2012 January (27) ya shani hkying (10:00)am aten Laiza Lahta Tsang Jawng, Rawt Ninghkawng Gawknu hta Mung shawa, Dap shawa hpe, ya aten na KIO a Mung masa, Hpyen masa lam sanglang dan ai zuphpawng galaw ai lam hpe chye lu ai.
Ndai zuphpawng hta Wunpawng Mungdan Shanglawt Hpyen Dap, Dap Awn Daju, Du Daju Gunhtang Gam Shawng kawn Mung shawa, Dap shawa hpe tsun sang lang dan ai lam ni gaw
1. Dai ni du hkra na KIO Ginjaw Komiti kaw na woi awn ai Mung masa Hpyen masa hpe tsun sanglang dan ai.
2. Majan byin wa ai gaw Mung masa a majaw byin ai wa ai re, KIO Ginjaw Komiti gaw branglang masa hku nna lahkam woi htawt na hte mung masa lam lu jahkrup banwg ban yang majan mung mat mat na sha re.
3. KIO gaw (17) ning gap hkat jahkring ai hta Mung masa, Hpyen Masa, Mungshawa akyu ara law law hkrat sum mat ai lam ni hpe mahkrum madup nga sai re majaw tinang a gam maka tinang jum hpajang la lu ai hte sakse sakgan ngang kang ai simsa lam lu hkra bawngban sa wa na lam.
4. KIO gaw Munghpawm shangai shaprat dat ai Panglong ga sadi hpe n’pawt tawn nna Mung masa bawngban sa wa na lam.
5. Koi yen n lu ai majan hpe Jahtum chyalai hpe hpan tawn da ai Hpan Wa Ningsang Yehowa Karai Kasang hpe nambat (1) tawn da nna Karai n gun hte Awng Padang Ninglaw lu na re lam hpe Mung shawa Dap shawa hpe tsun sang lang dan ai.
Ndai Sang Lang hpawng hta Mung Shawa Dap Shawa marai 1,500 ram sa du ai re lam hte KIO Ginjaw Komiti a Mung Shawa, Dap Shawa hpe sanglang dan ai zuphpawng gaw Liaison Bum, Je Yang Hka Hpen Yen Dabang hte Hpung Lum Yang Hpyen Yen Dabang ni hta mung galaw ai re hpe chye lu ai.
By,KNT
