ni a lam hpe yu dat ai shaloi, ndai lamu ga ni gaw, Anhte Jinghpaw Wunpawng amyu sha ni, mungkan ntsa kaw nga pra paw ai kaw nna,ndai shara ni hpe madu let nga lai wa sai lam hpe chyi wa ni a labau joi wa ga ni hta sakse sakgan hte nga lai wa sai. Ndai ga gaw, anhte
amyu ni madu ai lamu ga nan re.
Ya yang ten hta Myen munghkawm mung nga nna, Myen ni hte rau nga ai. Moi gaw, anhte laksan nga ai kaw nna, manang ni a n pu kaw, n myit mada ai sha rawng nga katut sai. Tinang mungdan awmdawm shanglawt bai la na matu shakut nga ai ten re. (Myen ni hte bawng nga ai kaw, Jinghpaw mungdaw ngu shamying ai ten rai nga ai.) Ndai UMA GINDAI Jinghpaw mung kaw shanu nga ai Jinghpaw Wunpawng amyu sha ni a ahkaw ahkang hpe anhte ni yu yu ga. 1. Mung masa galaw na ahkaw ahkang n nga ai.mung masa lam tsun shaga na ahkaw ahkang n nga ai. Mung masa galaw yang, tsun shaga yang mara jaw ai.
2. Makam masham lam hta wanglu wang lang galaw kam sham na ahkang n nga ai.
3. Tinang htunghkring hpe wanglu wanglang n mai galaw ai.(manau shadung baw kau ya
ai madang kaw du ai.)
4. Shinggyim ahkaw ahkang ngu ai n nga ai. (Myen hpyen la ni anhte amyu ni hpe lang hte
lang sat nat ai. Tinang amyu shayi ni hpe roirip ai.)
5. Tinang amyu sha ni a laili laika sharin na ahkang n nga ai.Tinang laksan jawng hpaw
nna, sharin na ahkang n nga ai.
6. Wanglu wanglang hkawm sa na ahkang dut dang ai.
7. Tinang lu da ai sutgan, dum nta, sun hkauna, lamu ga ni hpe shim ai hku madu da na ahkang n nga ai. Tinang amyu sha ni madu da nna, galaw lu galaw sha nga ai sun hkauna,
ni hpe zing la kau ya sai. LIDO lam mayan na lamu ga hte mare buga ni hkauna ni yawng
zing la kau ya sai.
8. Tinang shanu nga ai buga hta tinang uphkang na ahkaw ahkang n nga ai. (Masha wa up
hkang ai n pu kaw nga ra ai.)
9. Tinang amyu ni shanu nga ai lamu ga ginra ni hpe makawp maga na ahkaw ahkang n nga
ai.
Ndai zawn dai ni na ten hta anhte Jinghpaw UMA GINDAI mungdan kata kaw nga ai anhte
amyu sha ni gaw, lu ang ai ahkaw ahkang ni hpe n lu ai majaw, asak hkrung nna, nga lu na yak nga ai.asak shim lam mung n nga ai.Shinggyim ahkaw ahkang hte seng nna, anhte mungdan kata kaw hpa baw byin nga a ni? Yu yu ga. KIA hpe myen ni gasat nga ai ten hta anhte amyu sha ni hpe shaning law law wa buga shara shagu kaw, roirip ai lam ni law
law rai nga ai. Mara kata (mara n lu ai kaw) sat kau ai, gayet ai, rim ai, gyit ai, Shangun sha ai, jan prang kaw shatsap nna, sat ai, rim nna, wan kaw wawn kau hkrum ai. Anhte amyu shayi ni hpe majoi roirip ai lam law law nga ai. Mare buga ni hpe wan nat kau ya ai.
Ndai lam ni law law hpe majan byin nga ai majaw, re ai nga tsun ma ai. KIA hpe n gun jaw ai majaw,garum ai majaw, matut mahkai ai majaw, ngu lam amyu myu hte mara tam nna, n dang tsun ai anhte amyu ni hpe sat ai. Htawng kaw rim bang ai, zinri lai wa sai.
1994 ning 2/24/ hta KIA hte gap hkat jahkring sai. Sat nat ai lam ni n nga na sai ngu mung masha ni myit mada ai. Raitim mung, shawa ni myit mada ai lam gaw n jaw mat ai.
Mungdan shara shagu de Myen hpyen la ni grau grau she du jat wa ai. Dai majaw, dai buga
masha ni gaw, dai hpyen la ni roi rip sha ai lam grau law wa ai.Hpakant buga shara kaw, KIA hpyen la hpyen pru ni hpe rim nna,majoi sat kau ai. Tara jeyang masu ai lam pyi n nga ai. Myen hpyen dap ni gap shangun ai. Buga shara shagu na tinang amyu shayi ni hpe
roirip ai lam law law hkrum sha nga ai. (Sakse gaw, Myen ngyi law law pru wa ai hpe yu yu ga.) Ndai zawn byin nga ding yang rai nga ai kaw e, 2001 ning March shata 20,21, ya hta anhte a KIA hpyen la marai 9 hte mung masha marai 2 hpe mara kata sha-ga la nna, zingri zingrat n htawm sat kau ya ai. 2006 ning,January shata praw 2 ya hta bai kalang mi KIA mu gun hpyenla marai 5 hpe nta kata kaw shang nna, gap sat nhtawm, moi mang hpe wan nat kau ya ai. Mung masha marai masum hpe mung zinri gap da a sai.Ya bai galang mi,.....ya shani, KIA hpyen la 13 hpe hpyen dap kaw nna rim la kau ya ai. Htawng bang da ya ai. Gap
hkat jahkring tim, anhte amyu sha ni a asak shim lam gaw, n nga ai.
Dai sha n ga, anhte amyu shayi ni hpe roi rip ai lam hta Putou buga de grau law wa ai. Myen ni,hpyen dap law law hpe Jinghpaw ni nga ai sha-ra de dat ai. Myen hpyen la ni gaw, anhte amyu shayi ni hpe majoi roirip ya ai. Ya Putau buga na, a-myu shayi ni law law gaw, Myen hpyen la ni roi ai hpe hkrit nna, Thai mungdan de hprawng du nga sai. Anhte amyu
ni hta shinggyim roi rip lam gaw, tsun ndang hkra katut sha nga ai. Jinghpaw ni a buga ni hpe shanhte ra ai hku zing la kau ya ai. Mare buga ni hpe mung shanhte ni ma ja htawt kau ya ai. (Mawhpawng mare hpe htawt kau ai.)Lamu ga ni hpe hpyen dap shara hkrai hkrai masat kau ya ai.Makam masham lam hte seng nna, anhte a mungdan rai ning-len, anhte amyu sha ni, Karai hpe nawku na nawku jawng hpe gap na lam hta ahkaw ahkang n
lu wa ai. Nawku jawng ngu shamying pyi n mai ai. Anhte amyu ni jung tawn ai udang masat ni hpe pyi baw kau ya na hkyen wa ai. Makam masham hte seng ai lamu ga ni hpe jahten na masing jahkrat ma ai. Shanhte a gawkngu ni rai yang, bukda nawku ai masha n nga ai shara kaw.Jinghpaw bum ga shagu gawkngu ni gap da ai. Htung-hkring labau hte seng nna, anhte amyu ni wanglu wanglang, n mai galaw ai. Manau shadung baw kau ya ai kaw du hkra galaw ya ai.Tinang a mungdan buga hta anhte amyu ni, Mung du galaw na ahkang n nga ai. Dai zawn mung uphkang lam hta n lu galaw ai majaw,anhte amyu ni a lamu ga ni hpe anhte makawp maga na ahkaw ahkang n nga ai. Shani shagu hpun kawa ni, hkashi hka nu
ni hten nga ai lam hpe mung anhte amyu ni makawp maga ai lam nlu galaw ai. Anhte mungdan lamu ga kaw e, hkyen lu hkyen sha na lam, galaw lu galaw sha na lam ni hta anhte ni dawdan galaw hparan lu ai lam n nga mat ai.
Hpakant ginra lung seng maw hpe yu yu ga. Lai mat sai ten hta ndai lamu ga ni hpe Kinsi
Du, Lai sai, N Jereng, Nja du ni shanu nga ai lamu ga ni re ai.Kinsi du ni uphkang madu da ai,anhte a Jinghpaw lamu ga rai nga ai. 1962 ning hta Newin asuya lung ai sha loi kaw nna, Myen ni zing la ai re. Prat hte prat anhte amyu ni madu uphkang sha lai sai. Lung
seng maw ni ya hpa baw byin nga sai kun? Lung seng buga bum ni yawng mat mat sai. Hkashi ni hten mat sai. Lamu ga ginra yawng hten mat sai. Ndai zawn bying nga
ai lam hpe tsun shaga na ahkaw ahkang n nga ai. Makawp maga lu ai lam n nga ai. Moi shawng de gaw lung seng maw kaw, lung seng htu mayu jang, anhte amyu ni kaw ahkaw ahkang hpyi ra ai.Ya gaw anhte amyu ni mahtang,Myen wa kaw ahkang hpyi nna,
she gumhpraw law law jaw nna she ahkang hpyi galaw ra ai.Ahkaw ahkang lam shagu gaw nhtang rai mat sai. Jinghpaw ni rai ninglen Jinghpaw mung hpe uphkang sha n mai mat ai. Putau,Mali hkrang wa lawng, Mali n mai wa lawng, Hogawng pang, Myitkyina hte Wanleng lam, Manmaw hte Sinli Sam mung, Hkrang hku,Nmai hku, Maru krung, Lashi krung Sadung Sama, hte Sinpraw hkran shara shagu gaw, Myen ni hte sha, seng mat ai. Jinghpaw ni
dawdan hparan lu ai lam n nga mat ai. Ndai zawn Jinghpaw ni gaw, lu da ai ahkaw ahkang ni yawng hpe tat kau nga sai.Ndai zawn rai nna, ndai ten hta anhte Jinghpaw Wunpawng amyu sha ni gaw, tinang amyu bawsang ni hpe mung, sat nat roi rip ai lam hkrum, tinang mungdan lamu ga ni mung jahten kau hkrum, lu ang ai ahkaw ahkang ni mung yawng hten mat wa rai nga saga ai. Ndai zawn byin ai lam ni gaw, anhte amyu ni hta shanglawt awmdawm ahkaw ahkang hten mat ai lam rai sai. Dai majaw, anhte amyu ni gaw, Shanglawt
Awmdawm ahkaw ahkang hpe gaw gap la ra sai. Anhte amyu ni lu ra ai ahkaw ahkang hte mungdan shanglawt lu la na matu gaw, dai ni anhte amyu sha ni yawng myit
hkrum mang rum ra sai. Amyu sha ni yawng a n gun hpe mahkawng la ra sai.Mungdan shinggan mungdan kata yawng kaw na n gun hpe kahkyin la ra sai. Masha n gun, hpaji n gun jagum hpraw n gun, ni yawng mahkawng la nna,anhte tat kau ai ahkaw ahkang ni
yawng hpe bai jawm gaw sharawt la ga. Anhte amyu ni lu ang ai ahkaw ahkang hte mungdan awmdawm bunghku hpe jawm gawgap la ga ngu nna yawng hpe lajin
dat ai.
Grai chyeju kaba sai. Anhte amyu sha ni hte rau, anhte a hpan Karai wa gaw tut rau rai nga u ga. Anhte a mungdan shanglawt la-wan lu u ga. Anhte amyu ni yawng lu ra ai ahkaw ahkang hte hpring zup ai amyu lakung ni tai wa u ga.
HKRAT SUM NGA SAI ANHTE JINGHPAW WUNPAWNG AMYU SHA NI A AHKAW
AHKANG HTE SHANGLAWT AWMDAWM BUNGHKU HPE BAI GAWGAP LA GA.
Myutsaw salum-langji u e pyen yu su
