Thailand, Chiang Mai, Kaw Na "Wunpawng Hkristan Nawku Hung" (Wunpawng Christian Church, WCC) A Labau Kadun.
Ngai gaw 1997 ning Ndai WCC naw ku jawng wang hkyen jasan ai kaw shang lawm lai wa yu sai. chiangmai na Kachin lupding lupra jasan ai kaw shang lawm lai wa yu sai.
Ya ndai Labau kadun gaw Dukaba Gauri Zau seng WCC 15 ning hpring shaloi Ka da ai labau rai nga ai. Ya 25 ning Jubli ten bai du wa sai majaw Yawng myit dum shing ran lu na matu bai tang madun dat nngai law.
Ga Hpaw: Karai Kasang tam jaw tawn ai Wunpawng Hkristan Nawku Hpung, Wunpawng Christian Church (WCC) a lamuga dinghput htingra hte, dai lamuga dinghput htingra kaw gawde tawn nga sai WCC gaw, Hkristu a Amying Ningsang marang e, nhtum nmat agrin nga sana re majaw, WCC nawku hpung masha
ni prat ban hte ban, ndai WCC nawku hpung a lamuga dinghput htingra labau hte, ndai WCC nawku hpung a labau hpe matsing kyem mazing tawn lu u ga matu, ngai Gauri Zau Seng kaw nna, ka lajang tawn da nngai law.
Daw-1 : Wunpawng Hkristan Nawku Jawng Lu Ra Sai Ngu Myit Kraw Kata Hkam Sha Ai Lam.
Ngai Gauri Zau Seng gaw, Wunpawng Mungdan Shanglawt Hpung (KIO) Ginjaw kaw nna bungli lit hte shangun dat ai majaw, 1983 ning, May shata hta Thailand lamuga jarit kaw du sa wa nhtawm, Thailand Mungdan kata de machyu shingbyi let, bungli galaw wa nngai. 1984 ning, April shata hta, ngai a madu jan hte kasha ni marai
(4) yawng, Thailand Mungdan kaw du nga saga ai.
1994, 1995 ning hkan du hkra, shaning (10) ning Chiang Mai kaw na Church of Christ ni a Thai nawku jawng First Church kaw an nu wa ni laban nawku sa lawm ga ai. An nu wa ni hpe chyoichye wa ai Wunpawng kashu kasha, num kasha, la kasha ni mung, an nu wa ni laban nawku sa ai First Church, Thai nawku jawng de tam sagawn nna laban nawku hkan sa lawm wa ma ai.
Thai nawku jawng de laban nawku hkan sa lawm ai Wunpawng ma ni hpe mu nna, ngai myit hta grai myit npyaw, myit hta grai hkra dum mat nngai. Thai ga n chye ai, lakmat n lu ai, tara n shang ai re majaw hkrit tsang ai myit hte laban nawku sa lawm ai Wunpawng ma shayi shadang ni, nawku jawng dung lahkum matu jahtum
makau mayang hkan n-gwi, nwam, krit tsang myit hte, myiman kaji let, sa dung nna laban nawku sa lawm ai hpe mu nna rai nngai. Ngai galaw ra ai lam rai nga sai ngu nna ngai a myit kraw kata kaw dawdan bang da ni ai.
Wunpawng amyu ramma shayi shadang ni Thailand de du sa wa ai mung, grau grau she law jat wa na satlawat rai nga ai majaw, Wunpawng Hkristan nawku hpung masha ni yawng a matu nawku jawng gaw tam lu ra sai ngu nna myit hta matsing bang da ai lam rai sai.
Daw-2: Nawku Jawng Lamuga Htingra Tam Shakut Ai Hta Kaya Hkrum Myit daw Mat Yu Ai Lam.
Shaning (10) ning jan Thai nawku jawng kaw sha laban nawku sa lawm nga ai ten, 1994, 1995 ning daram hta, Sara Kaba Jonathan Morse (Sara Kaba Ja Ni) hte Sarama Kaba Nang Sar yan hpe shani shat jawm sha let, hkrum shaga karum hpyi mayu ai ngu saw lajin la nna ngai a madu jan Shang Htin Hkawn Tawng hte rau, jawm hkrum ga ai. Nawku jawng lamuga htingra tam karum na matu jahkrup tsun lajin ga ai.
Sara Kaba Ja Ni hte Sarama Kaba Nang Sar yan mung, grai myit ya ai hte woi tam masai. Anhte Wunpawng (Kachin) ni gaw, nawku akyu hpyi hpawng ai hte sha n-ngut ai, Cheju Dum Poi, Christmas Poi, Shaning Ningnan Poi ni hta wan wut, wanjang jang tawn nna, htawngka mung ka ra, manau mung manau ra, dagaw mung ka manawt ra ai htunghking lu ga ai re majaw, dai zawn jawm galaw mai ai rai ra ai ngu jawm yu lata ga ai.
Ngai a madu jan hte Salang Hkawng Hawng mung lawm rai nna shara 3, 4 woi yu hkawm masai. Shara sha htuk yang gaw Bath wan mi, wan mi jan nga jang, shakut yu na hku myit da ai.
Anhte Wunpawng Kachin ni a matu htaphtuk na zawn re ai lamuga ni gaw, Bath gumhpraw wan 2 e chyen n yawm ai hkrai hkrup ai. Lamuga shara tam garum ai Sara Kaba yan gasan san wa ai. Gumhpraw kade daram lu tawn ai kun? Manu kade daram nga ai hpe mari na kun? nga nna san wa masai. Hpang de she bai tam sagawn saga, ra wa yang bai karum hpyi na ngu tsun nna shazim tawn kau ni ai. Ngai a madu jan hpe ngai aput dan ai, "ya kaw nna hpang de ngai n-galaw dang na bungli, ngai n lu shabyin na bungli hpe ngai galoi n myit sana," ngu aput dan nhtawm, nawku jawng lamuga htingra tam shakut ai lam hpe shazim tawn kau nna nga mat nngai.
Daw-3: Nawku Jawng Garai N lu Ai Prat Na Laban Nawku Hpawng Ni A Lam
1987 ning hta Sam Rawt Malan Hpung SSPP hte KIO pawng nna lungseng hpaga bungli jawm galaw na matu, Chiang Mai mare kata kaw nta wang htingra kaba ai shara langai mi jawm mari sai. KIO masha, SSPP masha ni dai nta kaw arau jawm nga nna, lungseng ret, lungseng garang shatsawm bungli ni mung galaw wa sai. SSPP ningbaw ni Thailand kata kaw gap sat hkrum ai law mat wa ai hpang, SSPP uhpung ni bungli jahkring kau masai.
KIO, ROKA-T mung, lungseng hpaga bungli galaw na matu, bungli n dang n la re ai majaw, dai dum nta hpe lungseng hpaga galaw sha nga ai Sutdu Bawm Wang La Raw hpe 1991 ning daram hta rai na sai nhten!, bai mari la shangun nna ap jaw kau sai. Dai nta hpe Sutdu Bawm Wang La Raw gaw, hpang e "Pan Kachin Development Society" (PKDS) rung shatai sai hte daini du hkra, nga nga ai.
1996 ning daram hta rai sai nhten!, Wunpawng Kachin ramma shayi shadang sha ni gaw, laban shani bungli hkring shajang ai hte maren, dai PKDS Rung kaw Social Gatherings hku nna sa jawm hkrumzup ai lam galaw wa masai. Yawng gaw Hkristan kashu kasha ni hkrai rai nga ma ai majaw, laban nawku akyu shawng hpyi la nna, shada da shachyen shaga hkat, karum hkat ra na lam ni nga yang jawm tsun jahta dan hkat, jawm karum shingtau la hkat re ai lam ni hpe dai PKDS Rung kaw
galaw hpang wa masai.
Ngai a madu jan gaw, dai lam na nna, laban shani PKDS Rung kaw ma ni sa hpawng ai de sa lawm yu ga nga nna ngai hpe tsun shadut wa sai. Kachin Youth Association Abroad (KYAA) ngu nna ngai mying lata jaw nhtawm, hpaw shabawn n gun jaw tawn ai ramma hpung hpe woi awn ai ramma ningbaw ni grai myit rawt myit lawm ai hte laban shani shagu htep lahti woi galaw nga ma ai.
Kaja ai lam re hpe mu chye lu ai hte maren, an nu wa ni gaw laban shagu hta sa lawm ai hte laban nawku hpawng ai lam byin wa sai. Wunpawng Hkristan uhpawng kaw na kaga myit su ni hte ma ni hpe mung saw shinggyin la ai hte PKDS Rung gaw, Chiang Mai kaw Wunpawng Hkristan ni a matu
No.1 laban nawku hpawng shara byin wa sai rai nga ai. Sutdu Bawm Wang La Raw hte dai PKDS Rung kaw lit la nga ai ni hpe mung, anhte salang ni nan tsun jahkrup la nna, aten ahkying masat nhtawm, laban shagu laban nawku hpawng ai lam, nawku ngut jang mung, malu masha jawm lu, jawm sha ai lam ni ding-yang galaw mat wa sai, rai nga ai.
1996 ning November, Nlung Nnan sha Chyeju Dum Poi, December shata Christmas Poi, 1997 ning January, Shaning Ningnan Poi ni hte matut manoi, PKDS Rung kaw Wunpawng Hkristan hpung masha ni hte ramma kashu kasha ni gaw, ram ram wa garu gachyi law mat wa ang ai hku rai sai. Dai PKDS Rung kaw nga nna lit la yu reng nga ai asak kaba sai n-gai dingla ni gaw, laban shani du shagu PKDS Rung kaw shani tup sa hpawng garu gachyi ai hpe n ra sharawng wa ai hku byin sai. Laban shani nawku hpawng na matu shara kaga tam ra mat wa saga ai.
Hkristan hpu nau shada kamhpa hkat ai myit masin hte ngai hkuhkau ai Karen Hpung Sara, Sara Melvin kaw, ngai a madu jan hte rau namsi kumhpa jahkuk lang nna sa hkrum ga ai. Kachin Hkristan hpunau ni, buga de yak-hkak jamjau ai majaw, Thailand de sa du ai ni law wa ai, n chye n kaw ayak ahkak hte Thailand kaw bungli sa tam galaw sha ai ni law jat wa ai, ndai zawn re ai ni laban shani jawm zup nna laban nawku hpawng galaw lu na matu shara naw madun la rit ngu nna karum sa hpyi lajin ga ai. Sara Melvin gaw Doi Suthep Bum lagaw pawt de na Karen Baptist Center (KBC) de na hpung sara ni hte shachyen matut mahkai dat ya sai. Karen KBC Hpung Komiti hte hkrum shaga karum hpyi nna,laban shani ahkying aten masat ya ai lapran hta laban nawku akyu hpyi hpawng sa galaw lu ai ahkaw ahkang lu saga ai. Karai Kasang hpe chyeju dum myit pyaw lu sai.
Wunpawng Hkristan sagu hpung masha ni laban nawku hpawng htawt galaw ai No.2 shara rai nga sai.Doi Sutep Bum pawt, Karen nawku jawng de Wunpawng Hkristan ni laban nawku hpawng sa htawt galaw ai gaw, 1997 ning, February, March shata daram rai sai nhten!, shata atsawm n matsing sai. Laban nawku ngut shagu mung, la sa shalawm ai malu masha ni hpe kabu gara jawm lu, jawm sha, galaw lu ga ai.
Shata (3) daram na wa yang, dai nawku hpung Komiti hta, Komiti salang nkau mi chye na tim, Thai salang nkau mi lakmat n lu ai ni, Tara n shang ai ni, Myen Mung kaw na masha ni sa nawku hpawng ai hpe myit n hkrum, ahkang n jaw mayu ai ni nga wa ai, dai majaw, shara kaga tam lu yang mai na re lam tsun dan wa ma ai. Shara kaga tam nna bai htawt ra ai lam rai saga ai.
Nawku woi na Hpung sara san san mung garai n lu ai, matut mahkai lu ai hpung sara kadai hpe raitim karum hpyi nna laban nawku hpawng woi ya shangun ai aten rai ga ai. Karen nawku jawng kaw laban nawku sa woi ya ang ai, Chiang Mai kaw na Christian Bible Institute (CBI) kaw bungli gun nga ai Sara Ah Ta Pha nawku sa woi ya ai shani, Sara Ah Ta Pha hpe Kachin Christian ni laban nawku na shara bai htawt ra sai lam, kaga de shara n chye tam la nna myit yak ga ai lam, hpaji jaw la, lam madun la na lam tsun dan karum hpyi sai. Sara Ah Ta Pha gaw, Kachin Christian ni hpe matsan yu dum ai hte, Hkristu a tsaw ra myit nga ai rai nna, CBI nawku jawng wang kaw laban nawku sa galaw mai ai lam galangta mahtai jaw la sai. Sara Ah Ta Pha hpe tsun n dang cheju dum saga ai.
1997 ning, yi-nam ta aten naw re, gara shata hta rai sai kun?, n matsing sai, CBI nawku hpung nta wang kata kaw, htap mi re ai nta kaw Wunpawng Hkristan sagu hpung ni No.3 shara ngu na hta laban nawku hpawng htawt galaw ai rai saga ai. CBI shara kaw, shata kade laban nawku hpawng galaw lai wa sai kun n matsing sai.
1998 shaning ningnan daw de, daini na WCC nawku jawng wang kata e, nam sum up ashep, jawm hkyen tsan jasan nna, sun yiwa ginsum dingsa kaw, laban nawku hpawng jawm galaw hpang wa saga ai. Wunpawng Hkristan sagu hpung masha ni laban nawku hpawng htawt galaw ai No.4 shara rai nga sai. Daini na ten e, Sunday School sharin ai nta kasha rai nga ai. Laning mi daram laman hta shara (4) kaw htawt nna laban nawku kyu hpyi hpawng galaw lai wa sai rai nga ai. Nawku jawng lamuga dinghput htingra garai n lu ai prat hta na laban nawku hpawng ni a labau rai nga mali ai law.
Daw-4: Karai Kasang Tam Jaw Ai Nawku Jawng Wang Htingra Lu Sai.
1997 shaning htum wa maga, shing n rai, 1998 shaning ningnan daw maga rai sana nhten!, atsawm n matsing sai, lani mi hta Chiang Mai kaw rung hpaw tawn ai Burma Relief Center (BRC) kaw bungli galaw nga ai, shanhpraw la, Peter ngu ai wa hpe telephone matut dat nngai. Peter mying bung ai kaga masha Chin amyu masha Peter wa hpe mahtang telephone matut hkrup dat ai. Dai Chin Peter wa hpe telephone matut shut dat yang, ngai nawku jawng a matu lamuga htingra tam nga ai lam na lu ai, shan nu wa ni sun langai mi dut mayu ai, lamuga kade daram kaba ai, gara shara kaw re ai, myit lawm yang sa madun na nga nna tsun dan pru wa ai.
Ngai a madu jan, dai shaloi hkum n pyaw nna yup ra kaw galeng nga ai hpe dai lam tsun dan ngai. Sa yu yu ga nga nna ngai a madu jan galangta tsun pru wa ai majaw, Chin Peter wa hpe telephone bai matut dat nna ngai a madu jan hte an (2) dai sun hpe sa hkan yu ga ai. Myit hta yu sharawng, htaphtuk dum sai. Dai hpang Sarama Kaba Taik Wang hpe tsun dan nna, Sarama Kaba Taik Wang hte Sara Hkaw Kyang a kahpu, tara hkaw sara, Sara Hkaw Lang lawm nna bai sa yu ga ai. Dai shaloi, Sara Hkaw Kyang lawm ai, n lawm ai n matsing sai. Sara Hkaw Lang hpe dai lamuga htingra gaw htaphtuk mu sai hte ra sharawng sai rai nna, Wunpawng Hkristan ni a matu Karai Kasang shaman ya u ga akyu hpyi ya rit ngu nna, Sara Hkaw Lang hpe shawng ningnan akyu hpyi ya shangun sai. Dai hpe ngai galoi mung n malap ai, prat tup matsing nga na sha re.
Dai hpang Salang Hkawng Hawng, Sara Kaba Di Ram, Sara Kaba Sin Ram, GOC Jan ni hpe mung sa woi yu sai.
Dai sun kaw nam sum-up ashep shang, sa mu lawm ai ni mung, yawng gaw htaphtuk mu ai, ra sharawng ga ai hte akyu hpyi da nna bai wa wa rai saga ai.
Dai sun shara lamuga hpe mari la lu na matu jawm myit, jawm bawngban jahkrup dawdan wa saga ai. Sutdu Bawm Wang La Raw kaw mung, ante myit su salang nkau mi sa jawm hkrum tsun dan nna, ra wa jang gumhpraw karum la na matu bawngban karum hpyi tawn saga ai.
Dai hpang Chin Peter wa hte madu jan yan hpe anhte mari la na ga ai lam tsun nna jawm jahkrup sai. Chin Peter wa hte madu jan, Thai num, shan (2) yan gaw, Prince Royal College jawng kaw jawng sara galaw nna pru kringsa mat ai yan, rai nga ai. Nawku jawng wang a matu ra sharawng ai re majaw, Hkristan hpunau shada karum la ai hku manu hkyamsa ya marit ngu hkat nna, Bath wan (2) hte myit hkrum sai. Anhte kalangta gumpraw n lu jaw ga ai ngu shaning (2) ning masat nna jaw shatup na matu, myit hkrum sai. Dai lamuga htingra a kata wang nhpan makau kaw family lupwa shatai tawn ga ai majaw, dai lupwa gaw htinghput htingra rung laika (Chanut) kaw ding-yang lawm nga u ga, shanhte family ni akyu jashawn nga na nga nna tsun jahkrum ai hpe mung myit hkrum hkat tawn sai.
Dai lam ni jawm tsun jahkrup myit hkrum hkat ai hpang, dut ya ai ni hte mari la ai ni lapran ta shada hparan shangut jang rai sai lam, Chin Peter hte madu jan yan tsun wa ai, kaga mi Lawyer hte n galaw ra ai lam tsun wa ai. Raitim, ngai chye hkat ai Lawyer manang nga ai, Lawyer hte lapran kaw dut mari myit hkrum lam ni galaw ga ngu nna, ngai hkuhkau ai Karen Thai, Lawyer Tome ngu ai wa hpe karum hpyi la nngai. Lawyer Tome gaw tara shang mahkrun yawng lajang karum ya ai hte rau, lamuga htingra manu jaw magang mat wa sai.
Dut mari myit hkrum lam galaw nna, gumhpraw jaw magang wa lu ai hte rau, sun wang zawsi, sun yiwa nta kasha zawsi ni hpyi ap la nna, anhte a Wunpawng Hkristan sagu hpung masha kaji kaba ni gaw kabu gara myit sharawng awng, myit rawt shajang ai hte, shaning nana shakram tawn kau nga sai sun lamuga nam sum up laja mat sai hpe jawm dan tsan jasan magang wa sai. Sun yiwa nta kasha hta saihtung panep la sa nyep nna laban nawku akyu hpyi ai lam galaw hpang wa sai rai nga ai.
Lamuga manu gumhpraw hpe loi lu, loi jaw jasan mat wa ai. Wunpawng Hkristan ni kaji kaba gaw, kadai kade lu yang byin mai ai made jawm bang mahkawng shinggyin nna jaw jasan ai. Gumhpraw loi mi atawng apa jaw na shaloi, Sutdu Bawm Wang La Raw kaw karum hpyi la nna jaw jasan ai. Gara hku nan gayin gaye n mai ai aten hta KIO uhpung ROKA-T kaw na fund gumhpraw ni shaw shalawm nna hparan jasan jaw mat wa ai.
Ngai hkuhkau ai England, Japan, Hong Kong, America hkan na maigan jinghku ni kaw mung karum hpyi shinggyin ai hte mahkawng jaw jasan mat wa ai. Chin Peter hte madu jan gaw, Thailand kaw bungli kaga n galaw sai majaw, India, Mizoram State, Chin buga kaw bungli grai mai galaw ai, arang shatai na matu gumhpraw ra ai nga nna, myit krum hkat tawn ai aten (2) ning n du tim, lang hte lang gumhpraw hpyi shadut ai re majaw, lamuga manu Bath wan (2) hpe laning mi jan laman hta yawng jasan jaw shangut kau sai rai nga ai.
Dai lamu ga sun yiwa nta kasha hpe adup run, gram shatsawm la nna, 1998 ning August shata (16) ya shani, tara shang nawku jawng hpaw poi, dingshawn akyu hpyi la, Karai Kasang a lata hta jawm ap ya tawn sai lamuga htingra rai nga mali ai law.
(Nawku Htingnu gawgap na matu, nnan mari la lu sai sun wang lamuga hpe nam hkyen shakrin tsan shatsawm nga, 1997 ning htum wa maga).
Pai: Rev. Jonathan Morse (Srk. Ja Ni); Hkra: Dkb. Gauri Zau Seng (Sun galaw sha ai yiwa nta ginsum hpe gram shatsawm la nna nawku jawng shatai la ai hpang, laban nawku hpawng shani hta, Srk.
Jonathan Morse hpe laban nawku woi ya na saw shaga nna sa lawm ai, rai nga ai). Chiang Mai, November 21, 1998.
Daw-5: "Wunpawng Christian Church" (WCC) Shingteng Amying Lata Ai Lam
Wunpawng Hkristan ni a matu, Thailand Mungdan, Chiang Mai mare kaba kaw nawku jawng wang lamuga dinghput htingra lu madu saga ai hte maren, nawku hpung a shingteng amying hpe mung, myit masin damlada ai hte htawmhpang aprat ban hte ban galu galang a matu rai ra ai ngu hkam la ai rai nna, Wunpawng Christian Church (WCC) ngu nna amying shingteng shamying ai kaja ai ngu nna ngai tang madun jakrup ai hpe kaga hpu nau sagu hpung masha ni mung myit krum sai hte maren, dai WCC mying hte nawku hpung hpe mung gawde tawn lu ai rai nga sai.
Wunpawng amyu masha ni hta e, Christian denomination law law nga shajang ai. Ndai nawku jawng wang htingra gaw, Wunpawng Christian denomination n lata ai sha, myit hkrum ai ni shada da ahkying aten hpe garan masat nna, akyu jawm jashawn mai ai rai u ga ngu ai hpe myit yaw shada ai re majaw, Wunpawng Christian Church ngu ai amying lata ai lam rai sai. Nawku hpawng na shara n lu nna, masha ni a nta htingwung hkan e sa hpyi shingbyi nna she nawku kyu hpyi hpawng galaw ra ai mahkrum madup ni hpe myit yu nna, Wunpawng Christian denomination yawng gaw, dam lada jawm akyu jashawn lu ai rai u ga ngu ai lachyum hte amying shamying tawn ai nawku hpung rai nga sai. Dai yaw shada lam hte maren, amying shamying nna, Karai Kasang kaw akyu hpyi majai nna gawde tawn ai WCC nawku hpung ndai gaw, dai yaw shada lam hpe n jahten kau, n galai kau, n jashai kau u ga, ngu ai hpe mung matsing kyem mazing da ra nga mali ai law.
Daw-6: WCC Nawku Hpung Woi Ni A Lam
Karai Kasang tam jaw ai nawku jawng wang dinghput htingra lamuga kaw, gawde tawn ai Wunpawng Christian Church (WCC) a hpung woi ningbaw ningla kanu kawa hpe mung Karai Kasang gaw, aten hte hkrak lajang tam jaw ai hpe hkam la lu ga ai.
America Mungdan kaw nga nna, Chyum Laika hpe aga amyu myu, laika amyu myu hte dip ka lajang shapraw ai Karai Ksang a Amu Gun Wa Kaba Dr. Gam Seng Shae (Dr. Jangmaw Gam Seng) gaw, Chiang Mai kaw shaning (2) ning rung hpaw nna bungli sa galaw ra nngai nga nna Chiang Mai kaw du wa sai.
Thailand Mungdan, Chiang Mai kaw sa du nga ai Wunpawng Hkristan ni nawku jawng wang htingra lamuga mung lu tawn sai, Wunpawng Christian Church (WCC) ngu ai nawku hpung hpe mung gawde tawn sai, raitim mung, nawku hpung hpe woi awn na hpung woi sara, hpung up garai n lu ai hku rai nga sai. Laban shagu hta kaga nawku hpung hkan na hpung sara ni hpe matut mahkai la, karum hpyi la nna, laban nawku kyu hpyi hpawng hpe woi ya shangun ai ten rai nga ai.
Lana de mi ngai a madu jan hte an lahkawng yan Dr. Gam Seng kaw sa hkrum shaga nna, Wunpawng Hkristan sagu hpung masha ni a lam ni, gara hku jawm shakut nna, kaning rai byin nga ai lam ni tsun dan nhtawm, hpung hpe naw woi awn ningbaw ya na matu karum hpyi mayu ai lam ni sa tsun jahta dan ga ai. Dr. Gam Seng shi kaw nna mai karum la na re nga jang, kaga myit-su salang ni hpe mung woi nna bai sa hkrum karum hpyi na ga ai ngu nna, sa tsun shaga lam hpaw kau da lu saga ai.
Dai hpang galoi mung arau jawm bawngban, jawm galaw nga ai, GOC jan, Dr. Manam Tu Ja jan, Salang Hkawng Hawng, Sarama Kaba Taik Wang, Sara Hkaw Kyang, Sara Gam Win ni hte jawm bawng jahkrup la nna, ngai a madu jan lawm, ndai mying madun tawn ai myit su ni sumpum mi Dr. Gam Seng kaw sa du nhtawm, sa jawm tsun karum hpyi la saga ai.
WCC a No. 1 hpung woi, hpung up hku nna, Dr. Gam Seng lit la ya ai hte WCC nawku hpung hpe woi gawgap shangang tawn ya ai rai sai. Dr. Gam Seng gaw, shi a bungli contract (2) ning hpring ai hpang shi a bungli n ngut ai majaw nga nna Chiang Mai kaw laning mi bai matut nga sai. Dr. Gam Seng America de garai n wa mat yang, WCC kaw dai ni akyu jashawn nga ai Sutdu Bawm Wang La Raw kaw nna Kanu hpe hkungga masat ai mying hte nawku jawng galaw ya ai hpe mung woi awn shangut da ya, nawku jawng dingshawn kyu hpyi hpawng woi galaw da ya sai.
Dai nawku jawng ningnan kaw shi a malai, WCC nawku hpung hpe woi awn nga na matu, Sara Wunaw Naw Mai hpe mung Hpung Up Sara lata mara tangsan tawn da ya sai. Rev. Wunaw Naw Mai, ndai aten hta WCC hpe woi awn ya nga ai hpung up sara wa gaw WCC a No.2 Hpung Up Sara Kaba rai nga sai. Dr. Gam Seng gaw, Chiang Mai kaw arau nawku hpawng de ai Wunpawng Hkristan sagu hpung masha ni hta na sara ni, sarama ni, hpawmi ni, salang ni, ramma myit-su ni nkau mi hpe mung WCC a hpungtau tangsan da ya sai. WCC nawku hpung hpe woi shachyaw hpaw ninghtan shangang shakang da ya nna, WCC nawku hpung a No.1 Hpung Up Sara Kaba, Hpung Woi Kanu Kawa galaw ya lai wa sai cheju madu Dr. Gam Seng gaw, 2004 ning, July shata hta America Mungdan de wa mat sai rai nga ai.
Karai Kasang kaw nna nan lamuga dinghput htingra tam jaw nhtawm, Wunpawng amyu masha ni hta Chyum Mungga lam kaw mying kaba gumhkawng ai Sara Kaba Dr. Gam Seng shi nan, No.1 Hung Up Sara Kaba tai ya let, hpaw shachyaw tawn da sai WCC nawku hpung gaw, laning hte laning grau grau myit hkrum ai hte, ngang kang rawt jat galu kaba wa nga ai gaw, Karai Kasang hpe kabu cheju shakawn shara rai nga mali ai. Dai ning
(15) ning ladu hkrum sai, ndai WCC nawku hpung gaw, Thailand Mungdan, Chiang Mai kaw aprat ban hte ban agrin anga nga sana rai nga ai majaw, matsing kyem mazing tawn mai ai lam ni hpe, WCC Hpung Komiti gaw, matut manoi matsing shachyaw sa wa lu u ga, myit mada ai hte, lai wa sai daw de na lam hpe LABAU shatai tawn lu na matu ka matsing jaw dat nngai law.
Gauri Zau Seng
2 - 9 - 2013, Chiang Mai.
Dai ning Gaw 25 ning hpring Jublee ladaw rai sai.
mahta ai : Dukaba a laikabuk
Inexistence toward Existence
nnga ai kaw nna nga ai de laikaman 32 to 52
