SAGU REM KAJA NGU AI KANING RE AI NI HPE NGA MA TA?

   Lai sai ji nat jaw ai ten prat na labau hpe nhtang yu yang, Jinghpaw
Wunpawng sha ni hkarang yi galaw sha let, u, wa, yamnga rem sha ai hta
lai nna, sagu rem sha ai mi n mu lu ai. Ya daini na Hkristan prat hta
rai tim, Jinghpaw ni sagu rem sha ai n mu ai. Langai lahkawng nga yang
nga dam nhten! Rai ti mung, “SAGU” ngu ai ga hkum hpe chyawm gaw, Myen
ga, Sam ga, Miwa ga ni langai ngai kaw na tsun shakap la ai n re sha,
Jinghpaw Wunpawng sha ni a dumsa jaiwa ga dingsa hta nan rawng nga ai
kaw na lu la ai re hpe chye lu ai.  Dai lam gaw, Jinghpaw Wunpawng sha
ni moi chyaloi prat hta, “SAGU” ngu ai dusat myu hte kanawn lai wa yu
sai sakse langai rai nga ai.
   Ya daini Hkristan prat hta chyawm gaw, Chyum Laika hta rawng nga sai
hte maren, “SAGU” ngu ai hpe sumnung shingdi ai, sanseng dingman ai,
si mani temsi re ai; madat mara hkungga la ra chye ai hku lachyum htai
shapraw la nhtawm, “BAINAM” ngu ai hpe mahtang gaw, myit ja ai, myit
shadang ai, lale jehpre ai, myu n jet ai, sawt ai maga hku lachyum
htai la nga ga ai. Dai sha n-ga, “CHYAHKYAWN” ngu ai nam gwi hpan hpe
mung, n hkru n shawp, manawn masham, n ju n dawng, kashun kashe, adip
arip, zingri zingrat, ashep amya chye ai baw Satan dusat hku lachyum
htai la nga ga ai re.
   Bai nna Nawku Hpung Sara ni, Makam Masham Sara ni hpe mung Sagu Rem
ni ngu ai hku sawn la htai la nga saga ai. Yesu gaw, Sagu Rem Wa Kaja
re, ngu ai hpe la kap la ai lam rai nga ai.  Sagu rem kaja ngu ai gaw,
tinang a sagu ni hpe yu lanu lahku makawp maga ai. Ju sumwum e dau nga
ai kun?. Lunghkrung ntsa mara mat ai kun? Chyahkyawn ni e jawm nga ai
kun?  Lagu lagut ni e lagu la nga ai kun? Sagu latsa kaw na langai mi
sha mat tim, mat ai sagu hpe  n mu mu hkra hkan tam ai. Mat mat ai
langai hpe bai mu tam la yang, nga taw chyalu jahku shi jahku hta grau
kabu chye ai. Mat mat ai langai mi hpe mu tam na matu, tinang a n-gun
atsam, baw nu myit nyan, hkum hkrang asak mahkra apnawng nna shakut
shaja ai hpe she SAGU  REM KAJA  nga nna lachyum shaleng lu nga ai.
   Jinghpaw Wunpawng sha ni a buga mungdan hta ya ten majan kaba byin
hkrum nga ga ai. Sagu ni garen gari hkrum nga ai. Lahtaw Brang Shawng
ngu ai sagu kasha langai hpe nhkru ai matse labye chyahkyawn ni e dun
garawt ashep zingri mat wa ya ai hkrum sai. Ngam nga ai sagu jahku shi
jahku ni mung, myit kaji let, hkrit gari let, hkrap myitprwi hte nga
taw masai. Dai aten hta SAGU REM KAJA ni law law wa woi awn nhtawm mat
mat ai sagu kasha LAHTAW BRANG SHAWNG hpe hkan tam shakut shaja nga ma
ai hpe mu lu nga saga ai re. Lahtaw Brang Shawng hpe bai mu la na, bai
n mu la na gaw,  Sagu Madu rai nga ai Karai Kasang she chye sai. Rai
ti mung Karai Kasang a Sape Mayam rai nga ai Sugu Rem Kaja ni chyawm
gaw, tinang a ang ai lit hpe kangka ai hte gun hpai shakut shaja ai
hpe mu lu ai majaw, nachying wa myit dik myit pyaw kamhpa ai lam hpe
hkam la lu saga ai re. Karai Kasang a hkrung ai Mungga hpe mung
kamsham let chyeju dum nga ga ai re. Manoi manat let asak hkrung nga
ga ai re. Jahtum du hkra kamhpa manoi manat nga na ga ai re.
   Sagu rem kaja ngu ai ni nga ai zawn, sawt ai sagu rem ni mung nga ai
hpe mu lu ai. Tinang hkam la ai ga sadi hpe n shatup ai; n shateng ai,
n hkan sa ai sha, tinang a ahkaw ahkang lama ma tat sum hkalut kau na
hpe tsang ai majaw, Yuda Iskarut a hkringhtawng hkan ai sawt ai sagu
rem ni mung  koi yen  mat ai lam ni chye lu ai. Latsa hta na mat mat
ai sagu langai mi a hkrap kadau ai nsen hpe na nga ninglen n na masu
nna, shingnyen a ga jahten rai nga ai ni lawm ai hpe chye lu ai.
Nanhte jaw da ai kumhpa langai nanhte hpe nhtang madun made ga. Mahte
7:22 re. Chyeju kaba sai.

Nra Lunghtawn
2012, July 15 (Laban)