(6) LANG NGU NA KNO GINJAW HKUMRA ZUPHPAWNG NDAU LAIKA

(6) LANG NGU NA JINGHPAW WUNPAWNG AMYU SHA HPUNG A GINJAW HKUMRA ZUPHPAWNG NDAU LAIKA 21st May 2012 1. Jinghpaw Wunpawng Amyu Sha Hpung a [6] lang ngu na ginjaw hkumra zuphpawng hpe May 19th ya shani kaw nna 21st ya shani du hkra awngdang ai hte galaw la lu sai. 2. Jinghpaw Wunpawng Amyu Sha Hpung Ginjaw hkumra hpawng hta USA, UK, Japan, Malaysia, Australia, Canada, Thailand hte Denmark mungdan na dat kasa ni yawng tang shawng ai lam ni hpe bawngban sa wa lu saga ai. 3. Amyu Sha lawt lu lam hta Jinghpaw Wunpawng Amyu Sha Hpung hte Wunpawng Mungdang Shanglawt Hpung rau bungli jawm galaw sa wa lu na matu Jinghpaw Wunpawng Amyu Sha Hpung Ginjaw datkasa hpung hpe dat nna Wunpawng Mungdang Shanglawt Hpung Ginjaw komiti hte bawngban sa wa na lam dawdan sai. 4. Jinghpaw Wunpawng Amyu Sha Hpung / Jinghpaw Wunpawng Amyu Sha Kongsi Ginjaw magam gun nnan ni hpe jat, shatsam hte sharai ai lam ni galaw la lu saga ai. 5. Wunpawng Mungdang Shanglawt Hpung Ginjaw kaw nna, mung masa manghkang hpe shawng hparan nna sha, Myen asuya hte simsa lam la na ngu ai, mung masa lam yan hpe madi shadaw ai. Tara ai majan hta shanglawm nga ai myutsaw share shagan kaji, kaba ni yawng hpe ja ja arawng la, madi shadaw ai lam ndau ai. 6. Myen asuya kaw nna woi galaw sa wa na lam; (a) Gaphkat jahkring na, (b) Matut mahkai rung hpaw na, (c) Buga gaw sharawt na, (d) Mung masa bawngban na lam hpe gaw aten masat da ai lam nnga ai sha, shanhte Myen asuya a mungdan rapdaw kata hta shaga na, ngu ai lam ni hpe Jinghpaw Wunpawng Amyu Sha Hpung kaw nna tsep kawp n’hkap la lu ai lam ndau ai. 7. Myen hpyen a majaw ru yak jam jau hkrum nga ai hpyen yen tsinyam ni hpe Jinghpaw Wunpawng Amyu Sha Hpung kaw nna ladat amyu myu shaw let garum nga ai zawn, matut nna garum sa wa lu na matu dawdan ga ai. Jinghpaw Wunpawng Amyu Sha Hpung Ginjaw Hkumra Zuphpawng Lancaster Conference Suite Brunel University, London