Anthe W.P amyu masha ni hta ngai grai hkrungga ai kaw Rev. Dr. Lahtaw Gum Se( KTCS Jawng Up Usa) mung lawm ai. Sara Kaba gaw grai si mani ai, hpaji chye ai hte asak kaba tim prat grai dep ai wa re ngu mu lu ai. Masha kaba/kaja, chye ai/n chye ai ni yawng hpe rap rap ra ra hku nna hku hkau let kanawn mazum chye ai wa mung re. Prat dep ai ngu ai hta prat dep ai arung arai ni hpe lu lang ai hte manu dan ai bu hpun palawng ni mari lu hpun ai hpe tsun ai nre. Byin lai mat wa sai, byin nga ai lam hte byin wa na lam ni hpe chye mu chye sawn let asak chye hkrung ai wa mung re ngu mu ai. Ramma ni a ningmu hpe Grai manu shadan chye ai Sra kaba langai Mung re. Sara kaba gaw Kachin theologian/philosopher mung re. Shi a Kachin hte seng nna makam masham/mung masa/ shinggyin nga pra masa - religious/politcal/social perspectives on "the Kachins" ni gaw grai manu dan nga ai.
Shi tsun lai mat ai lam law law kaw nna ngai ya dai ni du hkra naw sharin masing la ai lam langai mi hta:
" Anhte Wunpawng amyu masha ni gaw Seminar-Bawngban-dinglun hpawng ni law law glaw ai majaw grai galu kaba kung zet wa nga ai" nga nna KBC-EC zuphapwng kaw kalang mi tsun sang lang ga ai lam hpe ya du hkra myit dum hkaja sharin la nga ai .Dai sharin la ai lam kaw la kap nna anhte amyu masha ni matu lama mi matsing sharin la lu na nhten ngu myit yu ai hte ngai langai hkrai a ningmu hpe kadun mi tang madun dat ai. Sharai jahtuk ra ai lam nga yang mung jawm tsun/bawngban sharai ya na hpe myit mada ai.
Dai majaw 1947-1962 na mung masa mabyin langai hpe
hpe myit dum ai.
U Nu woi awn ai Myenmung Democracy Parliament up-hkang masa hpe grai madang tsaw ai hku nna gwi gwi shawng nnan ding lun ai wa gaw Jinghpaw mung masa ningbaw langai mi re nga ai Du Wa Zan Hta Sin re. Shi gaw KNC-Kachin National Congress Party kaw na re nhtawm, Rawang amyu lakung kaw na re. Shi a ding lun bawngban ai laika buk-buklet langai mi re nga ai ai, Democracy Byaung Byan" or "Reserved Democracy" ngu ai laika buk gaw anhte Wp amyu masha ni mung masa party ningbaw langai a ning mu ding lu ai lam gaw grai manu dan ai hte grai madang tsaw ai labau langai mi mung re mat sai re. Dai hkring htawng hpe nmai malap na re.
Pangmu Shayi ( May 16, 2015, Kachinland News), Du Wa Zan Hta Sin: A Profile In Leadership hta Du Wa Zan Hta Sin a lam hpe ndai hku ka da nga ai; " As parliamentarian, Zan Hta Sin distinguished himself as articulated debater, always on the ready to speak up for the Kachin rights. Du Wa Zan Hta Sin gaw anhte wunpawng amyu masha ni a matu grai kung kyang ai hku nna, tsun jahta bawngban dara la ai wa re ngu nna mung shi hkum nan mung hkam la lai wa sai re.
Shaloi nye myit karaw kata hta "Seminar-Bawngban hpawng" a lam hpe law law myit mat wa ai. Seminar-Bawngban Hpawng ngu ai gaw Hpaji daw ai hte bawngban ai lam re nga ai . Dai hta e; Research/Analysis/critical thinking/report/feedback/ - Sawk sagawn ai/ding lun ai/tang madun ai/gwi gwi tsun ai hte myit ai/ galaw lai mat wa sai lam ni hpe bai nthang shat lai lai ai-myit yu ai lam ni re nga ai.
Dai majaw Ga shagawp 11:14 hta,
"Hpaji daw chye ai nyan n rawng yang, mung masha ni sum wa ma ai; Hpaji daw chye ai law nga yang, lawt pru shara nga ai."
Dai majaw amyu langai mi lawt lu na matu gaw hpaji daw chye ai masha langai lahkawn hte sha gaw nmai na re, hpaji daw chye ai masha law law ra na re.
Hpaji daw chye ai ni ngu ai hta; ningmu law law nga ra na re. Dai ningmu ni hta Makam masham/Mung masa/Tara masa/Sut masa/Shing ni(Art)/Hpyen masa/shinggyin nga pra masa ning mu hte kaga ningmu ni law law hte hpaji daw chye ra na re. Tim, bawngban ding lun ai lam hta ti nang a ningmu hte manang ni a ningmu ni gaw bung ai aten nga ai zawn nbung ai aten mung nga na re. Raitim, nbung ai majaw anhte ni shada gaw hpyen hku nna gaw nbyin hkra gaw hpaji rawng ra na re. " We agree our disagreement" masa hku re yang gaw anhte bawngban dinglu ai lam gaw grai manu dang ai bawngban dinglun ai lam byin tai na re. Anhte ni yawng mung grai kungkyang zet let ai amyu masha ni tai wa na hpe myit mada ai. Tinang hte ningmu nbung ai yawng gaw tinang a hpyen re nga ai ningmu re yang gaw anhte amyu ni kata hta ning mu n bung hkat ai ni yawng gaw shada hpyen mai tai hkat wa nga ai. Dai majaw ningmu n-bung shagu gaw hpyen hku nna nmai masat hkat na re. Dai gaw kung kyang zet let ai masha/amyu langai ai kumla maka mung re nga ai.
Dai majaw hpaji daw chye ai masha ni law law nga wa hkra jawm shalat/ mazing/ manu shadan sa wa ga.
