Saturday, February 18, 2012

Myen ni langu si hkyi chyat nna si

Miwa mung Yinjiang mare e nga ai Miwa Lauban Lau Ying ngu ai wa hte (2005-2007) Myitkyina e dung lai wa sai Taing Hmu Bogyoke Ohn Myint gaw, ga she n chye na hkat tim, kraw kan kata na masa bung hkat ai majaw, ga byan ya na masha pyi n tam hkra, ram ram hkau chyap lai wa masai.
Manmaw lam Nalung mayan, Munglai hka masawn Shadan pa ngu ai ginra ni gaw, Taing Hmu Bogyoke Ohn Myint hte hku hkau lu ai chyeju a majaw, Lauban Lau Ying wa a myi mada n htum ai hpaga langu sun hkrai pri rai nga ai. Gasat gala majan garai n byin ai ten ni hta, dai langu sun na langu si ni hpe, shaprai 24 kap ai mawdaw kaba ni hte n sin nhtoi Miwa mung de htaw lahka lai wa sai re. Gasat gala majan byin pru wa yang mung, Lauban Lau Ying wa galaw da ai Shadan Pa ka-ang kawng tsaw ntsa, nbung li (Helicopter) yu hkrat mai ai shara; ngang kang ai dum nta ni, alaw alam jahting tawn ai malu masha ni a majaw, Myen hpyendu ni grai jaw dum kau masai re.
Gara hku mi htuk manu lai wa sai raitim, Matsaw Ningtsa na wa a myit mang ai lam hpe dep lu ai gaw kadai n nga na ga ai. Ntap bum kaw nna N tat bum byin wa ai labau mung na yu na sai re. Ntat bum majan pa na du wa ai share shagan hpyenla langai mi tsun ai gaw, lai wa sai October, November hte December ni hta, N tat bum de htim lung ai Myen ni wa, shada da bra ayai mat; manang sagawn n lu mat, lusha htum mat, jamjau hkrum wa jang, langu si katsing hkrai abrut sha nna kan chyat nna si jawng ma ai da yaw. Sanat hte pyi gap sat n ra ai sha, Lauban Lau Ying a langu si ni mahtang Myen hpyen gasat karum ya ma ai da yaw.

Matsan na dum na zawn re ai lam langai gaw kaga n rai; Myen ni byep ayai tawn ai langu si hkyi wa manam pyi n chye manam malu ai da. Nam na hkan hkyi, ru hkyi, malat hkyi ni hte bung mat ai hku re da. Oh, num ni ma shangai n lu nna si ai hpe “Ndang si ai,” nga ai rai yang, Myen ni langu si hkyi chyat nna si ai hpe mung “Langu sin ndang si ai” ngu ra na zawn rai sai i?
Matsaw Karai Wa anhte amyu ni hpe gara hku woi awn taw nga ai lam sung sung myit yu let, tengman ai hku hkawm sa yang, teng sha awng padang lu la na ga ai. “Tara n lang ai ni a lam chyawm gaw hten mat na ra ai,”
By: JPkasa