By: JPKS0 Comments
2014 July 25 ya shani kaw nna Laiza Muklum kaw mungdan ting gap hkat jahkring lu na matu NCCT zuphpawng galaw ai lam na chye lu ai. Kaja sha nga yang gap hkat jahkring na matu lit nga ai gaw laknak hpai ai rawt malan hpung ni pawnghpawm tawn ai UNFC re. Raitimung ndai zuphpawng gaw laknak nhpai ai ni mung lawm ai uhpung 16 re lam tsun wa masai.
Shingdu lam hpe hkaja yu yang Myen gaw rawt malan hpung ni hpe shamyit kau lu na matu Border Guard Force (BGF) hpaw dat ai raitimung rawtmalan hpung ni BGF kaw sa shang na malai UNFC hpaw dat masai. Myen gaw UNFC hpe jahten sharun kau lu na matu ladat myu hkum sumhpa lang wa masai. Shing rai 2013 November shata hta Laiza kaw galaw ai zuphpawng hta UNFC kaw na pru mat sai KNU ningbaw ni hte laknak nhpai ai uhpung ni gaw UNFC hpe garum la na matu ngu ai NCCT hpe tai wa a hpaji hte hpaw dat lu masai. Pru wa ai mahtai hpe yu yang, Myen gaw pala langai mung nlang ai sha, rawt malan hpung ni yawng hpe dang la lu na hpaji rai nga ai.
Dai ni na rawtmalan hpung ningbaw ningla ni a zuphpawng gaw UNFC n rai sai. Tai hpyen wa shalat ya ai NCCT zuhpawng she rai sai. Shing re ai majaw ndai zuphpawng kaw myutsaw mungtsaw rawt malan hpung ni maga mi de tsap nna, tinggyeng lu lawm lam hpe marit ai ni gaw kaga maga de tsap let gang hkat ai sumri gang shingjawng poi zawn rai wa sai. Myutsaw mungtsaw maga de ngang ngang tsap nna nyan hpaji hte n-gup hpe laknak shatai nhtawm ja ja gasat wa ai KIO Ningbaw Malai Du Kaba Nban La hpe hkan madi shadaw ai uhpung ni nga ai zawn, tinggyeng lu lawm lam hpe myit mada let Myen maga de ngang ngang tsap nna woi awn ai ni hpe madi shadaw ai ni mung ntsaw ntsang rai nga ma ai.
Ndai Laiza zuphpawng kaw mungdan ting gap hkat (Nationwide Ceasefire) myit hkrum sen jawm htu ai hte President Tein Sein gaw Myenmung ting simsa sai majaw maigan masha ni Myenmung kaw arang kaba sa bang na matu hpaji daw ai lam awngdang wa lu na rai sai. Hpang e rawt malan hpung ni gaw tinang hpe satan wa hkalem kau ai hpe myit dum wa timung, maigan sut masa ninghkring ni gaw shanhte bang tawn ai arang hpe makawp maga tawn lu na matu Myenmung kaw majan bai n byin wa hkra asuya hpe jawm madi shadaw la na rai nga ma ai.
Dai ni na myutsaw mungtsaw rawtmalan hpung ni gaw Myen a maw lanyet ai hpe kade lang hkrum sha wa yu sai lam hti n dang rai wa sai hpe myit dum ai ni hkrai re. Dai ni na ten hta satan wa gaw democracy hte federal ahkaw ahkang jaw na, Pinlung myit hkrum zuphpawng hta grau kaba ai zuphpawng galaw ya na, ngu ai maw lanyet ga si ga ngau ni hpe mani kau ya nna tinang a myusha ni lu ging ai ahkaw ahkang ni lu wa hkra tinang a asak hpe apnawng kau nna shakut sa wa ai ni re.
Dai zawn re ai kamhpa lam hta hkan nna myusha lam yan a matu hkam dahka lam rai n nga dingsa, Myutsaw Mungtsaw ningbaw ningla ni gaw mungdan ting gap hkat jahkring ai myit hkrum sen nhtu lawm na ma ai, ngu ai hpe nu wa hpu nau ji nban yawng hte kamhpa dat ga ai law.
Pyi La
n
n
