Thursday, July 26, 2012

Hkyen lajang ai lam

Myit rum manang ni,
                                “Hkyen Lajang Ai Lam” ngu ai laika ngau shagun dat ai yaw. Daini Tai wa gaw anhte  hpe shi ra ai hku kade lang Maw Lanyet shachyai  yu tim n mai byin ai majaw, gasat shakre kau  sana de she madung dat ra sai ngu, mahtai  shapraw la nna nut nga  masai. Israela ni myit n su hkraw ai majaw,KK (40) ning dam ari jaw  ai hta, daini anhte  (50) ning jan mat hkra dam ari katut sha ai gaw,  Israela ni hta grau myit n su hkraw  ai majaw rai na re ngu, hkam la ai. Teng man ai simsa lam hpe lu la  na matu kyu hpyi  shaja nga ga ai hte maren, Wpsha  ni yawng KK ra sharawng  ai hku asak hkrung hkawm sa na she kyu grau hpyi shaja ra sai nhten ngu,
JIC
Hkyen Lajang Ai Lam

Wunpawngsha ni a ntsa, Karai kasang a tau hkrau hkyen
lajang da ai lam ni hpe tsun mayu ai. Karai Kasang gaw, “ Nanhte
mahtang Ngai hpe lata la ai n rai, Ngai mahtang nanhte hpe lata la
ai” nga, tsun ai re.

Lai wa sai (17) ning tup, Simsa lam la ai aten nau garawt kau
saga ai; Tai wa hpe anhte aten nau jaw kau saga ai nga nna, anhte
daini myit malai lu kau ga ai. Gajawa mung rai nga ga ai. Tai wa
wanglu wanglang katsi majan hte dam la ai anhte a lamuga ni
majoi madu la kau ai. Shanhte a Hpyendap ni anhte a lamuga ntsa,
Eka sen lam she dam hkra agung ahting shangang shakang galaw
la kau ai. Dai hte maren, Sutmasa lam hta mung, sinat kalang n
shangoi, Hpakant lungseng maw ni, Ja maw ni, Hpunmaw ni madu
sha kau ai.

Shanhte asuya ni gaw lamuga madu mung re ngu ai hku nna,
Malihka kaw na Putao hkyen bum n ngam hkra, kam ai hku shalau
kau ai. Miwa hte matut sha nna anhte a Shanglawt Ginra hkan
kam ai hku galaw sha bang wa ai. Anhte Wunpawngsha ni hpe lai
ladat amyu myu hte shagyip shagyeng, jahkrit shama ai.N ngwi n
pyaw n sim n sa nchyi nmu byin hkra dingsa mi ai. Anhte a
Shanglawt hpyendu hpyenma ni hpe kam ai hku sat kau ya ai;
Numma roi rip sat kau ya ai. Manu dan ai anhte a kashu kasha
matu mara ni hpe manawn masham myit hte manu n dan mat hkra,
katsi majan hte jahten kau ya ai. Anhte a Hpa-awn Ningbaw
Ningla nkau mi hpe myit masin kya mat hkra, mawng kau ya ai.

Ndai zawn, (17) ning lapran sharai la n lu, shabai la n lu ai
sum machyi lam mabyin ni anhte hta masin nsi maroi nni dik hkra,
byin lai mat wa saga ai re.

Raitim, maga mi de yu yu ga. Ndai (17) ning lapran, anhte
hpe SHI a amyu shatai na matu lata la ai Yehowa Karai Kasang

hpabaw galaw nga ai kun? SHI anhte a matu (17) ning tup bungli
law law galaw nga ai hpe mu lu na ga ai.

Myenmung gaw, Hpyen Gumshem asuya a marang e,
Sutmasa lam, Hpaji lam, Mungmasa lam, Shinggyim ahkaw
ahkang lam ni yawng di hkrat hkrat sum mat wa ai a majaw,
Wunpawng Ramma ni law law hpe Karai Kasang gaw, Mungkan
maigan mungdan shara shagu du hkawm mat wa hkra, Shachyam
shabra dat sai re. Maigan du mat wa ai Wunpawng Ramma ni
mung,tinggyeng myit n rawng, Kanu Mungdan hte tsan gang
magang, myit su magang, Myusha lam-yan hpe myit lawm hkawn
hkrang chye na hkam sha magang rai na matu, Karai Kasang gaw
hkyen lajang da ya ai lam nga sai.

Karai Kasang gaw, Computer Hpaji Munu ni hpe machye
machyang jat bang ya ai majaw, 2004 ning kaw na Internet hte
mungkan ting seng ang ai masha shada aloi sha matut mahkai
hkat lu saga ai re. Anhte Wunpawngsha ni shada mung kade tsan
gang ai mi raitim, masha shada n mu n chye hkat tim, myit masin
shada lamu ganghkau kaw aten n lata ai hkrum zup nna, shada
zinlum hkat lu ai hte, kanu mungdan e arau nga yang na hta grau
ngang kang ai pu gang sin machyi tsawra myit kaba ni hpe lu
la ga ai.Dai majaw,daini Mungkan ting de chyam bra nga ai
Wunpawngsha ni yawng, KIO,KIA gaw Amyu ting hpe woi
shalawt na re ngu, kamhpa dik let, 99 % jawm madi shadaw
nga sai.

Karai Kasang gaw, Gumshem asuya hte KIO, KIA majan
kaba byin sana re chye nga chyalu rai nga ai. Wunpawngsha ni
tengsha ru yak tsin-yam hkrum sana hpe mung chye nga wu ai. Dai
majaw, majan garai n byin ai kaw na Mungkan ting chyam bra nga
ai Wunpawngsha ni hte, Miwa, Kalamung na sai rum ni yawng hpe
tau hkrau myit masin zinlum jasu jahprang kahkyin gumdin da ya
sai hte maren, Myenmung ting na Wunpawngsha ni mung, hkam

sha ai lam shawng na hte n bung sai. Moi gaw mare kaba de nga ai
Wunpawngsha ni KIO, KIA ngu pyi hkum tsun. Nam na sharaw
kaba hpe zawn, shing n rai, lawuga na lapu puhtum hpe hkrit ai
hpa she hkrit shajang ma ai.

Lawuga na Myen ni puhtum hpe nau hkrit ai majaw, mying

n tsun ai, Poo (ပိုး) ngu she tsun ma ai.Anhte Jinghpaw ni mung,

bumga e sharaw hpe hkrit dik ga ai majaw, “Sharaw” ngu pyi n
tsun gwi, Maling hkawhkam ngu she tsun ga ai zawn, mare kaba
na Jinghpaw ni mung KIO, KIA hpe mying gang tsun na n-gwi
(Hpyen Asuya hpe hkrit ai majaw) “Wora de na ni” (sh) “Manang
la ni” ngu she, kahte hkra hkra tsun lai wa saga ai. Nawku Hpung e
mung, Sasana magam bungli dabang hkan e mung, KIO,KIA hte
kachyi sha pyi n seng ga ai; ngu ai satlawat hte she nga lai wa
saga ai.

Amyu Shayi langai daram, mare kaba e myusha lam-yan hta
loi li shamu shamawt hkrup, tsun shaga hkrup re ai hpe mu jang,
hkye hkrang la ai n hkrum ai; simsa lam hpe jahten sharun hkyen
ai ngu, mu kau yu kau, shatan kau, hkyet-rung kau, ginhka kau
chye lai wa saga ai. Shagri brep mat ai; shing n rai, teng man ai
lam hpe n chye hkam sha mat ai lachyum rai nga ai.

Raitim daini gaw, Karai Kasang hkyen lajang da ya ai hte
maren, anhte a masin salum ni kahkyin gumdin mat nna, n-gun ja
nga sai. Kadai hpe mung n hkrit sai. Roi rip sha ai mung n hkam
sai. Karai Kasang e Wenyi myi jahpaw ya nna, langai hpe zingri ai
mu yang, langai wa, “ Aka law!” ngu, Mungkan ting na hkra,
marawn jahtau chye saga ai. Tsim-yam hkrum nga ai mungmasha
ni a matu, Mungkan de jawm marawn ya ai majaw, USA ni du

hkra, $ wan 3 garum na nga ndau sai. Sr. Naw Ming mung,

Mungchying Atsam Ningja shagrau sha-a kumhpa kaba hpe hkam
la lu sai.

Myit grai ja ai ngu nna mu mada ai, Z.Ting Ying wa du hkra
pyi, Pangwa jarit Hpundung 6 na hpyen-yen ni hpe sa du gawan
nhtawm, Pu gang sin machyi wa sam ai; “Nanhte ndai kaw grai yu
matsan dum na zawn rai nga myit dai. Pangwa kata de alum ala
wa shingbyi nga marit. Ra mara mahkra yu lajang ya na” ngu,
zinlum nga ai lam na lu ai. Dai wa she, Tsin-yam masha hpyen-
yen ni a myit masin hta, Tai hpyen hte kanawn nna, Tai a ga she
madat mat sai; Z. Ting Ying a shingnip npu kata de shang yang,
Uraw kata na U hpe zawn, galoi kam sat yang sat sha, kam dut sha
yang dut sha rai na hpe tau myit hkrit ai majaw, “N kwi shang
shingbyi ga ai. Ndai kaw tsin-yam hkrum nna nga ai pyi grau shim
na re” ngu ai lachyum hte ningdang kau ma ai lam na lu
ai.Raitim,Myu Tsaw myit grai kaba ai Z. Ting Ying gaw myit galu
kaba hte, Miwaga Hting Chung e naw ala nga ai lam chye lu ai.

Ndai zawn Karai Kasang gaw, anhte Wunpawngsha ni hpe
jau jau kaw na shada grau tsaw ra sin dun sumri ngang kang mat
hkra hkyen lajang da ya ai lam hpe, sakse loi sha mi garan gachyan
dat ai rai.

Matsing ;
; Z. Ting Ying gaw, Miwa Communits Party shang
masha mung rai, Myen BGF shang masha mung rai re ai; anhte a
Wunpawng Myu tsaw masha kaba langai rai nga mali ai. Ya
yang shi gaw, Myen dinglawa hte hpawm nna, Pangwa kaw Ka-ni
Nanghpam jak-rung kaba gaw-gap nhtawm, ningsin bungli kaba
hta dum nga ninglen hka yawng ai hpa, sharai la n lu, hkye
hkrang la lam n mu rai; matsan mayan htani htana tsadan a lata hta,
tsin-yam majing hkrum nga ai wa re.

Shanglawt Tsing

(26.7.2012,12:15 AM)