Munghpawm Democracy lam a ntsa e hkrat bun magap tawn ai shingnyip shingna
1. April 1 ya shani galaw ai ra-lata gaw, NLD maga hku nna yu yu timung, USDP hku yu yu timung, rap ra ai hku n rai hkra rai tim, ram ram dingman ladat jaw ai hku ra-lata mai byin nga ai, ngu ai hpe madun sai, ngu mu lu ma ai.
2. Ya du hkra byin ai hpe sha yu yu, shawng lam hpe tak ai hku n re sha, tsun na nga yang, NLD gaw 2015 galaw na mungdan ra-lata hta tsep kawp pawt-di awng dang na re, ngu mu ai. Gumshem Than Shwe-hpyen atsuya a hpang galai shang ai atsuya USDP gaw, mung shawa hpe, "USDP hpe mahtang ra-lata sharawt marit, NLD hpe n re", ngu nna tsun na lam n nga ai. "Hpa majaw" ngu ai daw gaman rai nga ai.
3. Hpyen hpung mung ndai hku byin mai na re ngu nna tau nna mu tawn nga ai, dai majaw 2008 gawda tara shabyin wa ai ten hta hpyen hpung parliament kasa 25% rai ra ai, ngu ai ahkaw ahkang hpe gawda ai tara hta shalawm bang jahkrat tawn nga ai. Ndai gaw, hpyen hpung a ningmu hte nhtan shai ai hku mungdan lama sharai la mat wa yang hpyen n-gun bai shang wa na matu ahkat galaw tawn ai lam re.
4. Myen hpyen hpung a labau dingyang hta, hpyen hpung chyu sha Munghpawm zang-ayai mat ai gam maka n byin wa hkra shingdang tawn na atsam nga ai, ngu kam hkrat wa nga ai. Dai ni mung shai wa ai lam n nga ai.
5. Dai ni "kahti kari" rai nna simsa lam shabyin wa lu ai hpe dam lada rap ra wa hkra USDP atsuya pawn ba bau maka lu na atsam n rawng yang, yak ai lam bai byin wa na re. Jet ai federal democracy sha grin nga lu ai uphkang masa mai shabyin ai. Raitim dai hpe shabyin na matu lam mahkrun hta 2008 gawda tara wa dingbai dingnai bai byin nga ai. Mungdan shawa shamu shamawt ai majaw federal uphkang hkrang sharawt la wa yang, hpyen masa a "baw bai dap " wa na re lam gaw, Munghpawm a democracy shabyin mahkrun hta magap tawn ya ai shingnyip shingna rai nga ai.
Hpyen hpung hku nna mungdan uphkang ahkaw ahkang hpe bai magra la wa ai rai yang, mungdan ting sum na re, awng dang ai lam ngu ai hpa mung n nga na re.
6. Canadian Foreign Minister John Baird gaw Munghpawm e shawng lam a lagaw lahkam htawt ai hta, garum na jin jin re, nga April 1 ra-lata ngut ai ten hta tsun ai. Shi shading ai lam gaw, mungdan ting tara hkan ai lailen masa hte jet nna rap ra ai uphkang masa hpe yawng hkap la chye hkra, shabyin ra ai. Myit jasat machye machyang hta yawng, hpyen hpung mung lawm, dai tsang de du ra ai, ngu ai lam re. Ndai hpe shabyin na npawt hpang ya ai makan ni hta Canada gaw garum la lu ai atsam kaba lu nga ai, nga ai lam re.
+++++
Canadian tara-kasa Mitchell Wigdor, Munghpawm hte makau grup yin hkan law law lang sa du hkaja yu ai wa ndai hku mu lu ai.. Shi madun dan lachyum ginsi kru hpe shaw la nna Ginjaw de tang dat ai. Lachyum ginsi hpe shaw la nna lachyum shaleng ai hku ka lajang la ai hpe tang shawn dat nngai.
Tsaw ra hkungga let, SK
