MASA GALAI RA SAI

Dai ni na anhte KIO/KIA a sa wa nga ai mung masa lam yan ni hpe bai dinglik yu nna galai ra ang yang galai ra sai. Ya yang anhte lang ai masa gaw Mung masa/hpyen masa (fire & Talk) lahkawng maga labra nna saw wa nga ai hpe ngai asan sha chye na nngai, rai tim ya yang Tingsing asuya gaw KIO hte mung masa bawng ban na nra sharawng mat sai hpe asan sha mu mada lu nga sai. KIO hpe shiga (media) hku nna mung, jahpoi asawng jahpyak, nteng ai lam ni hpe shapoi, sai garan, maga mi de hpyen n-gun la ba hte htim gasat rai ladat amyu myu hku anhte hpe gasat nga ai re. Ya hpang jahtum na Jinghpaw Mung de dai daram law ai Tat-Ma ni hpe sa let gasat nga ai gaw anhte KIO/KIA hpe maigan hpyen majing hku masat sai ngu ai hpe asan sha mu mada lu nga sai re.
Dai majw anhte KIO a masa hpe asan sha tawk hprut, pra pra rai dawdan nna sa wa ra sai, maga mi de myen Democracy hpung ni hte sa achya ai baw, UNFC mung hpawm hku nna she sa wa na zawn zawn nmai sai, asan sha Awm Dawm Shang Lawt (supreme Independence) rai yang mung dai de asan sha sa wa ra sai, hpa majaw nga yang myen gaw anhte hte nkam bawng sai hpe asan sha mu lu ai majaw re. Awm Dawm zawn zawn, Mung Hpawm (Union) zawn zawn nmai galaw nga ai, aten nnga mat sai, ya yang na mungkan mung masa mawru hta anhte lawan ru lawm ra ai, aten lai magang wa nga ai. Gasat na rai yang mung lawan ninggam shatsaw nna gasat, hkap ninghkap majan (defensive or resistance) hku nna sha nmai sai, htim gasat ai majan hpe lawan galaw ra sai. Sinna mung ni hpe nmai kam mat sai, Miwa mung anhte hpe kau da sai, kaga hpu nau baw sang hpung ni mung anhte hpe kau da magang wa sai, shanhte lam sha myit mat masai. Dai majaw anhte Gam Maka anhte Karai Kasang hte rau daw dan sa wa ra sai.
Dai majaw, Mung Hpawm i? Awm Dawm i? Langai ngai hpe lawan ai hku tawk hprut masing jahkrat sa wa ra sai. Myen hte gaw tsep kawp nmai jahta mat sai, anhte hpe dai daram maigan hpyen hku masat nna n-gun kaba hte htim gasat taw nga sai myen hpe naw agam taw, matsan dum taw ai baw nrai sai, lahkawng maga labra ai ladat (lahkawng bra masa) hpe galai ra sai, bawng ban ai masa gaw htum mat sai hku re, lam maga mi de asan sha n-gun da ting nna sa wa saga ngu ngai hpung woi wa langai hku nna mu mada ai hpe tang madun dat ai rai. Shut yang mung sharai la myit.
Hpung woi Langai
--

JINGHPAW KASA