(1) 8.2.2012 hta, Sadung e Tai ni gap hpang dat ai majaw, shawng nnan KIA 4 daw jau hkrum mat nna, hpang e gasat poi byin mat ai shaloi, Tai ni law law hkrat sum mat ai; jahpawt kaw na jan du hkra gasat hkat ai lam na lu ai.
(2) 8.2.2012 (the same) Manmaw Ginwang, Munghkawng e mung, gasat poi byin ai. Tai ni shawng gap bang wa ai re da.
(3) MKA lam Japu e KIA langai hte Tai langai hkrum katut hkat ai shaloi, KIA wa gaw, “jidrf;csrf;a&;(nyin chan ye)” ngu tsun dat ai hte rau, Tai wa kalangta gap sat kau dat ai, dai mung 8.2.2012 e re.
(4) Manmaw mare na Myennum langai (Gatnum) Lajayang na Myenpost a matu Laiza gat na shatmai ni alaw alam mari hkrat wa ya ya re ai da. (Myen ni shangun sha ai num re) Kalang mi na gaw, shatmai nau law ai majaw num dai hpe shatmai ni hte nawng Laiza Shanglawt gate e hkap rim nna, Shanglawt htawng shi ya sharawng nna bai dat kau ai. Num dai mung Manmaw de yu mat wa sai majaw, Myen ni kadai hpe n lu shangun sha sai. 8.2.2012 shani Jeyanghka hpyen-yen dabang na ma kanu langai Lajayang hku lai wa yang, shatmai n lu sha mat nna pawt nga ai Myen hpyenla ni hkap jahkring zing da ma ai. Shiga a majaw maduwa sa hkam shaw la yang, Kyats sen 2 hte shaw la shangun ai. N lu ai majaw masha ni kaw hkoi nna she lu shaw la ai. Ya shannuwa ni dai sen 2 hka kap nga masai lam na lu ai. Laiza ni kadai mung Lajayang n lai gwi masai da. Lai ai ni mung, “Manmaw na re” sha mai ngu ma ai da.
(5) 9.2.2012 jahpawt Alawbum maga e mung Myen ni KIA post hpe sanat kaba hte gap bun ai lam na lu ai. Gasat poi gaw n byin ai da.
