Karai Kasang (KK) gaw ginding aga hpe hpan shalat dat ai shani kaw nna satan hpe mung hpan da sai lam ja chyum laika kaw mu lu nga ai. Satan gaw shinggyim masha hta alak mi grau zen ai rai nna, Adam yan Ewa hpe mung gunglau wa lu sai.
Sung sung dinglik yu ga nga yang, KK gaw satan hpe machye machyang jaw da ai zawn, Adam yan Ewa hpe mung jaw da sai. Raitimung, shan gaw KK jaw da ya ai machye machyang hpe lang nna dinglik maram yu ai lam n-galaw ma ai rai nna satan a man kaw aloi sha kataw ya manu ai. Shing rai satan wa kade gunglau chye ai lam shinggyim masha ni mu chye la lu na matu Madu Yesu a hpang kaw 40 ya tup hkan nang shangun nna gunglau wa ai raitimung, Madu Yesu gaw KK jaw da ya ai machye machyang hpe lang ai majaw satan wa mahtang Madu Yesu hpe asum jaw wa sai lam kasi hku nna madun da ya nga ai.
Shing re ai mabyin masa a ntsa e dinglik yu ai shaloi, KK gaw satan wa hpe grin nga shangun ai hte seng nna dinglik yu yang shinggyim masha ni gaw KK jaw da ya ai machye machyang hpe asung jashawn chye nna zen wa na matu rai na re ngu nna myit la mai nga ai. Maga hku nna dinglik yu ai shaloi, tinang hpe jahten sharun ai wa kadai raitimung, tinang a hpyen, shing nrai satan wa rai nga ai. Tinang hpe jahten sharun ai ni kaw na tinang hte ni dik htum ai wa gaw kadai rai ta? Atsawm myit yu ai shaloi tinang a prat hpe lam dingtawk hku jahten sharun kau ai gaw tianag nan tsa lu ai majaw, kani lu ai majaw, hpai da da ai majaw she rai nga a hka! Dai majaw ni dik htum ai hpyen gaw tinang nan rai nga ai hpe mu wa sai.
Dai hta n-ga, tinang lu sha shajan sha ai majaw dinghku masha ni hte ga li ga law byin wa sai. Shing rai tinang a dinghku masha ni gaw tinang a hpyen nambat 2 rai wa sai. Aga! Kaning wa di sana kun? Grup yin kaw hpyen hkrai hkrai she rai mat sai. Tinang hte ni kahtep nga ai hpyen nambat langai hte lahkawng hpe lu gasat dang kau lu jang she gumhpawn ai dinghku masha a n-gun hte shinggan na hpyen wa hpe gasat dang kau mai na re, ngu ai hpe mu wa sai. Shinggan hpyen gaw kadai rai ta? Anhte Wunpawng Myusha ni hpe shamyit kau na matu dating nga ai satan wa rai nga ai.
Dai satan a maumwi mausa hpe “MYANMAR ATSA, DAGONG KA” nga nna shanhte nan ka tawn ai hpe dai ni gaw “MYANMAR ATSA, KABA U KA” nga nna manu shatsaw la masai. Anhte gaw shanhpyi laika hpe ju sha kau saga ai majaw tinang a labau hpe myen ni hte shan hpraw zawn re ai ni ka da ya ai hpe madang shatsaw nna gram ka la na malai, shada dang rang hkat ai aten naw rai nga ga ai. Ante yawng jawm na dep, mu dep ai satan wa a lam kade matse ai hpe dinglik yu ga.
Hpa mara n nga ai htingbu Assam hkaw hkam, Yahkaing hkaw hkam, Mon hkaw hkam, Thai hkaw hkam ni hpe hkan zing la nna mung masha ni hpe zing ri zing rat sat nat kau ai lam, Myen kaw sa up sha nga ai British ni hpe shachyut shapraw kau na matu Japan ni hpe sa pang la nna shachyut shapraw lu ai hte Japan ni hpe bai ninghkap sai. Satan ni ngu ai gaw chyeju n chye dum ai baw re hka!
Satan wa a asuya hten run mat na mahka e Miwa asuya kaw nna shang hkye la ai hte satan wa gaw nsa matut sa lu nu ai. Dai chyeju hpe shaprai na matu satan wa n ju dik ai Ma Kaw jan hpe shanyam la nna sinna masha ni hpe jahkau la n htawm shi a chyeju madu rai nga ai Miwa a ladi kaw htawng ya manu ai. Lang hte lang Myen mung hpe hkye wa ai Wunpawng Myusha ni hpe mung chyeju n dum ai hta n-ga, 1994 ning kaw gap hkat jahkring ai shaloi tawn da ai ga sadi ni yawng hpe langai a hpang jahten sharun wa sai. Ya gaw Wunpawng Myusha yawng hpe shamyit kau na matu masing jahkrat n htawm mare masha ni hpe hkan rim zing ri sat bang wa masai. Shanhte tsun ai hta, “Hka nnga ai kaw nga n mai nga ai zawn, mung masha n nga jang, KIO ni mung n nga na sai, nga ma ai.
Satan wa a masing gaw ladu lai sai. Masha amyu langai hpe shamyit kau na, ngu ai gaw Yehowa nan n hkraw sai. Wunpawng Myusha ni n yup n sha kyu hpyi ai hpe Yehowa matsan dum lama la sai. Majan gasat poi shagu kaw Yehowa lawm ya nga ai hpe asan sha jawm mu nga saga ai. Anhte gaw aten langai kaw malap mali rai, tinang a hkum hpe tinang a hpyen shatai wa saga ai majaw grit nem wa saga ai rai nna, dai ni gaw bai dum hprang wa ai lamik hpe mu wa saga ai.
KIO, KNO, KDA, NDAK, Du Kaba Lasang Awng hpung, Du Kaba Adang hpung ni in a lapran kaw satan wa kade sumprat bang timung, shada a ntsa e myusha lam yan hta hkan nna myit tau ya hkat ai lam nga wa magang sai. Ndai zawn rai mungdan kata kaw galai shai wa ai gaw, KK a myit shanu ya ai marang e, maigan de du nga ai myutsaw hpu nau ni a ngang kang ai kahkyin gumdin lam madun dan lu ai sakse rai nga ai. Ndai mabyin masa gaw daw dan nlu ai amyu a kahkyin gumdin lam lu wa ai lamik kumla rai nna satan wa gaw Wunpawng Myusha ni a kahkyin gumdin ai n-gun hpe asum jaw ra ai ten rai wa nga sai.
Maigan de du nga ai myutsaw hpu nau yawng hte chye nga sai hte maren, mungdan kata kaw nga nga ai hpu nau n kau gaw tai hpyen wa a lata kaw na hpawng yen n lawt, zing ri zing rat ai kaw asak hkrat sum ai ni mung hti n dang rai nga sai. Asak naw hkrung nga ai ni gaw hprawng yen hkawm ra nga ma ai majaw dum dum di di hkrum shaga na matu ahkaw ahkang nlu ma ai. Raitimung, maigan de du nga ai myutsaw hpu nau ni gaw nlaw nla re ai shabri shabrai kaw na buga de tsi mawan, malu masha, machyu pala a matu dang lu ai atsam hpe myit mang langai hte jawm garum nga ai hpe mu lu yang na chying myit n-gun lu ai law.
Mahtai gaw, maigan de du nga ai Wunpawng Myusha ni gaw myit mang langai sha rai nga sai hpe myit n-gun, masha n-gun, wenyi n-gun yawng kahkyin gumdin nga sai hpe sakse madun lu ai marang e, buga de nga nga ai hpu nau ni hta mung yen kau nlu, kahkyin gumdin wa magang sai. Matut nna, tinang myusha ni hta n-ga, kaga hpu nau myusha ni hte mung, magyep kap nga sai kaw n-gun grau kaba wa hkra shakut sa wa nga na masai ngu kam let ngang hta hpa ra jat hku n-gun jaw dat nngai law.
Pyilan
