Lapyin bai jat ga

Mungkan hta kaji dik ai mungdan ni kara hku up hkang ai hte kaning rai shanglawt lu nna mungdan hpe kara hku chyawm gaw gap sa wa ai lam hte mungkan hta n'gun kaji dik nna kaba dik ai hpyen n'gun hpe dang agrawp kau lu ai hpe mung myit shachyaw dinglun yu nna n'gun kaba kalang bai ban sharai la na hte madu lamu ga ginra hpe ten kadun hta zing madu la lu hkra ya jang myit makun gasat ra sai.      Dai ni na ten Myen hte Miwa a lapai lahkra 2 maga chyawm dum ai lahpawk lapran kata kaw annau ni a lamu ga hpe kalang bai tat shamat kau na masa kaba de yawng wa nga ai hpe dum chye mai ra sai. Moi U Nu dut sha kau ai Hpyi Maw, Gaw Lang, Kum Hpang, Mung Mau zawn re ladat hta grau sawng ai kumla masa kaba yet yet hkrang bai pru wa ai hpe mu lu wa nga ai. Annau ni a prat janat Jiwoi Jiwa ban kaw na madu ai lamu ga hpe myen gaw sat nat zingri nna dasang singgu kyin byin hkra ladat tam galaw nna Miwa mung jarit du annau ni hpe gawt htu matsut bang tawn sai re. Dai kaw Miwa mung laknak arung arai, ja gumhpraw, sut hpaga, zai ladat yawng hte Myen hpe garum nga ai hta n'ga annau ni a saidaw saichyen hpyen yen tsin yam ni hpe mung shinggyin nauna myit kachyi mi pyi n'rawng ai htingbu kaja langai hku mung n'tsap ya ai, myi di shim hpyen yen ni hpe dusat zawn n'htang gawt taw nga ai gaw sung dik ai masing masa kaba langai de dun bang wa nga ai.                       Annau ni n'gun kaba galung nna lamu ga shara ra kaw du hkra  htim htu gasat madu la kau ra sai. Le kaw kachyi mi waw kaw loi mi rai kapaw chyai nga yang kaya ai kaw masawp n'hkra ai zawn rai nga ai. Shaning galu majan chying hkraw galu ai hpa majaw ta? Shaning 60 ning hkawt byin hkrum hkra lai wa sai mung masa hpyen masa hpe n'hti n'htang ja ja li li kalang bai sawn ding lik yu ra ai. Hpyen zai ladat hpe mung lai kau ra sai ngu mu ai. 1-    Tsit tsawm manu dan dik ai annau ni a lamu ga hpe tawt lai shang kabye jahten sharun nga ai chyasam ta gatsing lagaw katsing ni hpe n'htang gasat shamyit kau ga. 2-    Annau ni hpe shangai shaprat bau maka ai chyinghkai Kanu ni hpe shinggyin roi rip ai dusat myit sha rawng ai hpawdam ni hpe n'htang gasat shamyit kau ga. 3-    Myu sha Jinghpaw mying ai yawng hpe mara kata sat nat zingri roi rip sat shamyit nga ai jahtawng n'htu ai myu hpe n'htang gasat shamyit kau ga. 4-    Dum n'ta du sat yam nga sut rai yawng hpe mya la jahten sharun nat jahtum nga ai matse labye ni hpe n'htang gawt shamyit gasat kau ra sai, Amerikan mungdan gaw mungkan mungdan shara shagu na myu sha ni sa hkrum zup shanu nga nna mungdan kaba re zawn myu hkum ai zawn hpaji mung hkum dik ai mungdan re, dai mungdan shara shagu kaw nna sa shanu nga ai ni yawng gaw hpaji myu hkum hkra sharin la nna Amerikan mungdan a matu tinang mungdan kata na mabyin masa ni yawng hpe Amerikan asuya a matu chyawm sawk karum ya nga ai majaw Amerikan mungdan gaw ningmu hkum dik ai hte n'gun ja dik ai mungdan byin nga ai re. Dai ni Miwa mungdan mung hpaji sharin jawngma law law hpe mungdan shagu de dat shabra nna mungkan hpe jumtek gang gayin kau lu hkra hte mungkan hpe ladat hkum hkra ka-up sha lu hkra shakut nga ai. Masing kaba jahkrat galaw nga ai re.           Dai majaw Chyurum ai hpunau ni e mungkan mungdan shara shagu shanu nga ai annau ni yawng mung tinang du nga ai mungdan na hpaji sharin la ai hte dai mungdan ni hpe annau ni a htunghking labau hte KACHIN ngu ai hpe shachyen ya lu hkra galaw ra nga ga ai zawn, Kanu Mungdan hpe mung ningmu hkum hkra hte hpaji chyawm jaw chyawm garum ai rai yang shanglawt gaw nau n'tsan na sai re ngu mu ai. Masha amyu ni hkying hkum mi galaw shakut yang annau ni gaw hkying hkum 2 shakut yang she masha lahkam prat lahkam dep lu na re ngu mu ai. Madu lu tam la ai ja gumhpraw mung hpyen yen ni a matu kachyi mi sha rai tim shat da law law hpe lu shatawt na re.              Lamu ga daw mi chyen mi sha pyi htim gasat di la kau ra sai, Laiza jut kaw yup hprang wa yang lanam laru hpundaw hka ka-up wa na hpe myit shingran yu ga law. Jiwoi jiwa ni jungda ai dawhpum shadaw kachyi mi pyi n'sit nu ga. Hpa rai n'chye shi ai ma ni hpe n'dang matsan dum mat re sai.             Myu kata kaw shan kata kaw byet kanu bai pru jat wa ai gaw annau ni hpe Karai Kasang jaw ai Shanglawt lu na ten grai nyi wa sai re ngu myit la nna, ten hte rau lawan gasat shamyit nang ra sai. Myit ashun chye wa ai ni hpe n'gun kaba hte lawan gasat shamyit dan ra sai. Baren Numraw 13/07/2012 By.jpks