Khon Ja
KIO ရဲ့ ဥက္ကဌဟောင်း ဗိုလ်ချုပ် မလိဇွပ်ဇော်မိုင် ဒီမနက် ၅း၃၀ မှာ အာရှတော်ဝင်ဆေးရုံမှာ ဆေးကုသ ခံနေရင်း ခရစ်တော်ထံပါးမှာ အိပ်ပျော်သွားပါတယ်။
၂၀၀၀ ခုနှစ်မှာ မေတ္တာဖောင်ဒေးရှင်းက ဘက်စုံပိုးမွှားထိန်းချုပ်ရေး စိုက်ပျိုးရေးသင်တန်းကျောင်း ဖွင့်ဖို့ pilot project ကို မြစ်ကြီးနားမြို့ အူဗျစ်ကျေးရွာ အ၀င်နားက လယ်ကွယ်နဲ့ ကုန်းစောင်းလေး တခုကို ငှားပြီး သင်တန်းသာ ၃၂ ဦး (အမျိုးသမီး တဦးတည်းသာ ပါ)၊ သင်တန်းဆရာ ၄ ဦး (အားလုံး အမျိုးသား) နဲ့ စီမံကိန်း တာဝန်ခံ ကျမ တယောက်တို့ ပါဝင် အကောင်အထည် ဖော်ခဲ့ပါတယ်။ အဲဒီအချိန်က လူပျို လူပြို ပတ်လယ်ဝိုင်းပြီး လယ်ကွက်ထဲမှာ တဲထိုး သင်တန်းလုပ်နေချိန်မှာ ဗိုလ်ချုပ်ဇော်မိုင်ဟာ ကြုံရင် ကြုံသလို ၀င်ရောက် အားပေးစကားပြောကြားပါတယ်။ တခါတလေလည်း ကြိုတင်အကြောင်းကြားထားမှု ရှိသလို တခါတလေလည်း အခြား ကိစ္စများနဲ့ ဖြတ်သန်းသွားရင်း ကြုံရင် ရင်းရင်းနှီးနှီး ၀င် နှုတ်ဆက်ပြီး ကျမတို့ ပြောသမျှ ကိုလည်း နားထောင်ပေးခဲ့သူ ဖြစ်ပါတယ်။
KIO ရဲ့ အမြင့်ဆုံး ရာထူးရှိ အကြီးအကဲ တဦးအနေနဲ့ လယ်ကွင်းထဲမှာ ရွှံ့တွေ ဗွက်တွေ နဲ့ စိုက်ပျိုးရေးသင်ယူနေကြတဲ့ တောင်သူလယ်သမားအုပ်စုတွေကို မမေ့မလျော့ ၀င်ရောက်အားပေး အသိအမှတ်ပြု နားထောင်ပေးခဲ့တာဟာ တဖွဲ့လုံးအတွက် အားတက်စရာ ကျေးဇူးတင်စရာပါ။
အဲဒီအချိန်တွေမှာ အမျိုးသမီး ငယ်ရွယ်သူ ခန္ဓာသေးကွေးသူ တဦးအနေနဲ့ ခေါင်းဆောင်အဖြစ် အသိအမှတ်ပြု ခံရဖို့ဆိုတာ အတော်ကြိုးစားရတဲ့ အချိန်ကာလ ဖြစ်ပါတယ်။ အဲဒီအချိန်ကတဲက ကျမကို အသိအမှတ်ပြုပြီး လေးလေးစားစား ဆက်ဆံ အားပေး အကြံပေးခဲ့တဲ့ ကချင်ခေါင်းဆောင် နဲ့ တွေ့ဆုံခွင့်ရတာဟာ ကျမအတွက် blessing တပါးပါဘဲ။
ဗိုလ်ချုပ် ကျန်းမာ အသက်ရှင်စဉ်မှာ အချိန်ပေးပြီး သွားရောက်တွေ့ဆုံ ဂါရ၀ပြုမှု မလုပ်ခဲ့တဲ့အတွက် နောင်တရပါသော်လည်း ခွင့်လွှတ်မယ်လို့ မျှော်လင့်ပါတယ်။
ဒီနေ့မှာ အမျိုးသမီး နဲ့ လယ်သမားများကို အသိအမှတ်ပြု အားပေး ခဲ့တဲ့ ခေါင်းဆောင်ဟာ ငြိမ်သက်ခြင်းရဲ့သခင် ခရစ်တော်ထံပါးမှာ ငြိမ်းချမ်းစွာ အိပ်ပျော်သွားပြီ ဖြစ်ပါတယ်။
