JINGHPAW WUNPAWNG AMYU SHA NI A AHKAW AHKANG HTE SHANGLAWT BUNGHKU.

laika man (48) Langji U e pyen yu su! VII
Ndai gabaw hte lakap nna,anhte Jinghpaw Wunpawng amyu sha ni yawng myit sawn yu lu nna tinang mungdan a SHANGLAWT BUNGHKU hpe gara hku jawm gap la yang, mai kaja na re ai lam hpe lawu na hte maren tang madun
dat ai.
Dai ni na aten hta, mungkan ntsa kaw shanu nga ai masha shagu gaw, shanglawt lu ai mungdan masha langai rai na gaw, ahkyak dik rai nna, lawu na ahkaw ahkang ni hte hkum zup ai hku nga ra ai.
1. Mung masa ahkaw ahkang
2. shinggyim ahkaw ahkang,
3. makam masham ahkaw ahkang,
4. htunghkring hte laili laika, hpaji sharin achyin na, makawp maga na ahkaw ahkang,
5. sutgan hte lamu ga dum nta ni hpe makawp maga madu da lu ai ahkaw ahkang,
6. wanglu wanglang ja hpaga ga mai ai ahkaw ahkang,
7. wanglu wanglang myit mang tsun shaga lu ai ahkaw ahkang, 8. wanglu wang lang hkawmsa hkawm wa lu ai ahkaw ahkang,
9. wanglu wanglang hkailu hkai sha remlu remsha mai ai ahkaw ahkang, ni hte hpring zup n na asak hkrung nga ra nga ai. Ndai ni gaw, shinggyim masha hkum ngau shagu lu ra ai ahkaw ahkang ni rai nga sai. Dai zawn rai mungkan masha
ni a ahkaw ahkang hte myit masa ni gaw, galu kaba nga ai ten hta anhte Jinghpaw Wunpawng amyu sha ni a lu nga ai ahkaw ahkang hte byin nga ai lam ni hpe anhte ni sumru yu yu ga. Ndai ten hta, anhte Jinghpaw Wunpawng amyu sha ni gaw, mungkan ntsa hta mungdan shara shagu de du shanu nga sai re majaw, ginra lamu ga, hte mungdan ni hta hkan nna, lu nga ai ahkaw ahkang ni mung, langai hte langai n bung shai nga ai. Jinghpaw Wunpawng amyu
sha ni shanu nga pra ai lamu ga mungdan ni hpe yu yu yang,
1. Uma gindai Jinghpaw Wunpawng mungdan ,
2. India mung, Asam hte Arunasha mungdaw ni na, Jinghpaw lamu ga hte Jinghpaw myu sha ni,
3. Miwa Gumsan Mungdan, Saphkung mungdaw na Jinghpaw su ni,
4. Miwa mung na, LISU madu uphkang mung na, Jinghpaw Wunpawng myu sha ni.
5. Miwa Mung, Nung Mungdaw na, Jinghpaw nung amyu ni, hte Miwa Mung, Kinma buga shara na, Jinghpaw su ni,
6. Htai Mung kaw du nga ai Jinghpaw amyu ni,
7. US, UK, JAPAN, AUSTRALIA hte kaga mungdan ni kaw du shanu nga sai Jinghpaw Wunpawng amyu sha ni.
Ndai zawn Jinghpaw Wunpawng amyu sha ni a lam hpe lamang garan nna, yu yu ai shaloi,. Uma mungdan kaw shanu nga ai ni a ahkaw ahkang hpe garai n yu yang, kaga shara kaw du nga sai ni hpe shawng yu yu ga.
naw matut na......
INDIA KAW NGA AI JINGHPAW AMYU SHA NI.