Myen Hpyen dap ni madat mara nga ma ni?

By, Yaw Na Kachin Politics Watch and Research Network

Date: 20-11-2015

NLD ra lata poi dang ai hte rau, Aung San Su Kyi gaw shi a party ra lata poi dang ai hte maren shi tsun ai hta, asuya ning nan gaw gap wa na aten ladaw hta sha pyi gaw, hpyen dap a kasu gabrawng ai lam hpe n-galaw ya na matu hpyi lajin ai lam galaw dat sai. Rai tim shi tsun ai ga htum ai hte hpang shani njang Jinghpaw mung hte Sam mung de Myen hpyen dap ni gaw Jet-fighter hte bawm jahkrat, myawk kaba ni hte myawk si hti ndang hkra gap bun ayai bang masai gaw dai ni du hkra bai rai taw nga sai.

Dai rai yang, Myen hpyen dap a masa gaw ra lata poi dang ai ndang ai hte nau mi nseng ai zawn rai taw nga sai. Hpyen dap a sut masa akyu ara hpe makawp maga na lam gaw shanhte a matu madung bungli langai zawn sha tawn da ai masa kaw hkrang pru taw nga ai zawn rai nga ai, nang manang wa mung myit sawn garum yu rit, ra lata poi hpe hpyen dap maga na mung masa party ni ndang ai hte gaya pawt pawt nna labu palawng malu dan bang wa ai zawn rai nga masai.

Dai rai, ndai asuya ningnan gaw hpyen dap hpe lu shazim na kun? Hpyen dap hpe simsa lam hpe jawm shakut na matu lu shadut na kun? Dai hte maren hpyen dap mung ra lata poi dang sai asuya ning nan hpe akaw alaw ganawn mazum na kun? Myit yu ga!