Daw-(1).
Gap jahkring (Casefire) hte Simsa lam (Peace) ngu ai hpa rai ta?..(10) ning Jawng ma hpe sa san tim pyi chye nga ai. Gap jahkring/ Casefire= N-gap hkat saga=Hkring saga= kade gap hkat tim Lachyum n-pru ai.Machyu pala shama she re. Dai majaw matut nna n-gasat hkat saga…ngu ai lachyum rai nga ai.
Raitim…Myen ni a Gap Jahkring (Casefire) gaw dai hku lachyum n-rai nga malu ai. Gap ai gaw jahkring ai. Raitim shanhte Gap mayu ai shaloi Gap, Jahkring mayu ai shaloi bai Jahkring rai taw nga ma ai. Shanhte hpang maga de na grai sum machyi wa na zawn rai jang… Bai Hkring(Shn) kaga de Hpyen man yawng mayu jang(shn) Gayin gasat mayu jang gaw chyahkring mi gan hkring masu nna, ngut jang… Bai Gap hkat saga… rai wa sai.Ga Jahten ai Sing Nyan hte “Dahkyaw Dalam” sha rai nga ai.
Yawng chye ai hte maren- Myitkyina zuphpawng kaw myit hkrum da ai Statement (7) hpe teng sha shangang shakang nna, Bungli hpang taw nga saga ai…ngu ai hku 2013 ning July shata (23) ya shani Shatapru Shanglawt Rung kaw “ Technical Advisory Team” hpe hpaw hpang masai. U Awng Min wa mung- Jinghpaw Bu Hkang bai bu hkra rai, n-chye ai ni yu yang gaw- kanang na Lahtaw La Wa kun? Maran La Wa kun? nga na. Teng sha nga yang Myen Group ni yawng hkra gaw- U Tawng Hpyi hpun da ai U Hka ni sha rai nga ai. Kade ya hkam na kun? Shata kade hkam na kun? Myen ni hku nna gaw n-dai “ Tech/Team” hte Democracy Mungdan de teng sha Lagaw lahkam hkam sa wa nga saga ai…nga nna Mungkan de Shiga shapoi,Myiman la ai lam sha rai nga ai. Kabu hpa rai na kun? Mani hpa rai na kun?
Laika ka ai wa gaw- Tinang a Lahpa n-pu hpe tinang bai n-htang gajuk la nna she mani dung taw mat mayu sai. Hpa majaw ta? nga yang… Shanghte galaw ai Trick (Ma Akawoit) gaw, July shata htum maga de galaw na Myen Mung ting Gap Jahkring Signature hte seng nna “Namhtan Tawng” jaw sha masu ai lam sha rai nga ai. Mungkan a man hta- Anhte Myen ni gaw tsun ai hte maren galaw ai ni (shn) Sadi dung ai ni rai ga ai nga, madun dan masu nna, maga mi hku nna Mung Masa, Hpyen masa,Sut masa lam ni amyat htuk mat wa ai lam sha rai nga ai.
Myen Mung Simsa wa sai(Peace) byin nga saga ai ngu ai lachyum hpe Tech/Team hpaw poi e Myen Hpyen Du ni Wa (35) yawng dawng hkra mani Ahawt Nying dan nna, La hpawk dum taw ai Sumla/ Shiga ni hpe Mungkan de madun dan nna- Hpyi sha ninghpang bai tam wa ai lam sha rai nga ai. Lam mi hku tsun ga nga yang- 2014 ning Asian Ningbaw Tingnyang lu dung na matu hte Lahpaw si langai hte U manga, kru Gap hkra lu hkra (shn) (Myen hku)- Kalang Kahtam yang Daw mali, manga,lu dumhpyawt di na matu Maw Lanyet ni hkrai rai nga malu ai.
N-dai Tech/Team hpaw Poi hta(U-N) Dat Kasa Miss-Marianne sa du ai hpe mu mada lu nga ai.Kabu hpa re. Chyeju dum hpa Sakse rai nga sai. Miwa ni gaw kanang sa makoi mat ma ai kun? Makoi ai…ngu ai hta Myen hpe jai lang nna,Myen mung hpe gara hku Krawk sha,Manaw sha lu na lam Nyan daw taw nga sai re. N-dai Team Hpaw Poi hta- Sara kaba Sumlut Gam hte U Awng Min ni sha sa du ai hpe mu mada lu ai. Du Kaba Gun Maw n-lawm ai mung grai hkrak sai. Shat Makai gun sha hkyam sa mat saga ai. Raitim kaga Myitsu Salang ni sa shang lawm ai hpe “Shut ai”…ngu nna gaw n-tsun mayu nngai.
Shanhte Myen ni(Ka… ga) nga yang hkan (Ka…), (Manawt ga)… nga yang hkan Manawt lawm nna anhte lu la ging ai Ahkaw ahkang yawng hkra hpe Ahpu agung nna la da ra na Ten mung rai nga saga ai. Myen ni bai Masu na, N-masu na, Sadi dung na, N-dung na gaw anhte hte n-seng ai. Ahkyak ai gaw- shanhte bai Htawng hkat ga nga ai shaloi. Yup Kalang hprang mi rai rai..(O-K …I am Ready)- ngu lu na matu hkyen tawn, lajang tawn, jahting tawn da ra na ga ai.
Myen hpe n-kam tim kam Masu. N-mani dan mayu tim, Mani dan Masu nna,Myen ni kade ram lu Masu, lu Hkalem na ma ai kun? ngu ai hpe…Kraw hta lagu mani let, shanhte a Lagaw Lahkam ni hpe Myi pyi n-grip hkra azi mada, maram dinglik yu taw nga na sha ahkyak dik rai nga ai. Laika ka ai wa hku nna grau mani Hah..Har mayu ai lam langai mi gaw- Simsa lam matut nna tsun jahta ai hta- Awng San Suu Kyi lawm wa na..nga ai Shiga rai nga ai. “Kumshu Pa ASSK” sa lawm nna hpa wa lak lak lai lai sa chye byin wa lu na da i? Let Padawng Manghkang kaw na zawn, ASSK hpe Myen Hpyen ni bai jai lang na lachyum sha rai nga ai. Mung Masha hte ASSK hpe adawt hkat shangun nna ASSK hpe yawng hkra N-ju mat na matu Maw Lanyet sha rai nga malu ai. Simsa lam hta ASSK shang lawm wa nna kadai wa Aten htum hkam kabu Aw law taw nga na rai ta? Teng sha nga yang ASSK gaw “Law” hte Jawng ngut tawn ai mi nga tim, Mung Masa kaw shang lawm yu ga ai wa n-re. Machyi taw nga ai Kanu Daw Khin Kyi hpe wa gawan ai Ten hte 8888 Jawngma ni Kasu Gabrawng wa ai ten, Awng San a kasha re nga Mung Masa lam de dun garawt bang hkrum ai lam sha rai nga ai.
Myen Mung a Mung Masa lam hta ASSK hkan pa ra nang wa ai lam sha re. Mung Masa mahkrum madup mung n-nga,Mungdan a Labau hpe pyi hkrak n-chye ai lam hpe ASSK tsun ai Ga hkum, Ga si ni madat yu nna chye na lu nga ai. Hpaji chye tim, Mahkrum Madup Experience nnga ai Wa gaw Hkauna lu tawn nna Dumsu n-lu ai Masha hte bung nga ai. Gara hku Mungdan a Democracy Ningbaw Ningla tai wa lu na rai ta? Myi n-pu na mu taw ai hpe sha gaw kadai mung chye tsun ai hkrai re. Kadai mung Masha na ra hkra chye shanyam ai hkrai re. ASSK hpe Democracy Ningbaw Ningla tai shangun ai gaw Hpyen La hpe Mam hkai shangun ai hte bung nga ai.Ya hpang daw de ASSK a tsun shaga, galaw hkawm sa ai lam ni ma hkra gaw “Lamu hte Ga..Nai Lap hte Lahpra” byin mat salu ai. N-hti n-htang, U Di matu tam n-mu rai,gara gaw Baw re ,Lagaw re pyi n-chye mat salu ai. Hpa majaw dai hku byin a ta? Myen Hpyen ni a U shoi shoi katut nna,shi aHkum hpe pyi shi n-madu lu ai majaw rai nga ai. Dai U shoi shoi hkrum ai ASSK…Simsa lam hte Gap Jahkring kaw sa shang lawm nna, hpa kaga lak lak lai lai Mahtai pru wa na lam nnga ai. Dai majaw anhte hku nna ASSK hte nau n-bawk hte ai sha, Myen Hpyen Du ni hte mahtang Dara hkat,Nyeng hkat,Adawt hkat nna anhte Ra ai Ahkaw ahkang ni hpe lu hkra hpyi la, Nyap la ra na gaw n-dai Ten nan rai nga saga ai re. “Num chyau chyau yang La si ai” nga Jinghpaw Ga Malai nga ai hte maren ASSK hte gaw nau n-chyau chyau ga ngu mayu nngai.
Mung Masa hte seng nna mung- NLD..ngu ai gaw ASSK a majaw, ASSK mung Kawa Bochuk Awng San a majaw Mung masha ni ASSK lawm ai NLD hpe Me bang nna,1990- ning hta Me 85% dang mat ai lam rai nga ai. Kawa zawn ASSK mung mi mai kam na kun? nga Hpun N-dung de htu shalun taw ai lam rai nga ai. Raitim dai ni ASSK hpe Myen Hpyen ni bai ahpyawp nna woi hprawn sha mat wa jang-(NLD) U Tin Oo, U Win Tin ni hte NLD Party ni hpa Ga hkaw mi mung n-chye tsun shaga mat masai. NLD gaw Zero/Kaman sha rai mat nga sai. Majoi Sign Board sha shakap da ai Party sha rai mat sai. Tinang kaw Atsam n-nga ai Num Labu (ASSK) hpe sha kam nna Party hpaw ai NLD ni- gaya kahpa rai nga sai. Manang a Ladi kaw na N-sa sa mayu ai NLD ni Ladi pat, N-gup pat mat manu ai. Dai hte maren Num Labu a hpang kaw na (shn) ASSK hpe Ninggang Cover shatai nna Mungkan hta myiman tam taw nga ai Myen Hpyen asuya ni mung-“Apalar” sha rai nga ai.
Ya gaw- Myen Hpyen asuya ni jai lang hkrum ai ASSK gaw Shaba si Chyalang tai mat sai re. ASSK Simsa Lam kaw sa lawm yang- U Loi a Hkyi law she rai law. Myi maza, Na maza pyi she re. Mungkan ting mung ASSK hpe Myen Mung galai shai wa sai nga Masu ai wa (Untrue Lier), Mung masha hpe shingdu dat kau ai Democracy Masu jan nga hkyet rung jawng taw mat masai. Dai hta grau gaya kahpa gaw- ASSK Thamada grai byin mayu ai da. Mani hpa hkyet rung hpa she rai sai. Ahnar gade marin ai ngu ai shi a Kraw kata na lam hpe tsun kapawk pru wa ai gaw- Sari kachyi mi pyi n-rawng ai,Standard n-nga dik ai lam ni nan rai nga sai. Dai sha n-ga…South Korea du ai shaloi mung- Gumsan Magam/ President grai galaw mayu ai nga.. Interview hta gaya n-su nga bai kahtap tsun dat ai majaw, Korea ni pyi grai mau jawng mat ma ai. Maigan kaw dai zawn nga sa tsun ai gaw Munghpawm Mungdan a matu grai Sari hkrat ai lam rai nga ai. Gaya Kahpa mung re. Democracy ngu ai gaw tinang ra ai, byin mayu ai hpe galaw la mai ai Mung Masa Lam n-rai nga ai. Mung Masha a Ra sharawng ai lam hpe mahtang she Tinang gawng malai tai nna hkan galaw shadik shatup ya ra ai Gumrawng Gumtsa Mung Masa lam rai nga ai. Dai majaw Tinang byin mayu ai lam hpe madung dat nna “Ngai President grai galaw mayu ai” nga n-na tsun pru wa ai ASSK gaw… Democracy Myit jasat rawng ai Wa n-re…ngu hpe Asan sha chye na lu mat sai re.Dai majaw Mungkan ting AASK hpe “M” Kaba the Mau mat masai. Ya dai ni… ASSK hpe shakawn na,shagrau na, Sumla/ Photo rau Gayet nna Arawng la na Masha ni Shat Makai hte hkan tam tim pyi lu sana n-re. ASSK a Mying gaw Krung Sinwa de hkrat bang mat sai salu ai. Nau chye nau lai..Gwi Hkye Du bai..ngu ai dai nan rai nga sai.
Thamada byin jang she Mung masha ni a Ra sharawng ai lam hpe grau lu galaw ya lu na re nga Mung Masha ni hpe hkan Asawng Organize galaw nna, kaja wa Thamada byin jang gaw Hpyen asuya a matu sha bai rai mat na gaw chye chyalu rai nga ai. Moi mung Rap daw Dat Kasa tai na matu Kayin Mung daw Kawmu Ginwang hku nna, Kayin mare e sa nga, Kayin n-ta kaw sa rawng, Kayin Yuptung jahpan kaw sa bang rai Ra lata poi shang wa sai re. ASSK a Kanu Daw Khin Kyi gaw Kayin re majaw ASSK mung- Kayin Mung kaw Ra Lata sa shang jang, Kayin ni yawng hkra shi hpe Me bang ya na hpe tau hkrau sawn da chyalu rai nga lu ai. Dai majaw mung ASSK gaw Me law htum hte Kawmu Ginwang a Rap Daw Dat Kasa kalang ta lu mat ai hpe mu mada lu ai. Kawmu mare ngu ai Yupmang pyi n-mang yu ai ASSK gaw (Kayin)…ngu ai mying dut sha nna Rapdaw Dat Kasa kalang ta tai mat sai re. Dai ni Kawmu Ginwang a matu ASSK galaw ya ai hpa baw nga a ta? Hpa n-nga ai.
Teng sha nga yang- ASSK gaw Kayin ni hpe grai tsawra nna n-rai. Rapdaw de lu shang na matu Kayin mying hpe dut sha kau ai lachyum sha rai nga ai. N-dai kaw san mayu ai Ga san langai mi gaw- ASSK hte Hpyen asuya ni gaw Yuptung jahpan hpe dan dan leng leng Masu nna Tara shang hkra mai galaw la ma ai da i? Kayin Mungdaw kaw nnga ai masha langai mi hpe Kayin Mungdaw na masha re nga- Hkringdat hpe kam ai hku mai ka la,galai bang la mai ma ai da i? Mahtai gaw asan sha rai nga ai. Hpyen asuya hte ASSK ni a matu Constitution ngu ai Gawda ai Tara gaw shanhte a N-gup kaw sha re…ngu ai lachyum rai nga ai. ASSK a Kanu gaw Kayin rai nna, Kawa Bo Chyoke Awng San mung Myen n-re. Bochyuk Awng San a Kawa gaw “U Hpa” nga ai.. “Hkang” (Ashu Chin) re lam hpe 2013- ning June shata na Internet Shiga hta Bochyuk Awng San a Dinghku Labau (Family Tree) e mu hti lu nga ai. Ashu Chin (Pa Layang e nga ai HKang) ni gaw Myen mying shamying nna, Budda naw ai ni tsumra mi nga ma ai. Myen mung a ka-ang daw (Maye Latt Paing) Pyinmana grup yin gaw Hkang ni a nga shara ni rai nga ai. Ga shadawn Tonggoo grup yin kaw Kayin ni nga ai hte bung nga ai. Myen ni a Daidaw Buga Native gaw Gala Mung India Ga she re. Myen ni gaw Shan Maw chyang amyu (Nyu Me,Cha Tu Lan) ai ni rai nna, Gala kaw na yu hkrat wa ai ni rai ma ai. Myen ni gaw- shanhte a Hkum hpe shanhte Gala re pyi n-chye ai gaw Mani hpa rai nga ai. Shwebo masha ni hte Gala ni hpa naw shai a ta? Achyang hkat hkat re ai ni hkrai rai nna, N-gup mung-Matsat shabat re ai, Ya Man(Kun-Ya) grai sha ja ai kaw na hkawt, Gala hte grai nan bung nga ai. Pagan Prat na Myen Num ni gaw Gala Num ni zawn “Sa Ri” hpun lawai ma ai. La ni mung Matu n-chywi ai “Tawngshe Pasu” bu nna, Kara Jawti (Yawng Htung)tawn da ma ai.(ABidama Yaza Tawka Min)….ngu ai gaw Gala mying rai nga ai. Abidama= Boik Mying, Yaza= Gala hku gaw Ra Ja nga ma ai. Tsawbawa (shn) Hkaw Hkam, Tawka= Masha Mying, Min=Hkaw Hkam…rai nga ai.
Kadun dawk tsun ga nga yang Myen ni gaw India Raja=Gala hkaw hkam amyu rai nna, Masu magaw, Hkalem hkalau rai, Myit Kyang n-kaja ai hta n-ga,Lagu Lagut Masu Magaw rai Kawa Hkaw Hkam Wa a Madu Jan (Mi Hpaya) hpe pyi n-ngam ai- sa shut ai majaw India kaw na gawt kau (Pyi Nindan) hkrum ai amyu ni re. Thagawng kaw du ai shaloi she- Gala mying hpe magap shamat kau nna, grai wa zawn nga- Nat Kaung Nat Myat (Bramma Gyi Lay Ba) a Mying la nna…(Bramma) amyu wa arai wa sai da. (Bramma) kaw nna she (Myanmar) ngu ai mying de N-sen gale mat wa nna, dai ni du-“ Myanmar Atsa Thagawng ka” nga taw ma ai re. Myanmar nga ai mying shawng lu hpang ai gaw Thagaung Prat kaw na re… nga ai hku re. Raitim-Thagaung Prat a shawng e nanhte Myen ni ganang na rai myit ta? ngu yang shanhte n-chye tsun mat sai. N-chye tsun ai ngu ai gaw Kawa a Madu Jan hpe shut nna Gawt shapraw hkrum ai N-tsawm ai Labau,Madat n-pyaw ai Labau hpe shamat magap kau ai majaw shanhte Myen ni a Rudi N-pawt Labau hpe n-chye mat ai lam rai nga ai. Rai yang- ya na Myen ni a Labau gaw jaw a ta? Langai mi mung n-jaw ai. Masu ai hkrai re. Makam masham hte Laili laika ni yawng hkra mung- Teng sha nga yang Gala,Mon,Rakhaing hte Thai ni kaw na Copy hkrai rai nga malu ai. Hpang jahtum Myen Mung Shanglawt lu ai kaw du hkra Bo Chyuk Awng San hte Myen ni Japan hpe agying gasat shaten kau nna she lu tawn ai zawn zawn Myen Mung a Labau Masu hpe tsun taw,hkai taw, Jawng laika hkan sharin taw nga ma ai. Gaya kahpa rai nga ai. Raitim Myen ni gaw Labu n-bu ai Gwi ni Gaya n-chye ai hte maren sha rai nga ai.
Dai ni na Myen Hpyen asuya ni gaw-“Burma”…nga ai mying hpe Moi Englik a Mayam prat na mying re nga n-ra ma ai. Bama…ngu ai hpe Englik ni Ga si garan nna- Bur Ma….ngu kau ai hta, N-sen mung n-brat ai majaw Bur Ma= Burma byin mat ai hpe shanhte Myen ni n-myit dum nga ma ai. Lam mi hku tsun ga nga yang Bama…nga jang gaw shanhte Myen ni hpe hkrai tsun ai lachyum hku mung byin wa ai majaw- Mungchying sha ni yawng hkra hpe lu up sha na matu grai si mani ai lachyum, Ga n-sen hte “Myanmar”.. nga ai hpe jai lang nga ma ai re. Ne Win Prat hta-“Pyitu Paing”..nga grai madat pyaw ai zawn nga tim..teng sha Madu ai/Paing ai wa gaw…Ne Win sha rai nga ai. Laika Ga hkum, Ga si, Ga n-sen hte Masu sha ai lam amyu mi rai nga ai. Mying gaw Myanmar..nga nna mi shamying mying, Shwe Myanra, Kyee Myanmar, Sein Myanmar nga nna mi shamying mying- myit Masin Matsat shabat rai jang gaw-Gwi gaw Gwi, Chyahkyawn gaw Chyahkyawn sha rai nga ai. Atsawp sha galai nna, Kraw kata de gaw Tsu, Yet rawng taw nga ai (Lup Wa) hte bung nga ai.
Lahta e tang madun lai mat wa sai hte maren- Bochuk Awng San hpe(Hkang) re chye jang..shanhte Myen ni Labau kaw na shamat kau hpang wa masai re. Teng sha nga yang ASSK gaw Hkang/Kayin rai nga ai. Budda naw nna Myen mying shamying tawn ai Bochuk Awng San hpe mung, dai ni du Myen naw shadu taw ai lam rai nga ai. Miwa amyu rai nga ai Bochuk Ne Win hpe Myen shadu, Maha Bandu La (Maran Hpundu La/Jinghpaw) hpe Myen shadu ai hte maren sha rai nga ai. Dai majaw Hkang Amyu rai nga ai Bochyuk Awng San hpe Hkungga jaw na, Azarni N-htoi e Horn n-sen shangoi ai lam ni hpe hkum pat ai lam rai nga ai.Lam mi hku tsun ga nga yang- Mung Masha ni Bochyuk Awng San hpe naw dum,naw hkungga nga na hpe n-ra sharawng ai majaw rai nga ai.
Dai hta n-ga…. ASSK Rapdaw du jang Myen Ga Malai hku-“ Woi madun nna N-gu hpyi ” nga ai hpa Mungkan de Myen Hpyen asuya ni, hpyi lu hpyi sha, pru shang, tsun shaga loi na matu Baw nu bai shachyai bang wa masai. ASSK hpe- Myen Mung galai shai wa sai nga Masu shangun, Theing Sein hpe (Kam ai/ Yone De) nga tsun shangun, Sanction ni hpaw ya na matu tsun shangun, Maigan Mungdan ni rai jang ASSK hpe N-masu na re nga kam n-na Democracy mungdan lu gaw de sa wa lu na matu- Myen Mung masha ni Shinggyim Ahkaw ahkang hkrak tup lu hkam sha nna Mayak mahkak kaw na lawt lu na amtu Dollar Sen,Wan kahtap nna garum she garum. Kaja wa dai gumhpraw ni lu jang Myen Hpyen asuya ni gaw yawng hkra shanhte a Sumbu kaw “Dawk”. ASSK gaw Sama pyi n-lu manam kau dat nga lu ai. Sanction hpaw dat ya ai hte Maigan na Arang Madu ni Myen Mun g de majoi goi, gashun gashe htu kaput shang wa masai. Myen hpyen asuya ni gaw Myen Mung ting na N-hprang sut rai ni yawng hkra hpe Ta Layung madi nna, dut hkrai dut sha, Lamu ga ni du hkra Eka Sen kaba hku nna shaning 30- 40 ning shap sha taw nga masai. Grau sawng ai gaw Mung masha ni a Hkauhting hkauna ni sha n-ga, Nga shara dum n-ta, Htinghput Hting ra ni hpe du hkra-Tawt lai Lamu Ga (Kyoo kyaw Myae) nga nna N-tara ai dang sha, dip sha, zing la taw nga masai re.
Munghpawm Myen Mung kaw Myihprap wan dai ram taw nna Wan shadaw?Candle ni sha shachyi taw nga ra ai Ten, Myen asuya ni gaw Miwa Mung de Shwe Pipe Line hku nna Yakhaing kaw na (Gas) ni hpe Manu paw paw pye pye hte dut sha taw nga masai re. N-dai Pipe Line hpe Myen ,Miwa,India hte Korea Mungdan (4) kaw na Company (6) jawm pawng galaw ai lam chye lu ai. Gas a 20% hpe Myen asuya ni lu na rai nna, Pipe Line Myen mung hku shalai la ai Manu- Laning mi hta American Dollar Wan-13.81 Millions (Myen Kyat Gumhpraw- Wan (1243) hpe, Shaning (30) ning (Myen Kyat Gumhpraw Wan- 37,290) hpe Myen asuya ni akyu hkam sha lu na lam chye lu ai. Raitim Pipe Line lai di mat wa ai shara ni hkan na Mung Masha ni gaw matsan mayan rai Dum n-ta shamat, Yi Sun Hkau na shamat rai jam jau taw nga ma ai.
Rai yang…… ASSK tsun ai hku Myen Mung kaja wa galai shai taw nga sani? Grau nna “ Yubak hta Yubyen ra”…rai nga ai hpe- Meikhtila Manghkang shabyin nna, Muslim Gala ni hpe majoi hte sat, Makam masham mang hkang byin hkra galaw nna, Laknak samit hkyep langai mi pyi n-lu ai Muslim Gala ni hpe matsan mayen rai majoi Wan hte Nat sumpum sat. Sat ai ni nan mung Hpyen asuya a masha Hpungkyi Masu ni N-htu hpai nna hkan kahtam sat hkawm ai gaw grai nan ladu lai mat sai re. Makam masham manghkang shapraw nna Myen Hpyen asuya ni bai matut up sha lu na matu Akawoit gayet wa ai lam rai nga ai. N-dai zawn Muslim Gala sat Poi kaba byin wa jang she- Mungkan Mungdan kaba ni mau mat masai. Am mat masai. ASSK mung Hpyen asuya hte pawng nna Myen mung masha ni hpe mung Masu, Mungkan ting hpe mung Masu rai taw nga ai hpe chye masai. Mungkan a Mungdan kaba re… nga ai ni, grai naw “Angawk ai …Hpyang ai”… ngu mu mada lu ai. “Shakrep hpe Taukawk” re..nga Myen ni Masu jaw ai hpe hpa majaw- Myi di,Na hpang kam taw ma ai da i? Katsu Baw Nu ngu she tsun mayu sai. Mungdan kaba ni re ngu -majoi Kam kaba, Yu kaba na lam n-nga ai.
Ya mung Simsa lam kaw ASSK hpe bai lawm shangun nna(shanhte hparan n-lu majaw n-rai) shanhte ra ai N-tara ai, Masu magaw, Hkalem hkalau hte UNFC ni hpe bai lu Maw Hkalawk sha na matu ASSK a N-gup hpe bai shap taw masai. Num labu hpe Cover la, Gyem nna Ahkaw ahkang la taw ai, Mai Bau Hpyi Myen Hpyen Gwi Chyit Gwi ran ni hpe hkyet nan rung dik ai yaw. Hpang jahtum ASSK hpe sha yawng hkra jawm n-ju na hpe shingran pyi mu taw nga n-ngai. (U Raw) kata kaw shang hkrup sai ASSK katut sha, katut naw na lam sha rai nga salu ai.
“ Anhte mung… Myen ni Shing Run gat jaw taw nga ai…(U Raw).. kata de n-shang hkrup na matu- Grai Sadi Maja ga” ngu…Tsawra Hkungga let….Numhtet dat mayu n-ngai re.
By-
Bum Chyangau.
(Daw- 2- de bai matut hti ga)
by -
