MUNGMYIT SINLI GA A MUNG MASA SHAWNGLAM

Sinli Uma

14.8.2017

Tsawra ai Mungmyit Sinli nga Wunpawng Mungchying Mung Shawa ni hpang de mu mada ai lam ni hpe mai byin ai byin da masa ni hta mahta nna, sharin la lu ai lam ni hte byin ging ai lam ni hpe lawu de na hte maren htawng madun dat ai re law. Hti yu nna byin ging ai lam ni hpe matut jahta jahkrup shawng lam hpe hkyen sa wa na matu lajin dat mayu ai.

1. Mai byin ai KIO a Mung Masa Myit mada ai lam hte Shaga Madat ai Mungmyit Sinli:

KIO kaw nna gaw, Wunpawng Mungdan ting, kaga mung masa hpung n nga sai sha KIO hpung hta sha shang lawm nna galaw sa wa na hpe myit mada na lam nga ai. Dai majaw, 2010 Ning Munghpawm Myen Mungdan Ra Lata Poi hta mung, 2015 Ra Lata Poi hta mung, Mung Shawa Mahta, Mung Masa Hpung hpaw nna ra lata poi shang lawm na hpe n’gun n jaw lai wa sai ngu maram mu lu ai. Ndai lam mung KIO hta lai nna kaga Mung Masa Hpung hpe myit n kap mat na hte KIO hpe sha tut nawng e kamhpa nga na matu re ngu mu mada ai.

Raitim, Jinghpaw Mungdaw de gaw, Mung Shawa Mahta Mung Masa Hpung ni hpaw nna ra lata shingjawng lawm wa sai. Mungmyit Sinli ga de gaw, KIO a matsun hte maren, Mung Masa Hpung mung n hpaw ai sha, dinghkrai hku nna sha, ra lata shang lawm lai wa sai hpe mu lu ai. Dai majaw, KIO a ga madat ai gaw Mungmyit Sinli ga ni sha re nga ai hpe Salang Kaba n’kau tsun ga ai ngu ai hpe na lu ai.

2. Mungmyit Sinli Ga a Mung Masa byin da masa lam:
Hpyendap a npu na PYI KHAING PHYOE party n’gun naw ja ai. Dai majaw 2015 ning ra lata hta, Hkanghkyi ni gaw, Kachin Sub State kaw dang ai hpe mu lu ai. Kaga Sam, Balawng ni Mung Masa hta ramdaw n’gun ja nga ai. NLD mung shamu shamawt nga ai.

Wunpawng ni gaw masha nhprang n’gun n nga ai majaw mung rai na, Mung Masa Ningmu n nga ai majaw mung rai na, KIO a Ga madat ai ngu ai amying kaja kaji mi a atsa sha myit shadik la nna, KIO a Mung Masa Pandung hta kaga, Mung Masa Hpung mung n nga, Pandung mung n nga hkyen lajang ai lam mung n nga lai wa ai. Shinggyim Uhpawng mahta Uhpung mung n nga, mu mada hkra re ai lu galaw ai lam mung n nga ai hpe mu lu ai.

Ndai lam ni a majaw, Sammung Rapdaw hta, Wunpawng myu sha ni a matu tsun ya na lit la ai wa mung n nga nga ai. Duwa Hkun Myat mung Mungmyit Sinli ga kaw nna Amat Salang tai wa ai gaw re ai raitim, Mungmyit Sinli nga WP sha ni a matu tsun ya lu ai mu mada lu ai mahtai kaja n mu shi ai. Wunpawng Myusha Hkringmang Duwa Zuk Dau mung hpabaw galaw nga ai kun ngu ai lam ni hpe asan sha n mu lu nga ai.

Ndai lam ni hpe yu dat yu ai shaloi Mungmyit Sinli ga nga Wunpawng Mungchying Mung Shawa gaw, yawng hkrum ai Mung Masa Pandung n nga ai majaw, gadai mung gadai chye ai masa hpe gyin shalat la nna, ang katut galaw taw nga ai daram hku sha naw rai nga ai. Dai re ai majaw, Mungmyit Sinli ga gaw, Ung Ang taw nga ai lachyum, tinang nan hta galaw wa na n myit ai sha, ginjaw matsun hpe naw la taw ai, lahta matsun n nga yang n chye galaw ai madang sha naw rai nga ai hpe mu lu ai.

3. Jinghpaw Mungdaw de nna sharin la ra ai lam ni:
Jinghpaw Mungdaw hpe yu dat yu ai shaloi, KIO Mung masa lam hta sha n’ga, Mung Shawa mahta ai Mung Masa Hpung ni mung ram daw n’gun ja nga sai hpe mu lu ai.

Mung Masa Hpung ni mung, 2015 ra lata poi hta sum ai lam, dang ai lam ni hpe mahkrum madup ni law law lu la sai hte, matut nna asak jahkrung nga ai hpe mu lu ai. 2018 ning hta, Mung Masa Hpung ni mung kahkyin gumdin nna 2020 ning ra lata poi hta shang lawm na matu hkyen lajang da ai hpe mu lu ai. Grai kaja ai lam ni re. Mung Shawa mahta Ra lata Poi kaw dang nna Mungdaw Mungbawng Rapdaw de du wa ai ni mung, tinang mungdaw a ra ahkyak lam ni hpe rapdaw hta lu tsun la ai majaw, grai kaja ai mahtai ni pru nga magang sai lam ni hpe mu lu ai.

Shinggyim Uhpawng akyu ara a matu shanglawm nga ai Mung Shawa mahta Uhpung ni (CSOs) grai n’gun ja nga ai hpe mu lu ai. CSOs ni mung, Mung shawa akyu ni hpe masa gyin shalat nna gadai mung gadai hte seng ai lam, ni hpe madi madun, galaw nga sai lam ni hpe mu lu ai.

Ginchyum nna, tsun ga nga jang, Jinghpaw Mungdaw maga de na Amyu Wunpawng Sha ni gaw, kaji mi naw shakut jat dat sai nga jang, 2020 ning hta, Mungdaw Rapdaw hpe madu lu na hte, Mungdaw Atsuya lu tai wa na lam nga na ni sai ngu tsun mayu ai.

4. Sharin La Lu Ra Ai Lam ni:
KIO hpe kamhpa manoi manat nga ai gaw kaja nga ai raitim, anhte a Mung masa shawnglam mahkra hpe KIO hpe sha ap kau ai n re ai sha, tinang a ginra hta maibyin ai daram masawp amya pru wa let, tinang a atsam ni hpe gawgap la ra nga ai. Mung Shawa Mung Masa Hpung mung hpaw sa wa ra nga ai.

Myen Mung Atsuya hte shingdaw dat yu ai shaloi, Hpyendap kaw nna Hkanghkyi Party pru wa ai. Shan yan gaw langai sha re. Shi hpe shingjawng na NLD hte kaga Party ni mung nga wa ra ai hpe mu lu ai.

KIO hte KIA mung dai hku sha rai nga ai. Shi mung Hpyen Atsuya sha rai nga ai. Masa ni hpe, gawda ai tara ni hpe gram lajang na, galai shai na grai yak ai Uhpung Uhpawng langai mi byin taw ai. KIO hpe shingjawng na matu n tsun mayu ai. Shading sharai karum na hte mung shawa akyu hpe Myen Mung Atsuya lapran kaw shamu shamawt na Mung Shawa Mahta Mung Masa Hpung mung nga ra nga ai.

5. Galaw ging ai lam ni:
Jinghpaw Mungdaw de na mabyin ni hte, rau nga hpunau ni kaw nna yu la nna, galaw sa wa ra ai. Mung Shawa Mahta Mung Masa Hpung lawan ai hku hpaw ra ai. Dai Mung Masa Hpung gaw, Mungmyit Sinli (Kachin Sub State) ga nga Wunpawng Mungchying Mung Shawa ni a gam maka hta mahta nna Mung Masa Pandung ni shalat shapraw ra na re. Ndai masa (Policy) ni hpe gyin shalat shapraw ai shaloi, seng ang ai stakeholders ni yawng shang lawm ra na re. 2020 ning Ra Lata Poi hta mung shang lawm ra nga ai. Dai Mung Masa Hpung a nsen gaw, KIC de mung shadu ra na re. Myen Mung Atsuya Uphkang nga ai ten, Mungmyit Sinli ga nga Mungchying Mung Shawa a akyu matu Rapdaw kaw mung, Mungdaw Atsuya kaw mung tsun shaga ya lu ra ai. Ndai hku nna lawan ai hku nna matut galaw sa wa ra na sai ngu mu mada ai lam ni hpe tang madun let hpungdim dat sai.

Tsawra myit hte,

Sinli Uma

Show more reactions