(Ahkaw ahkang daw III) MIWA MUNG KATA NGA AI JINGHPAW AMYU NI, (SAPHKUNG MUNGDAW)

Miwa mung kata kaw nga ai, Jinghpaw su ni a lam hpe anhte ni bai yu yu ga. Miwa mung kata kaw e Jinghpaw ni law malawng shanu nga ai shara gaw, Saphkung mungdaw kaw rai nga ai. Saphkung mungdaw gaw, Jinghpaw hte Sam ni bawng nna, lu da ai mungdaw rai nga ai. Miwa mung gaw, shanglawt lu ai mungdan rai nga ai. Miwa mung kaw e Kummunit asuya ni uphkang ai mungdan re. Miwa mung kata hta ndai Jinghpaw amyu sha ni gaw, moi shaning law law kaw nna shanu nga ai ni rai nga ai. Mung masa lam hta gaw,kummunit mung masa sha mai galaw ai. Dai mung masa hta anhte Jinghpaw su ni mung shanglawm nna, shamu shamawt nga ai. Jinghpaw su du salang ni gaw, mungdaw hpe uphkang ai tsang du hkra shang lawm nga ai. Mare buga ni hta mung, ginwang ni hta mung, Jinghpaw ni nga ai
buga ni hta, uphkang du tai let, woi awn na ahkang nga ai.Hpaji hparat hpe tinang ngut jin ai madang sharin la mai ai ahkaw ahkang nga ai. Jinghpaw laika shapraw na, ka na, sharin mai ai ahkaw ahkang nga ai. Tinang amyu htunghkring ni hpe wanglu wanglang galaw lu ai.Miwa asuya nan Jinghpaw htunghkring hpe n gun jaw nna, manaushadung kaba ni gap ya ai. Wanglu wanglang hkawm sa mai ai ahkang nga ai. Wanglu wanglang dut lu dut sha ja hpaga ga mai ai.
Wang-lu wanglang rem lu rem sha, hkai lu, hkai sha mai ai ahkang nga ai. Tinang lu lawm ai hta hkan nna, jakrung jakrai ni shapraw na a-hkang nga ai. Tinang lu tam ai yi sun, hkauna, dum nta, lamu ga ni hpe madu da na ahkang nga ai.Shinggyim ahkaw ahkang hte seng nna, ram daw nga ai. Ndai mungdan kaw shanu nga ai Jinghpaw su ni galu kaba wa na lam hta Miwa asuya kaw nna, n gun jaw nga ai lam nga ai.

LISU AMYU NI (MADU UPHKANG MUNGDAW)
Ndai amyu ni gaw, Miwa mungdan kata kaw, LISU madu uphkang mungdaw lu nna nga ai amyu ni re. Tinang Jinghpaw Wunpawng amyu sha ni ngu, anhte ni hkam la da ai amyu ni re. Raitim, Miwa mung maga e shanhte hpe Lisu ni nga nna laksan shamying da ma ai. Laksan madu uphkang mungdaw lu ma ai. Ndai mungdaw hpe Lisu ni uphkang ai. Ahkaw ahkang hte seng nna, Saphkung mungdaw kaw shanu nga ai Jinghpaw su ni hte maren rai nga ai.

NUNG AMYU NI (MADU UPHKANG MUNGDAW)
Nung amyu bawsang ni mung, Miwa mung kata kaw,shanhte a lamu ga hpe moi chyaloi n hkoi kaw nna, ya du hkra,
shanu nga ai lam chye lu ai. Nung amyu ni, madu uphkang mungdaw lak-san lu ai. Shanhte nga ai shara hpe shanhte uphkang sha nna, nga ai. Ahkaw ahkang hte seng nna,Saphkung mungdaw hte Lisu mungdaw ni lu ai ahkaw ahkang
hte maren rai nga ai.Bai nna, Miwa mung kata kaw sha, KIMMA ngu ai shara kaw, Jinghpaw amyu ni, htinggaw
300 jan nga ma ai. Dai jinghpaw su ni mung, shanhte nga ai shara hpe shanhte madu nna nga ai. Ahkaw ahkang hte seng nna, Miwa mung masha ni lu ang ai ahkawahkang hte maren lu nga ai. Ndai gaw, MIWA mung maga nga ai
anhte Jinghpaw Wunpawng amyu sha, ni nga pra ai lam re.

THAI MUNG DU JINGHPAW NI.
Thai mung kaw, Jinghpaw ni lai mat sai 40 jan ning kaw nna shanu nga sai. Law malawng gaw, shanglawt majan prat hta KIA hpyen la ni du ai hpang hpyen la n kau mi, dai mungdan na amyu shayi ni hte dinghku de nna, nga
ai ni re. Ya gaw, Jinghpaw mare langai mi nga ai. Dai Jinghpaw mare gaw, BANMAI ngu ai re. Ndai mare hta THAI Hkawhkam ni kaw nna, MANAU SHADUNG jun na ahkang jaw ai majaw, manau shadung mung lu jun sai. Thai ga kaw shanu nga ai Jinghpaw ni gaw, Thai mungdan kaw nga lawm ai madang rai nga ai. Mung masa lam hta shang
lawm ai lam n nga shi ai. Thai asuya kaw nna, Thai mung nga bum masha amyu masat sai. Thai mung kaw du nga ai Jinghpaw ni n kau mi tara shang nga ai rai nna,n kau mi gaw, anhte mung hta yak hkak ai lam law law a majaw, du
shanu nga ai ni law nga ai. Ahkaw ahkang hte seng nna, Thai mung tara kata kaw shanu nga ai. Tara shang lakmat n lu ai ni gaw, shim lam n lu nna, nga yak ai madang re. Dai zawn, yak hkak ai madang kaw, makam masham lam, amyu
bawsang lam hpe shakut nna, galaw nga ai. Jinghpaw nawku htingnu lu sai. Rawang nawku htingnu lu ai, Lisu nawku htingnu lu ai. Thai mung kaw Jinghpaw Wunpawng amyu sharawt hpung ni amyu galu kaba lam hta ding yang
shakut nga ai. US,UK,JAPAN, AUSTRALIA HTE KAGA MUNGDAN NI KAW SHANU NGA AI, JINGHPAW WUNPAWNG AMYU
SHA NI,US,UK, JAPAN, AUSTRALIA hte kaga mungdan ni kaw du shanu nga ai, anhte Jinghpaw Wunpawng amyu sha ni gaw, tinang shanu nga ai mungdan a tara hte maren lu ang ai ahkaw ahkang ni hpe lu la nna, nga nga ga ai. Mungdan langai hte langai a ahkaw ahkang ni gaw, liloi shai ai lam ni nga ai. Raitim mung, masa grin nna, rapra ai tara lam hpe
lang ai, mungdan kaba ni re ai majaw, dai mungdan ni hta du nga sai, anhte Jinghpaw Wunpawng amyu sha ni gaw, dai mungdan a tara hte makawp maga da ai kata kaw, shim ai hku asak hkrung nga sai. Shinggyim masha langai hku
nna, madu nga ai mungdan masha ahkang lu nna, shim ai hku asak hkrung nga sai. Raitim ndai mungdan ni hta kap nga ai lam sha rai nga ai, Jinghpaw Wunpawng amyu bawsang langai hku grin nga lu na matu gaw, grai shakut ra nga
ga ai.
------------------------------------
Naw Matut na...Gai Ya anhte UMA GINDAI Jinghpaw Mungdan hte amyu sha ni hpe yu yu ga.
-----------------------------------