Anhte tsawra kamhpa ai shanglawt hpyendap hpe 2010 ning hta Jarit sin hpyendap gale na matu Myen hpyendap asuya gaw, roi jahkroi matsun wa sai. Hpa mi raitim, Myen hpyendap a kata de she shang mat nna, shanhte Myen hpyendap kaw nna jaw ai hte mi sha, shanhte shangun ai mi galaw ya ai lakung lakap she tai na nga myit jasat ai uhpung nkau mi gaw amyu sha ni a mung masa ahkaw ahkang hpyi shawn ai lam hta mung masha gawm malai tai ya ai lam ni kaw nna shing du gayin kau da nna, ting gyeng nga pra sa wa ai lam hta manu na matu de madaw lata la masai. Grau nna anhte a shawng lam gaw shim ai simsa lam lu saga ni? Myen hpyen wa myit hpraw san nna dinghku kawa kaja zawn, tinang dinghku, jinghku, buga hte mungdan hpe sharawt mayu ai wa rai nga a ni? Ngu nna myit yu na lam hpe ya yang Jarit Sin hpyendap masing hkap la ai hpu nau ni hpe shadum mayu ai.
Anhte KWAT, AKSYU, KNO hte kaga uhpung, makam masham hpung ni yawng kam hpa nga ai KIO/KIA chyawm gaw Jarit Sim hpyendap de n’gale mat nna Panlong ga sadi hpe manoi manat nhtawm tinang amyu sha ni a mung masa bandung hpe woi-awn sa wa ai majaw kabu ga ai. Arawng la ga ai.
Arawng la, kabu ai hte maren, shawng lam mung masa lam yan a ntsa tsang ai lam ni hpe mung shaleng let, mu mada ai lam ni hpe yawng hte garan mayu ai. Dai tsang kaba gaw, anhte KIO/KIA gaw ya yang Myen hpyendap wa gyin shalat nga ai, hpyen palawng raw nna, mung masha bu hpun hkrang dagraw ai, hpyen du ni woi-awn ai asuya nnan hte matut shaga na matu lat nga ai masa hpe asan sha mu lu ai. Shanhte hte atsawm dumgre shaga lu na matu, tinang KIO mung Thai jarit hkan ya yang Myen hpyen hpe gasat nga ai, galoi mung laknak n jahrat ai hpu nau uhpung ni hte federal munghpawm mungdan gawgap komiti hpaw nna mung masa gasup nga ga ai. Kaja wa hpyen asuya ningnan wa, dai ni gaw asuya nnan, gaw da ai tara nnan kata e mung masa bai jahta ga ngu nna, KIO/KIA hpe bai shaga wa ai shaloi, hkap la gring ai gaw rai nga ai. Raitim, ya yang Thai ga jarit hkan nta shap, ROKA rung hkan shanu nna munghpawm mungdan a matu jawm myit sa wa ai lam ni gaw kaman tai mat na tsang ga ai. Ningbaw ni tinang baw sa wa ai rai lit (baggage) sha garawt la nna Yangon de nbungli jawn wa mat na tsang ga ai. Ndai lam ni hpe ya yang jarit kaw kanawn nga ai hpu nau rawt malan uhpung ni mung dai hku sha mu nga na ma ai ngu mu mada ai.
Dai hte maren KIO/KIA na ningbaw n kau mi mung, asuya nnan hte gaphkat jahkring ai lam bai ningdaw mi kahtap jat nna myithkrum lam la na hpe shakut nga ai ngu mu mada ai. Ngai nan mung Myen hpyen asuya lama mi dai hku n galaw yang, Daw Aung San Suu Kyi hku nna lapran tsap galaw ya na matu shiga dap hku nna ningmu shalai yu ni ai. Ndai lam chyawm gaw, simsa lam hpe aten garawt lu mai ai ram garawt la nna, tinang a n gun hpe shagreng sa wa na matu ladat she rai nga mali ai. Lama mi Asuya nnan wa, mung masa matut bawng na matu jahkrup wa ai rai yang, anhte KIO/KIA gaw makai hkak, n gun ja, myit marai rawng (moral & principles), mung masha kaja wa kam hpa nga ai uhpung byin tai wa lu na matu, ladat ni hpe tsepkawp jahkrat da ra nga ai.
Myen hpyendap mung Miwa asuya kaw nna arang wan mun (billions) hku bang da nga sai anhte buga na hpaga lam ni hpe makawp maga na matu, KIO/KIA hpe Myen hpyendap wa majan hpaw ai lam hpe n galaw na ma ai. Jarit mayan manghkang hpe Miwa gaw tsep kawp nra na re. Majan mung byin wa na lam n mu ai. Lai wa sai aten hta amyawk htaw shalai, hpyen n gun jat dan ai, Laja Yang hkan KIA hpyenla rim ai lam ni gaw, KIA wa shagri brep sai kun chyam yu ai she rai. Dai shaloi gwi gwi htang (response) galaw ai lam nnga yang chyawm gaw, Myen a akyang nga ai hte maren, gwi nyem, wa nyem roi nna matut galaw sa wa na she rai nga ma ai.
Ndai sat lawat ni hta, Miwa lauban (investors) ni gaw Myen asuya nnan hte pawng nhtawm, ja gumhpraw law law jai lang let, anhte a amyu hpe tsawra nga ai, mung masa ningbaw ningla ni hpe ja gumhpraw hte shalen htawm UHPUNG JAHKA na hpe she myit tsang nngai. Anhte ja gumhpraw lu nna sutsu wa ai hte ahkaw ahkang lu ai gaw shai na re. Dumsu, Nga (Myen hpyen) ju ai hkau na pa hta wang ngu ai ahkaw ahkang atsawm n kum nna, mam kaja hkai tawn ai wa hte bung nga ai.
Ya na zawn mai byin wa chye ai mung masa hkrun lam hta anhte gaw, tinggyeng ja gumhpraw, nga mu nga mai, hkyem sa lam hpe sha madung dat ai hku nrai, kaja wa anhte amyu sha ni a myu sha ban dung, ahkaw ahkang hpe madung dat ai, uhpung hku tsap nga yang, du pru wa na mung masa maw ru ni hta atsawm sha tawt lai lu na re ngu, dai ni na 50 ning hpring rawt malan nhtoi masat hku nna ningmu garan dat nngai.
Amyu sha ni yawng mung tai hpyen wa anhte hpe shamyit na matu kara hku myit nshawn shaw (strategic) nga ai hpe maram nna, galoi mung ningmu garan let, kaja ai amyu sha lawt lu lam hpe jawm tam nga ga law.
Nang shoi nang sha nnga, amyu yawng rapra ai ahkaw ahkang lu ra ai hpe kam sham ai,
Malihkrang
