Ya yang Danai Nam Byu lahta kaw "WALA TAW" ngu ai hkaraw langai mi kaw KIO / KIA ni kawn woi lit la nna, MHH, MKM ni a yak ai kun dinghku hpe karum lu na matu ngu nna, Payin Maw langai mi gan hpaw dat ya ai nga shiga na lu ai.
Dai re wa, dai magam gun dinghku ni gaw n du lu shi yang, Hpunau Lisu ni, shanhte chye ai kaga Lauban ni a bungli galaw masha ni hte ru ru nga majoi yan shang wa nna jahkring mi na laman hta, Maw nnan wa masha Hkying la hpring kabrat mat ai da.
Dai majaw, gau mung n mai shachyut mung n htuk , ngai na , nang na jinghku ni re ngu ai hkrai rai taw re majaw, Jahtum e gaw, Sam hpyen ni gaw Sam hkyeng ni hpe hpyen lahkawn, Myen ni hpe gaw Jawngma Dap ni hpyen lahkawn, Hkang ni hpe mung Hkang ni lahkawn, Wunpawng hpan ni hpe gaw, Shanglawt hpyen la ni hpyen lahkawn, rai bang mat wa ai hte, kalang dat mang hkra bai hprawng bra mat ma ai nga shiga na lu ai.
Law malawng gaw Hpunau Lisu ni rai nna Mugok ga na ni law ai nga ma ai, Payin hpe grai manu chye shadan ma ai majaw, grai hpu hpu chye dut sha nga ma ai da, Jinghpaw hpan ni gaw, naw mau angaw taw, masha ni bai shaw sha kau ma wa nga ma ai da oi ....
Dai Payin wa mari ai ni gaw, Miwa Lauban ni rai nna, Miwa Modo ni nan gau lung wa nna, Danai mare hkan e du hkra Miwa Modo hpring nga ai nga tsun dan ma ai. Dai Miwa Lauban ni hpe woi lung wa ai mung Hpunau Lisu ni re nga tsun ai.
Hpa mi nga nga, Anhte Wunpawng myu sha ni kaw na HPunau Lisu ni ya na zawn manu chye shadan nang nga ai majaw kabu lawm nngai ngu tsun mayu ai. Rai tim, madu myit rawng na matu grai ahkyak la nga ai ngu mu mada let, ginlen dat nngai law.
