By: Kachin politics Watch and Research Network
1961 ning kaw Newin gumsan magam hpe gashun kau ngut ai hpang, Myen mung gaw hpyen up hkang arawn alai hpe jai lang wa ai gaw daini du hkra rai nga ai. Rai sai, Myen ningbaw Newin wa gaw U Nu hte jahkrup nna myen mung a duru magam ahna hpe gashun nna mungdan hpe up hkang hpang wa nu ai gaw dai ni du hkra hpyen gumshem magam hpe shagrin nna up hkang wa nu ai.
U nu hte Newin gaw shan shada jahkrup hkat nna Myen mung hpe gara hku jawm amya sha na lam hte seng ai maw lanyet hpe jawm jahkrup hkra rai nna ladat shaw hpang wa manu ai. Ndai zawn maw lanyet hpang wa ai shaloi mabyin gaw hpa ta nga yang, Myen mung kaw Myen myu ni up hkang ra ai, Myen myu ni naw ku nga ai Buda nawku htung lai hpe nawku ra na ngu ai ntsin hpe Myen mung ting nga ai myu baw sang yawng hpang de ru jaw bun dat manu ai. Ndai zawn ru jaw bun da tai lam hta Myen mung hpe Myen ni sha ningbaw ningla galaw nna up hkang ra ai ngu ai myit jasat hpe mung Myen myu sha ni a hkum kata de Tsihtu samyit hte htu abraw bang da ya manu ai. Ndai lam hte seng nna nkam ai ni gadai rai tim, dai ni du hkra Myen hpe up hkang sha nga ai ni a shingteng amying hpe san yu mu, “ Ngai gaw myen re” ngu nna ntsun ai nga yang ndai laika ka ai wa gaw manya she rai na sai.
U Nu hte Newin a maw lanyet hta hpa naw nga ai kun? Myen amyu ni up hkang ai masa hpe ninghkap ai gara rawt malan hpe mung tara nshang ai wuhpung wuhpawng nga nna Myen mung ting ndau shabra lai wa masai. Dai majaw Wunpawng Shang Lawt hpung hpe mung Masha shan sha ai rawt malan hpung ngu nna Myen mung ting masu ndau wa lai masai, dai majaw Myo mare nga ai mungchying mung shawa masha ni a myit kata hta Rawt malan hpyen hpung ni hpe gaw masha shan sha ai ni, hkrit ra ai tsadan ni ngu nna myit la hkra ladat amyu myu shaw nna hkum pat ai lam ni galaw wa masai. Bai nna grau sawng ai gaw Myen mung a teng man ai labau ni hpe ashep ashin, amyau amya, dumbru dumra, azat ashin nna, Myen mung a nteng nman ai labau hpe mung cying mung shawa masha ni hpe adip arip rai nna nhkap la yang sat shamyit kau na daram masu nna sharin wa masai.
Dai majaw, dai aten hta mung masa nkung kyang ai myu sha baw sang ni gaw U Nu yan Newin a masu magaw ai maw lanyet hpe kam nna Myen ni a tsun masu ai gaw hpe kam shut nna, tinang myu nyet ai masa madang kaw du hkra pyi ganoi du hkra, tinang myu hpe nyet ai kaw ganoi noi du hkra ndai zawn re labau jahten hpe kam lai wa saga ai. Dai zawn labau jahten hpe kam shut kau ai anhte myu ni bran wa ai gaw shaning hti ga nga jang nau nna shi nga ai. Dai majaw, daini anhte myu ni chye na ra ai gaw, nang na hkum nan labau teng ai hpe sawk hkaja yu sai kun? Hpa majaw anhte myu ni rawt malawn galaw ra nga ai hpe teng teng gaw chye sai kun? Nang tinang a myu sha a matu hpabaw lit hpe la ra nga ai kun? Myu hpe tsaw ai ngu n-gup a-ga hte sha tsun nmai ai, tengman ai labau hpe chye ra ai. U Nu hte Newin hpe sha shadu nga mung n-ngut ai, dai hta grau ai labau jahten ni hpe hka ja shut nna anhte myu hpe tinang hkum nan nyet nga ga ai kun ngu ai hpe sawn dum let sak hkrung hkawm sa ra na ga ai.
Dai majaw tinang chyoi nshang dum nna, gabrawng ai myu ni ntai ga, teng man ai labau hpe sawk sagawn ga, tinang myu hpe manu shadan hkungga tsawra ga. Ndai lam ni yawng hpe tinang hkumting dek manu shadan hkungga tsawra makawp maga ai masha law wa ai shani, tinang myu sha lawt lam, tinang mungdan lawt lam gaw ndai zawn re myit marai hte maka kumla kaw hkannang wa na re. Dai majaw tinang myu hpe teng sha tsawra yang tinang myu sha a labau hpe atsawm sawk sagawn ga, tinang htunghking hpe manu shadan hkungga nga ga, tinang myu laika hpe manu shadan nga ga, shaloi mungdan lawt lam, myu sha lawt lam ni yawng gaw ndai zawn re myit jasat hta hkan nna byin tai wa lu na re.
Ne Win hte U Nu yen lang ai zai ladat hpe daini na Myen ningbaw ningla ni mung hpaji ladat hpe jai lang nna, Maw lanyet amyu myu hku manawt dingsat nga ma ai oi.
Tinang myu sha ni a malai ningbaw ningla tai nga ai ni hpe mung hkungga manu shadan chye ai myu sha ni tai ra na ga ai law, shaloi she anhte myu ni a ningbaw ningla ni hpe Mungkan kaw na mung manu shadan hkungga wa na re ngu kam let, Myu sha ni yawng hpang de hkungga let ndai laika ngau gadun hte shagram dat ai law. Shut mat ai lam nga yang mung shada hpaji jaw hkat na hpe hkap la dingda nga na ga ai ngu shakram dat ga ai law.
By: Kachin Politics Watch an Research Network
Maroi nni hpa
