYITKYINA ZUPHPAWNG HTA THEIN ZAW BAW SIN

26-5-2012, Bat (6) ya shani,  Myitkyina mare, Myodaw Gawknu e galaw ai U Thein Zaw hte Hpung ni woi awn ai zuphpawng hta, Jinghpaw Mungdaw Asuya Hpung ni, Jinghpaw Mungdaw Rapdaw Kasa ni, mungchying sha amyu bawsang htunghking kasa ni, Asuya magam dap shagu na du salang ni, Myitkyina mare na mare wuji wukam hkyeng sai mare kanu kawa ni yawng hpawn 500 hta n yawm ai sa du hpawng de ma ai lam chye lu ai. Zuphpawng a ga baw gaw, Mungdan simsa lam ngu ai rai nna, du sa ai du salang myitsu ni kashun kashe rai nna, simsa lam ga baw a ntsa jawm tang shawn ai lam gaw,
      
(1) Mungdan a gaw da ai tara ra rawng gawng kya ai a majaw, simsa lam n lu ai re. Kanang na simsa lu na! (Sut Nau)
      
(2) Jinghpaw Mungdaw mungchying sha ni a kata sumprat dawk sai garan ginhka ai lam galaw ai; Lisu hte Rawang hpe Jinghpaw Wunpawng sha (Kachin) n re ai zawn laksan garan nhtawm, hkringmang salang sharawt da ya ai. Ya Lhaovo ni mung dai baw laksan ahkaw ahkang hpyi shawn wa ai lam nga ai. Kanang na simsa lu na!  (Sut Nau)
      
(3) Jinghpaw mung e pru ai lungseng hpe, Jinghpaw hpaga la ni Naypyidaw de she sa mari la ra ai lam nga ai. Sut masa ahkaw ahkang mahkra hpe Naypyidaw hte ni kahtep ai masha lachyawk mi sha hkam sha lu ai. Kanang na simsa lu na! (Ra Wang Jung)
      
(4) Jinghpaw Mungdaw Asuya, Hkringmang Du (Wungyi) mying ai ni hku nna, magam gun langai, jawng sara langai hpe pyi bungli jaw lu ai ahkang n nga ai. Mahkra gaw Naypyidaw kaw nna hkrai jum tek tawn ai. Kanang na simsa lu na! (Wungyi Hpauyam Bawk Ja)
      
(5) Daini na zuphpawng ga baw gaw "Mungdan Simsa Lam" nga ai raitim, simsa na hku n woi galaw yang, kanang na simsa lu na! (Sam Slg. Langai)
     
(6) Simsa lam byin lu na gaw, mung shawa a lit n rai; KIA ni a lit n rai; Asuya ni nan kanu kawa myit n rawng yang; masin sha a machyu nga yang, hpyen n-gun sha htu lung nga yang, kanang na simsa lu na! (Lahtaw Tsin Awng)
     
(7) Mungdan ting amyu sha ni mahkra ramra ai ahkaw ahkang lu ra ai nga tim, daini Asuya Hpyendu Jawng hta Jinghpaw ma (Thai-yin Thar) ni hpe n hkap la ai. Shawng kaw nna galaw nga sai ni hpe mung dawm kabai kau ai. Kanang na simsa lu na! (Pyi Hkaing Hpyu)
      
(8) 1948 ning Munghpawm mungdan shanglawt lu ai hte, gumlau rawt gasu wa yang, Sama Duwa Sinwa Nawng woi ninghtan dat ai  Kachin Rifles ni a majaw sha hkaraw de hkrat na ri ri kaw na hkyen la sai re. Dai labau pyi n chye; dai labau hpe malap, kam ai hku htai lai nga yang, kanang na simsa lu na! (Myen Salang, Tara Kasa Usa langai)
      
(9) Mung masa la ni hpe she lata sharawt na malai, mung masa galaw sha ai ni hpe mungdan up na matu lata sharawt hkrup jang gaw,  kanang na simsa lu na! (Duwa Lamung Gam)
     
(10) Manghkang langai hparan na rai yang, Tara Shawn hte Tara Hkam yan hpe hkrai dang rang hkat shangun yang, ngut lu na n re. KIA hte Asuya a lapran e, tsun hparan ya na salang hpung nga ra ai. Dai n rai yang kanang na simsa lu na! (Nhtunghka Naw Sam)
    
(11) Daini Myitkyina e wan n lu ai gaw, Buga ni a Malee wan hka hkyet ai majaw re. Ya Chihpwi de Hydropower kaba ngut da sai.  N simsa ai majaw n lu shalet la ai sha re. (Lajawn Ngan Sang)
     
(12) Asuya ngu ai ni, KIO hpe gasat taw nga ninglen, KIO ni galaw da ai Malee wan sha lang taw nga ai gaw, htap htuk nga a ni? Ladat n jaw yang kanang na simsa na!  (Nhtunghka Naw Sam)

Lahta na ga hkaw ni gaw, sumtsan shiga na lu ai kadun kadaw sha re. Galu galang  hpe a ngwi matut na lu na re lam chye lu ai. U Thein Zaw hku nna shawng de na mahkrum madup n rai mat ai majaw, ram ram mau kajawng let, kashawt ai hpe dung shanawng ai hpa, tsun jahtuk shapyaw la wu ai lam shiga na lu ai rai.

Sumlut Naw, Pang Madi