Myen Asuya Hpyenla ni Sam mare nat ya
29 November 2011 (Chyanun) ya shani hta rai htaw lung ai,Myen asuya hpenhpung hpe KIA masat (5) dapba hpyenhpung ni Dawhpum yang mare shingdu kaw shani hkying 11:30 am grup-yin hta minite 20 daram hkap gap ai lam chye lu ai. KIA hpyenla ni nhtang wa mat ai hpang Dawhpum yang mare na Myen asuya hpyendap ni gaw amyawk hte grup-yin mare ni de majoi gap bun ai lam mung na chye lu ga ai.
Bai, Myen asuya hpyenla ni gaw Dawhpum yang mare grup-yin na Sam mare ni rai nga ai, htinggaw (60) jan nga ai, Namwai mare hte htinggaw (20) jan nga ai, Hpagyi mare ni de shang wa nna mare nta ni hpe hkan nat jahten ai lam mung chye lu ai. Ndai zawn, Myen asuya hpyenla ni nat jahten ai majaw Namwai mare na nta (23) hta Hpagyi mare na nta (8) hkru hten sum mat ai lam chye lu ai.
Bai, Talaw gyi mare makau, Hukat mare hta mung KIA masat (3) dapdung hpyenhpung ni hte Myen asuya hpyendap ni gaphkat ai hta Myen asuya hpynla marai (3) si hkrum ai hte hkala nba hkrum ai lam chye lu ga ai. Nmawk muklum makau, Namsai mare makau kaw mung KIA masat (3) dapba hpyenhpung ni hte Myen asuya hpyendap ni gap hkat ai lam chye lu ai. Dai majan hta Myen asuya hpyenla si hkrum ai hte hkala hkrum ai marai (8) daram re ai lam KIA shawnglam shiga kawn chye lu ga ai.
Share This Post
