Insein Htawng Shingran

    Myitrum manang ni, "Insein Htawng Shingran" ngu ai Ga shagawp shagun dat ai yaw. Daini Pranghkawnyang kaw jahta chyai na matu KIO kasa ni gaw, mana kaw na Maijayang e du taw masai. Marit sha gaw marit, hkrit sha gaw hkrit re ai M ni gaw daihpawt she Manmaw kaw na lung wa na hku rai ma ai da oi. Anhte a kasa ni a n-gup n-gau hpe KK jai lang u ga, akyu hpyi dum ga lu yaw. Pangwa maga, jarit hpundung (7) de M ni bai htim hkyen nga ma ai da. Masin n-gut dik nga ma ai. Kyu bai hpyi shapyen kau dat ga i. Anhte kyu hpyi shagu KK madat ya ai sha re.N-gun grai lu ai.

JIC++read more+++

Insein Htawng Shingran

1997 ning; January praw de---------.
Insein Jinghpaw Chyum jawngma,
Hkalup Hkristan hpung mi nga;
S'ra Naw Ming jawngma Ningbaw,
Sumlahkrung dem woi galaw;
Shawnghtawk Tsing Pan sumrai ka,
Hkrangsh'la matsun mung shi ka;
Labya La Bawk Director,
Video sumla shi dem ya;
Sumlahkrung sh'dang Brang Ja tai,
Sumlahkrung sh'yi Seng Hkawn rai;
Jawngma mahkra m'rai 10 jan,
Insein m're hte gaja tsan;
Nachying lagyi ai ten hta,
Kawnghkapa de du sa saq;
Mahtu Naw Ningbaw kaba,
Jawngma ni hpe hkalum la;
Tsawra myit ni madun woi,
Sumlahkrung dem saga ai oi------.
1997 ning, May praw de------.
Director hte Shawnghtawk Tsing Pan,
Insein htawng de shawng lahkan;
Aga! ga!
Insein htawng wa grai kaba,
Kahtawng kaba mungdingga;
Htawngmasha mung hpring gabrat,
Htawngkata e matsat shabat;
Nbung san seng lam n nga,
Ngasat madang n kaja;
Mungkan madang gaja nem,
Htawng hkrat masha grai grit nem;
Shinggyim hkawhkang galawga,
Mungkan-ga ngaraidi hpa;
Jaw ai lusha washat zawn,
Nnan du yang she madawn.
Oh! oh! Dinghkrai gawk kata na-----.

Shana shagu shaw di jep,
Sumla a lam san azep;
Nsam gaw chyang chyang myi tu tu,
Ga san san let grai daru;
Jep ai Duwa gaja pawt,
Ganoi noi she htim adawt;
Mungmasa Policy hkra ai,
Amu kaba galaw myitdai;
Bukma lahkawng ting she rai,
Sh'ning "Hkun" hkrat na marin dai; da.
1997 ning, July htum de-------.
Sara Naw Ming ni hkan du,
Peace maker ni hkan mu;
Khin Nyut wa hpe tsamm'ri tsun,
Jawngma ni hpe hkan dinglun;
Gasadi laika ka shangun,
Khin Nyut wa a ga matsun;
Htawm hpang de Policy hkra ai,
Mungm'sa laika n ka sai;
Lawt daw gas'di laika ka,
Myit m'sin kata majing wa;
Sara Naw Ming mung maren,
Myusha Amyit tut dinggren;
Daini Karai bai jai lang,
Anhte rau myitrum manang;
Tsa Doi hpe mung dum ai yaw,
Prat tup n mai m'lap ai law;
Wunpawngsha hkawhkang matu,
Matut magrau grang ga lu!
Tsin-yam hkrum tim rau jamjau,
K'bu hpa hkrum tim tut arau;
Awmdawm shanglawt lu la na,
Myitrumni ! Naw jawm shakut ga i ya-------.
" Galoi Mi She " myitrum manang ni hpang de;

Shanglawt Tsing
( 1. 6. 2012, 12:45 AM )