Wednesday, November 30, 2011

Shatapru kaw bawm 2 kapaw, masha si

Nov. 30, 2011-Myitkyina, Shatapru Manau Wang makau, Myitkyina Dakkasu sa lam numshe kaw mana de hkying 8:00 PM ram hta bawm kapaw ai majaw, tsang 9 jawng lung nga ai Abraham ngu ai Jinghpaw la kasha langai mi asak sum mat ai lam chye lu ai.

Bai nna, Zaiwa Htunghking Rung makau kaw mung matut manoi Bawm langai kapaw ai majaw, Num sha ma langai mi laja lana hkala hkrum ai lam chye lu ai. Raitim, hkrung ai kun, si sai kun, ngu ai hpe atsawm n chye lu ai.

Ndai bawm ni gaw kadai kapaw ai re lam hpe atsawm n chye tim, ya ten dai si hkrum, hkala hkrum ai La kasha hte numsha a nta masha ni hpe rim nna san jep taw ai lam chye lu ai.

Si hkrum ai La kasha gaw bum ga de na Shatapru kaw nga ai Jinghku nta kaw jawng sa lung nga ai rai nna, nta masha ni a amu bungli rai nga ai gat seng dut ai ginra kaw shana sa sin yup yup re ai rai nga ai.

Bawm kapaw ai shara gaw lai wa lam ntsa kaw rai nna, dai makau hku gat seng de sa sin na matu lai hkrup ai majaw, kabaw lawm mat ai re lam chye lu ai. Shana nsin re majaw, lam makau kaw bawm jahkrat da ai mung kadai n chye ai majaw ndai zawn hkrup sha mat ai re lam buga masha ni tsun wa ma ai.

Ndai zawn Myitkyina myo kata Jinghpaw kahtawng kaw bawm kapaw ai lam matut manoi byin nga ai gaw, Jinghpaw Wunpawng amyu sha ni galaw ai gaw n rai na re, ngu ai hpe yawng gaw chye taw nga ai lam tsun wa ma ai.

Hkristmas du wa ai majaw, Jinghpaw Wunpawng amyu sha ni a pyaw hpa lam amyu myu hpe jebat ya mayu ai majaw, myit masa majan mung rai na re, nga nna mung sawn nga ma ai.

By: BGSH