KIO hte Slg Nwawt La Raw a ningmu, Kamyunit masa kaw nna, Kachin masa de kalai myit wa ai aten
langai hpe kasat dang dingyang rai nga ai aten re. Miwa kaw na sinat hte hpyen labu palawng, Mousitung Ohwada laika buk ni sharin gun nna, Miwa hkring hte kasat myit rawt nga ai aten mung re. Majan ram ram awng dang nga sai. Dai ten hta, Slg, kaba Maran Brang Seng, L.t: Zahkung Ting Ying, Slg, Kaba Layawk Ze Lum woi awn nna, Miwa mungdan de kamyunit Laknak jak sinat, machyu pala, myawk hte Miwa arung arai ni htuk shapraw na matu lekmat pa hta ta masat htu nna, lu htuk la sai rai nga ai. Kumyunit Tazik hpe shakam sai. Mousitong Wan sui, ngu nna, tsun shajang nga sai. Bu Thanchaung ngu ai Du Kumba Bawk Naw uhpung ni Laknak grung grung hte Myen zahkan hpya sai, Sambuyang, Maran kahtawng, Ledo lam hte Mogawng lam lapran, Namti, Lawa ni yawng hta na Myen Zahkan ni hpe anut shakrip kau lu sai. Dai hpang Myen hpyenla ni hpe ram ram kasat dang nna, Shagribum, Mahtum camp de shinggyin wa saga ai. Dai shaloi, Du Kaba Zau Tu hpe KBC na, Laika shagun dat sai. Balawng Zau Tu nang gaw Hpung-up sara langai a kasha re. Miwa myi jut hku hkumyu, Jinghpaw myi jut hku yu ra ai. Ngu ai laika hpe lu hkap hti sai. Dai kaw nna, Du kaba hte ni dik ai ahkyak NCO ni hpe training nnan galai jaw sai. Du Kaba Zau Tu tsun ai, Myiwa Myi jut hkum yu, Jinghpaw Myi jut hku yu mu nga nna, Laika buk langai sharin sai.
Dai hpe Du kaba Senghpung laika buk langai bai sharin sai. Du kaba Pungshwe Zau Seng mung Laika buk langai bai sharin sai. Daihpang Slg, kaba Maran Brang Seng bai langai sharin sai.
Dai ngu sai hpang, anhte a Miwa Kumyunit dazik hpe di kau saga, anhte byin mai ai daram dating nna, KIA san san hku nna, bai shakut gasat saw a ga nga tsun sai. Mousitong Ohwada Laika buk ni hpe wan ju kau sai. Palawng kaw kap ai, kawlan kaw shakap ai dizik yawng di kau sai. Mi na shawng dawn a KIA hkring hkrak rai sai.
1969 ning May, Dai kaw nna, shata mi ram na hkra Mahtum camp kaw naw nga ai. Dai aten hta Slg, Kaba Maran Brang Seng hpe Suspection dawm nna, gumhpraw dum ningbaw bang tawn nna, san san nga sai. Dai hpang Maj: Namsu Zau Tawng hpe mung kaga san san nga sai. Dai kaw nna gaw Maj: Namsu Zau Tawng D.C shawk sai. Du kaba Zau Tu, Nam Su Zau Tawng hpe njaw ai. Du kaba Zau Tu ngai hpe shangun ai. “La Raw e Maj; Namsu Zau Tawng hpe shaga la su” nga ai. Namsu Zau Tawng hte hpawn rau woi lung wa sai. Du kaba Zau Tu Maj: Namsu Zau Tawng hpe tsun ai, “ Nang Du kaba Maj: langai ting re, ganing rai pru wa na, nang du kaba langai ting pru wa yang, ma ni grau myit daw na re.” ngu nna, Du kaba Pungshwe hte hpawn du kaba ni grai asawng ai. Raitim Maj: Namsu Zau Tawng a myit hta pru le mat na sha tik tik rai sai. Myi man nsam, galai mat sai. Hpyen la matut galaw na matu gawngkya mat sai.
Dai kaw nna, Miwa de ta masat htu tawn ai, Chiphwi Lawkhkawng commander jahkrat da ai, L.t: Zahkung Ting Ying hte Slg, Kaba Layawk Ze Lum ni mung Myit kaga rai mat sai. Dai kaw na gaw, Lachik kasha, Lavoa kasha nig aw baren gun hte machyu pala magazin box ting majoi gap dumbre nna, KIA nkam galaw sai nga, Kummunit de hpung hte hpung shang mat wa sai. Dai ten hta ngai Nwawt La Raw gaw, Du Kaba Zau Tu a makam gyi asak sin rai nga ai. Du Kaba hpe sut kang jaw ngut jang she ngai mai yup ai rai nga ai. Ka-baing sinat shachyen nna, shana tup tup zawng taw nga ra ai re. Du kaba Zau Tu nan hkrit maja ra mat sai aten re.
Dai kaw nna, Du kaba Zau Tu a sak sin ni hpe Hka Hku la (bum ga masha) ni sha hpe lak san shaga tawn sai. Du kaba Zau Tu tsun ai, ya dai ni na ten hta ga sadi dung ai gaw nanhte hka hku la ni sha rai sai. 1 nga yang 1 re. Anhte Sam mung hte myu mare kaba na masha ni gaw manang wa hpe sha kau chye ai. Dai majaw nanhte hpe sha kam sai. Nga nna tsun wa sai. Du kaba Zau tu hpe hpyen la lam 2 sin sai. Du Kaba Zau Tu, ngai Nwawt La Raw hpe ndat sai. Dai kaw na gaw, KIA hpyen hpung gamani ni yawng hpyen nsen madat let sadi maja let rawt sa mat wa sai. Tinang Myu sha kahpu kanau shada da nhkrum nra ai lam ni byin wa sai.
Naw matut Na-
Daw (VI)KIO magam gun hkringsa ai
