KIA Namtau kaw gap, Myen hpyen magam gun 2 si

Mani Dec. 29 ya shani gaang hta lahta Sam mung laksan KIA Munggu dap ni gaw Namtau makau Myen asuya hpyenla pyada hpung langai hpe hkap gap ai kaw Myen maga 2 si, 3 hkala ai lam, ndai lam chye ai buga masha ni tsun ai .

Si ai gaw hpyenla langai hte pyada langai rai nna hkala hkrum ai ni, shanhte yawng gaw ga jarit hpaga mare kaba Muse kaw nna lung wa ai ni re nga, buga masha ni tsun ai.

Hkap gap ai lam hpe laksan KIA Munggu dap, Dapdung 36 hpyenla ni galaw ai re lam, shanhte a hpyendu ni KNG Jinghpaw Shiga Dap de shateng tsun wa ai.

Ndai mabyin shara gaw Mungyu 105 Ga Jarit Hpaga Dabang hte Pansai lapran, Namtau mare makau kaw re.

Maga mi de Hkrismat Nhtoi kaw nna Myen hpyen dap Tahtung daju Tat-mat masat 44 na hpyen n-gun 500 jan gaw Namsung daju KIA Dapdung 8 hpe shingja laknak (Chemical weapons) ni hte mung laja lana htim gasat nga ai re.

Lahta Sam mung daju KIA Dapba 4 npu Dapdung 8 shara Namtu hpe lai di nna Rahkai mungdaw panglai na sau hte dat nsa ni Miwa mung Yunnan mungdaw de ginlen na lam mung re majaw, ya na zawn Myen dap ni Dung 8 hpe n-gun kaba hte gasat nga ai lam re.

Lai wa sai June shata gumsan magam U Ting Tsing a Myen ginjaw asuya gaw KIA hpe majan baw dat ai hpang, ndai Miwa ga jarit sau lam hte Mandalay-Muse hpaga lam lahkawng hta hpyen hpung shamu shamaw wa shagu, KIA ni jaugawng ladat hte ninghkap gasat nga ai re.
By: Kachin news