Myen ni n-gun kahkyin taw sai,
Tsawra ai wunpawng amyu sha yawng hte hpang de, dangdi dangdep ai daram hte masam maram shiga hte shadum dat nngai.
Myen Asuya hku nna, Amyu Bawsang Majan (Ethnic War) baw hkyen sai hpe sadi ra na zawn rai taw sai.
Daini bat 1 ya (July 25) shani, Aung San Suu Kyi hte Wungyi Aung Kyi wa hkrum shaga ai hpe Mungkan ting gaw kaja ai hku nna sawn la masai hte maren, Myen Amyu sha media ni mung dai hpe grai ahkyak tawn nna, kaja wa na hku sha myit nga ma ai.
Rai ti mung, grai ahkyak ai langai mi hpe mu dat nngai.
(1) Aung San Suu Kyi a miman nsam n tsawm ai.
(2) Hkrum shaga ai hte seng nna sanglang ai shaloi, Aung Kyi wa hti dan ai gaw tau hkrau ka lajang da chyalu maisau pa hpe hti dan ai hte bung nga ai.
(3) Myen Mungchying shawa (Bamar Civilian) ni a n-gun hpe kahkyin na matu Hpyen Asuya hku nna zai ladat shaw (strategic planning) ai hkrum zup hpawng zawn rai taw ai.
(4) Myityina kaw na Hkalaya 37 hpyen dap kata kaw shada da gap hkat wa ai hpang laban shani (July 24, laban) hta she hkyak hkyak hkrum na matu shana wa nna, hpang shani (bat 1 ya) hta hkrum ai lam galaw ai re.
(5) Shanhte ndau ai ga manawng hta mung, myit bra nga ai mung chying shawa hpe kahkyin lu na matu, nga ai lawm nga ai.
(6) Ndai zawn rai nna hkrum zup ai lam gaw, Aung San Suu Kyi a policy rai nga ai “hkrum shaga ladat” hpe jailang nhtawm, Suu Kyi hpe madi shadaw nga ai Myen Mung Chying Shawa hpe myi galau ya ai mung mai byin nga ai.
(7) Ndai hkrumzup lamang garai n galaw shi yang, Naypyidaw kaw lani mi budget Ks Wan 4 jailang taw nga ai gawgap masing (construction projects) ni hpe jahkring da nna, gumhpraw (budget) hpe mung kahkyin da masai.
(8) Miwa Mung kaw nna karum ya ai Mawdaw 200 ram hte Hpyen arung arai ni hpe mung lai wa sai bat ni hta htaw bang da masai.
(9) India kaw nna karum ai Hpyen laknak ni hpe mung ndai laman sha htaw bang da masai.
(10) Myen Mung ting kaw nga ai Hpyen Dap Dung shagu hpe mung hkyak hkyak hpyen lahkawn na matu amind jahkrat da masai.
(11) Ra ahkyak wa yang tatut jailang na matu, hpyen n shang n mai tara hpe mung jahkrat da chyalu rai nga sai.
(12) Bangkok kaw na kam ram ai Shanhpraw Shihtawn (journalist) langai mi hku nna mung, dai ning laman majan kaba baw na matu hkyen nga ai lam kata lam shiga pru taw ai lam tsun wa ai.
(13) Myen Mung ting madang hku nna, Hpyen Du kaba (Taimu) ni hpe htawt sit ai lam galaw da ai hpe yu ai shaloi, majan a matu ahkyak ai shara ni hpe yu nna htawt sit da ai hpe mu lu nga ai.
Ndai lam ni a majaw, dai ning lanam hkoi ai hte majan kaba baw wa na matu mai byin nga ai.
Bai langai mi hkyem sa ai hku bai myit la na matu gaw…..
Pati Asuya (USDP) hte Hpyen Dap lapran n htuk hkat ai lam ni nga wa ai majaw, Pati Asuya gaw Aung San Suu Kyi hpe n-gun gang bang da ai mung mai byin nga ai. Hpyen Du ni hkrai up nga ai Asuya re majaw, lam shagu hpe hpyen ladat hku hkrai sawn nna zai ladat shaw nga ai hpe sadi ra ai hku re, ngu nna mu mada ai hpe tang madun dat nngai….
