MYEN ASUYA A MUNGDAN TING GAP HKAT JAHKRING MAYU AI MASING

Myen Asuya gaw myen mungdan kata kaw Rawt malan taw nga ai Amyu bawsang ni yawng hpe Htani Htana padang dip ga-up sha lu na matu shaw taw nga ai masing gaw moi na hte nbung mat sai. Ndai lang dawdan shut jang gau ngwi ngwi sha Htani Htana hkrat sum mat wa na re. Mungkan a man hta laknak lang Rawt Malan Wuhpung langai mi hpe gasat shamyit kau na matu gaw shawng nnan dai Wuhpung hpe gumshem (Terrorist) shabyin shatai kau ra ai. Daini myen asuya hkrit taw nga ai manghkang gaw mungkan kawn shi hpe madaw gumshem (Terrorist) asuya ngu nna masat kau hkyen sai re hpe grai hkrit nga malu ai. Dai majaw mungdan ting gap hkat jahkring myit hkrum Ta masat hpe mungkan a man e galaw dan lu na grai ahkyak nga malu ai. Mungdan ting gap hkat jahkring myit hkrum ta masat htu ngut ai hpang…

1- MUNG MASA JAHTA NA LAM HPE SHANHTE RA AI HKU ATEN GARAWT LU SANA.
2- MUNGDAN A NINGPAWT NINGHPANG GAWGAP TARA (Constitution) MUNG N GALAI RA SANA.
3- ANHTE RAWT MALAN BAWSANG NI BAI GAP RA WA TIM NMAI GAP MAT SANA. (Anhte bai gap wa jang Anhte madaw Terrorist byin mat na.)

Mungdan ting gap hkat jahkring na lam hte seng nna Anhte KIO/KIA ni shawng ra sharawng lai wa sai re. Hpa majaw dai shaloi mungdan ting gap hkat jahkring galaw na lam hpe nra sharawng ai? Ya gaw hpyen masa, Sut masa hku nna ahkyak ai shara ni yawng hpe jum tek kau lu sai re majaw mungdan ting gap hkat jahkring tawn nna mungmasa jahta ai lam n-galaw tim shanhte myen asuya gaw ntsa kaw nga taw mat sai. Mungkan a man e mung mying kaja lu ai hte madi shadaw ai lam ni law law lu la na. Mungmasa jahta ai lam hta mungkan a man e tara shang aten garawt lu na matu re.

Bai nna ndai ten hta mungkan kawn myen asuya a ntsa chye mayu ai Ga’san kaba gaw Constitution hte Aung San Suu Kyi gaw Anhte laknak lang Rawt Malan taw nga ai Amyu bawsang ni hpe gara madang hku hparan ya lu na kun? Ngu ai Ga’san rai nga malu ai. Ndai ga’san hpe chye tawn chyalu rai nga ai Thein Sein asuya gaw Aung San Suu Kyi hpe mungkan a man e kalang mi bai jailang hkyen nga sai. Aung San Suu Kyi hpe Nambat (2) Gumsan Magam tai lu na daram sha Constitution hpe gram galai masu nna, Anhte Laknak Lang Rawt Malan taw nga ai Amyu Bawsang ni a matu gaw Constitution gram galai na masa n nga ai. Aung San Suu Kyi shi nan mung Gumsan Magam galaw mayu ai lam dai langai sha tsun ai. Anhte Amyu Bawsang ni a matu Constitution jawm ka galai na lam galoi mung ntsun ai. 2015 ning hta gaw Thein Sein asuya ni mi dang dang, NLD ni mi dang dang, Gara Party ni mi dang dang Dai 2008 ning Constitution a kata kaw sha rai na re majaw Anhte laknak lang rawt malan taw nga ai Amyu bawsang ni a matu gaw gaman sha re. Mungdan ting gap hkat shawng jahkring kau ngut ai hpang Constitution n galai lu ai nga tim Anhte ganing n chye di sai. Shanhte myen ni na myit sha rai mat sai.

Constitution hpe nnan kawn bai ka galai ai lam nnga yang mungmasa manghkang hpe tengman ai hku nlu hparan la mat na. Tengman ai hku nlu hparan la jang Anhte bai gap ra wa na. Anhte bai gap wa jang Anhte madaw Terrorist byin mat na. Anhte Terrorist byin mat jang myen asuya madaw tengman ai asuya byin mat na. Myen asuya tengman ai asuya byin mat jang Anhte hpe hpyen n-gun kaba hte bai gasat bang wa na. Hpyen n-gun kaba hte gasat bang wa jang jamjau nhkam lu ai Wuhpung ni gaw 2008 ning Constitution hpe hkap la kau saga nga ai mung lawm wa na. 2008 ning Constitution hpe hkap la kau dat jang bai du wa na shaning 100 ning daram hta gaw Amyu bawsang ni yawng ngu na daram myen ga sha chye shaga mat na. Dai hpang myen ga shaga ai Jinghpaw Wunpawng Amyu ngu ai byin pru wa na. Dai hpang Amyu mat mat sana. Ndai gaw myen asuya a MASING re.

Ngai hku nna ta’tut mu mada ai Sweden mungdan kaw na kaja nan byin taw nga ai mabyin langai mi hpe garan gachyan mayu nngai. Sweden mungdan gaw Top Democracy mungdan re. Sweden mungdan a dingdung maga mungdaw langai mi daram hku moi kawn nga ai SAMI amyu ngu ai ni nga ma ai. Sweden mungdan ting a masha jahpan gaw wan-9.22 jan re. Swedish ajet gaw wan- 6 jan daram sha re. Simsa lam nnga ai mungdan nkau hkan na tsin yam ni mung UN hku nna htawt sit shara jahkrat nga ai laga amyu ni mung grai nga ga ai. SAMI amyu ni gaw wan mi (1,000,000) pyi ndu na re. Shanhte kaw tinang a ga, laika, htunghking mung nga malu ai raitim daini gaw SAMI amyu mat mat wa ai daram rai mat sai. Dai SAMI amyu wan mi daram gaw Mying sha SAMI mying shamying tawn tim SAMI ga hpe atsawm nchye shaga masai. Sweden mungdan hta majan nbyin ai shaning 180 ning jan rai sai. Jet ai Democracy gawgap tawn lu ai mung shaning 100 ning daram rai sai, rai yang hpa majaw SAMI amyu ni mat wa ai kun? Ngu ai ga’san gaw myit yu shara re. Dai majaw daini Anhte Jinghpaw Wunpawng Amyu sha ni chye na nna dawdan ra ai gaw Democracy langai hpe sha nmai myit mada ai. Tinang a mungdan hpe Sut masa, Hpyen masa, ma hkra hpe tinang a laili laika makam masham hte dawdan hparan la lu ai mungdan madu ni nan tai ra na re ngu mu mada ai law.

Sau Nan Du

By/JPKS