Thursday, October 12, 2017

KBC Sasana Majen Je Shakut Shaja Lai Wa Sai Mungchying Sara Kaba Ni


Sara Kaba Rev. Dr. Maran Ja Gun tsun ai “Ningbaw Ningla langai mi a lam bai myit dum ai ngu ai gaw lachyum grai sung ai. Hpa majaw nga yang MYIT JASAT HKRINGHTAWNG jaw da ai majaw rai nga ai.” Anhte Jinghpaw Wunpawng sha ni hta mung Sasana majen je shakut shaja lai wa sai mung chying sara kaba ni law law nga lai wa sai. Dai ni ban prat nnan hta matut nna sasana hkringhtawng shachyaw lu na matu hte n gun bai la let sasana magam hta n gun dat sa wa ra nga ga ai. 
Dai re ai majaw Tsawra ai myit hte teng man ai ga hpe tsun nga let Dinghku Sasana kaw nna Maigan de, grau nna Kachin Diaspora missions hpe aja awaq majen je let Maigan du KBC hpung masha ni hpe zinlum ai masing kawn Maigan mungdan shara law law de Hkristu a sakse ni tai sa wa na aten rai sai. 
Rev. Lashi Naw
Rev. Lashi Naw gaw Manmaw mare Roberts sasana jawng sara re. 1917 hta lata mara hpung up hkam la nna Sasana sara ni e shangun ai hte maren Manmaw nna Sam mung Nbaw de sa nna majen je sai. Manmaw nna Namhkam du hkra kasha 2 hpe hkap hta hpai lang, sarajan gaw hkyep din pyi ndin ai sha lagaw hte (6) ya hkawm rai, sasana majen je hpang wa sai. Nbaw kaw laika sharing jawng mung hpaw hpang sai. Hkamkaja lam (tsi) hpaji lam hta mung woi awn rai nna makau grup yin mare kahtawng ni law law nat kau nna hpung shang wa sai. . Shi a shakut ai a majaw masha law nat kabai kau nna Yesu hpe tinang a hkye Madu ngu hkap la wa sai. Hpung masha ni law law hte kashu kasha ni hpaji chye nna galu kaba wa masai.
Rev. Labya De. 
Rev. Labya De gaw Nam Hkam mare kaw na rai nga ai. . Maymyo hpyen dap Jinghpaw seng kaw lani mi Lap mi lu nna bungli galaw nga ai kaw nna sara Hanson e shaga ai hte Namhkam kaw Dr. Hanson hpe Jinghpaw Chyum laika gale garum ai. Namhpaka de No. II mungkan majan ngut ai hpang Oct,1945 hta jawng wa hpaw nna sasana majen je sai hta grai awng dang sai. Jinghpaw Wunpawng ni law law hpung shang nna mi hpaw sai hte shi a kashu kasha ni mung hpaji chye, masha kaba byin wa masai.
Rev. Nhkum Zau Mai. 
Namhkam makau na Oilaw bum (Sinli du hte seng ai bum) na Kawng Lung du kasha re. Manmaw hte Namhkam jawng ni hta lung nna sara tai jawng mung awng la sai wa re. Sarajan gaw sam num re. 1919-ning hta Mungmau de jawng hpaw hpang nna majen je sai. Dai hpang Insein Myen chyum jawng mung lung la nna Munmau de bai wa shakut sai. Shi a shakut shaja sasana majen je ai majaw mare kahtawng ni law law kaw na Jinghpaw Wunpawng amyu sha ni hpung shang masai. Kasha ni hpaji grai kung ai hte du kaba/sarama kaba ni tai wa sai..
Rev. Lahtaw Gam.
Sara kaba Lahtaw Gam gaw Namhpaka, Hkalik kahtawng na re. Kaji aten hta Manmaw kaw jawng lung sai. Dai hpang Insein Myen Chyum Jawng de special jawngma hku lung la u ai. Mung Ji Hpung Up tai let sasana majen je sai. 2nd Kachin Rifle a Hpung up, Kutkai Hpung Up (Mungji hpung up tai let), Dumbang Hpung up, Kutkai Chyum Jawng sara, Myitkyina Ginwang a K/S dap hpa-awn, 1977 Jaw Masat hta Gaw Gap Hpa-awn etc.. tai sai. Campaign hkawm let sasana majen je grai woi je sai hte KBC a Hanson Htang Dip Gawng byin tai hkra hta n-ga KBC magma gun ni a providence Fund woi hpang sai. 
KBC a Labau hta Sara kaba Rev. Lahtaw Gam woi awn ai Nampaka La hpung ni gaw hpaji hpe tsaw ai hte amyu sha hpaji lam a kasi kaja hkringhtawng jaw da sai. Shanhte hkai da sai hpaji asi ni gaw Dr. Gam Seng Shae (Wunpawng sha ni hta shawng nnan na Ga Shaka Ningnan Chyum hpaji munu Ph.D), Dr. Maran La Raw (Wunpawng sha ni hta shawng nnan shinggan hpaji munu Ph.D), Dr. Lahtaw Gum Se (KTCS jawng up Usa), Sr. Kaba Hkangda Brang Gam (KTC Kutkai Jawng Up Usa, 7 Stars-KIA), Dr. La Wu (Lisu Chyumjawng Up Usa), Dr. Joshua Young (MBC Amu Madu Usa), Srm Kaba Lahtaw Ja Tawng (Lahta Tsang Jawng Up/Hpaji Du Usa), Dr. Seng Tawng (Tsidu/KTCS Trustee Nigbaw Usa), Dr. Lashi Labya Je Naw (Tsidu), Dr. Maran Ja Gun (KTCS Hpaji Up Usa) hte kaga law law amyu a, hpung a ningbaw ningla ni hpe shangai shapraw dat sai. Dai majaw Sara kaba Lahtaw Gam gaw Hpaji sasana majen je ai ningshawng mung rai nga ai law.
Bai hkringhtawng shachyaw ra ai lam ni:-
1. Ndai chyeju madu sara kaba ni yawng gaw tinang a akyu ntam ai sha kaja wa nan grai ap nawng ai ni re.
2. Shanhte a sasana majen je ai hta wenyi lam hta jan nna hpaji lam, hkai rem lam, hkam kaja lam ni the kaga machye machyang lam ni hta mung grai woi myi jahpaw ma ai.
3. Jinghpaw Chyum Laika Jawng garai n lu ai aten hta Sasana sara kaba ni e sharin ya ai hpe kang ka let sharin la nna hpung woi majen je nga ma ai. Nkau mi gaw Insein Myen Chyum jawng lung la lu nga ma ai. 
4. Kasha kashu ni hpe mung laika hpaji lam hta grai shakut ya ma ai. Nkau mi a kasha/kashu ni gaw masha law law hpe woi awn ai hte ningbaw ningla ni tai wa lu ai hpe mu lu nga ai. 
5. Hpung masha ni hpe gawan katsan ai hta grai n-gun dat ma ai. Lachyen ginhka nrai ai. Yesu a tsawra myit hpe madung dat ai. 
Daini anhte KBC hpung masha ni mung ndai shawng numshawn shaw majen je ai sara kaba ni galaw ai magam bungli ni hpe bai myit dum let shanhte jaw da ai sasana hkringhtawng hpe shachyaw let Tsawra ai myit hte teng man ai ga hpe tsun nga let Dinghku Sasana kaw nna Maigan de, grau nna Kachin Diaspora missions hpe aja awaq majen je let Maigan du KBC hpung masha ni hpe zinlum ai masing kawn Maigan mungdan shara law law de Sasana majen je let Hkristu a sakse ni tai wa saga law.
Mahta ai:-
- Rev. Dr. Saga Hkyen Naw a Lakjet
- Herman G. Tegenfeldt, A Century of Growth: The Kachin Baptist Church of Burma.  
-Gustaf A. Sword, Come What May.
- Rev. Marip Awng La - KBC Labau 
- Dr. Hpauyam Tu Htang (Nawku hpung Hpaji Ginra Lithkam) hte Sanhtai, KTC Alumni News Vol (1), 2014.
-Sara Myitung Sut Nau, Ja hte Lungseng Jubeli